danyal 4 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tis snat‑twargiwin n‑nabuh̬adnaṣr

¹ yamr‑ugllid nabuh̬adnaṣr yini: «i‑kullu ayt‑tmizar d‑iqbiln d‑tqbilin da‑isawaln s‑wawal‑nsnt ġ‑ddunit kullutt. ad‑awn‑tigat sslamt.

² timitar ula lɛjayb lli‑yyi‑d‑imla rbbi amattuy, swangmġ is‑ra‑ifulki ad‑awn‑fllasnt‑sawlġ.

³ «mnšk a‑s‑hiyyant‑tmitar‑ns, mnšk a‑s‑mqqurnt lɛjayb lli‑iskar. tagldit‑ns rad‑bdda‑tdum, ar‑itḥkam nttan tasut f‑ṭayyaḍ.

⁴ «nkki nabuh̬adnaṣr ar‑tfjjijġ ġ‑tgmmi ġ‑uwssan‑an, yili dari lh̬ir iggutn ġ‑lqṣr,

⁵ s‑ẓriġ ġakudan yat‑twargit tssiwd‑iyi bahra. lliġ gnġ ġ‑tisi ar‑iyi‑ssġufun iswingimn d‑tiwuẓra lli‑itkkan ih̬f‑inu.

⁶ amrġ ġakudan ad‑d‑awin kullu ayt‑tḥkimt n‑babil s‑umnid‑inu, ad‑iyi‑mln lmɛna n‑twargit.

⁷ aškin‑d išuwwafn d‑imajusiyn d‑lɛulama n‑ayt‑kaldan d‑iqddašn, iniġ‑asn f‑twargit, walaynni ur‑ẓḍarn ad‑iyi‑mln lmɛna‑ns.

⁸ isiggʷra ikšm‑d dari danyal lli‑mi ism‑ns balṭašaṣṣar zund ism n‑rbbi‑nu. nttan, illa gis rruḥ n‑rbbi amẓlay. sawlġ‑as f‑twargit

⁹ iniġ‑as: ‹wa balṭašaṣṣar anmġur n‑išuwwafn, ssnġ is‑gik‑illa rruḥ n‑rbbi amẓlay. ur‑fllak‑išqi yat ġ‑aylli kullu intln. ini‑yyi mad‑ẓriġ ġ‑twargit, tfasrt‑iyi lmɛna‑ns.›

¹⁰ «ġmkad a‑tga‑twaẓrit lli‑ikkan ih̬f‑inu lliġ gnġ ġ‑tisi. ẓriġ‑n yat‑tṣġart bahra yattuyn ġ‑tuẓẓunt n‑ddunit.

¹¹ ar‑ttimġur‑tṣġart, tṣḥu bahra, tattuy aylliġ tlkm ignwan, ar‑n‑ttban i‑iẓri zġ‑tamiw aggugnin n‑ddunit.

¹² fulkin ifrawn‑ns, tigat lġllt‑ns, ar‑takka amššu i‑kullu mddn. ar‑ssmulun luḥuš ġ‑ddawas, ar‑zddġn igḍaḍ n‑ignwan ġ‑gr iṣṭṭwan‑ns. ar‑zġ‑gis‑ištta kullu ma‑ilan tifiyi.

¹³ «mnadġ ilmma ġ‑twaẓrit lli‑ikkan ih̬f‑inu lliġ gnġ ġ‑tisi, s‑ẓriġ ġ‑lgddam‑inu yan ġ‑inagan imẓlay, igguz‑d zġ‑ignna,

¹⁴ ar‑itbrraḥ s‑wawal itjhhdn yini: ‹bbyayt taṣġart‑an, tkksm‑as iṣṭṭwan‑ns, tssussm ifrawn‑ns, tssuktm lġllt‑ns, f‑ad‑rwln luḥuš‑an zġ‑ddawas d‑igḍaḍ‑an zġ‑iṣṭṭwan‑ns.

¹⁵ walaynni flayt agȷ̈̇ȷ̈̇a d‑iẓuran‑ns ġ‑wakal, tassm‑t s‑ubkkas n‑uwzzal d‑wanas ġ‑gr tuga izgzawn n‑lh̬la. adjayt‑t a‑itmmġ s‑tġli n‑ignwan, iqama‑n ġ‑dar luḥuš, tili taġamt‑ns ġ‑tuga n‑wakal.

¹⁶ ra‑ibddl lɛaql‑ns zġ‑win bnadm s‑win luḥuš, ard fllas zrin ssa n‑izmaz.

¹⁷ lḥukm‑ad illa s‑lamr n‑inagan n‑ignna, lɛqubit‑ad tlla s‑wawal n‑lmlayka imẓlayn, f‑ad‑issann kullu willi ddrnin izd rbbi amattuy a‑iḥkamn tagldit n‑bnadm. yiẓḍar a‑stt‑ifk i‑wanna ira, ig fllas willi‑n‑illan ġ‑iyzdar.›

¹⁸ ġmkan a‑tga‑twargit lli‑ẓriġ nkki agllid nabuh̬adnaṣr. ġilad a‑balṭašaṣṣar, ml‑iyi‑d lmɛna‑ns. ašku ayt‑tḥkimt n‑tgldit‑inu kullutn ur‑ẓḍarn ad‑iyi‑stt‑fasrn. imma kiyi tẓḍart‑as, ašku illa gik rruḥ n‑rbbi amẓlay.»

danyal ifasr tis snat‑twargiwin

¹⁹ iduhdu danyal lli‑mi ism‑ns balṭašaṣṣar. yan kra ar‑t‑ssiwidn iswingimn‑ns. yini‑as‑ugllid: «ad‑ur‑tʷggdt a‑balṭašaṣṣar f‑ssibt n‑twargit ula lmɛna‑ns.» isawl‑d ilmma balṭašaṣṣar yini‑as: «a‑sidi, amar yufan a‑tafu‑twargit ġ‑willi‑k‑ikurhan, tili lmɛna‑ns ġ‑inuwwašn‑nk.

²⁰ taṣġart lli‑tẓrit ar‑ttimġur, tṣḥu aylliġ tlkm ignwan, ar‑n‑ttban i‑iẓri zġ‑tamiw aggugnin n‑ddunit,

²¹ fulkin ifrawn‑ns, tigat lġllt‑ns, ar‑takka amššu i‑kullu mddn, ar‑ssmulun luḥuš ġ‑ddawas, ar‑zddġn igḍaḍ n‑ignwan ġ‑gr iṣṭṭwan‑ns,

²² taṣġart‑an ay‑agllid, kiyi a‑stt‑igan. tmqqurt tṣḥut, yigat ššan‑nk aylliġ ilkm ignna, izayd lḥukm‑nk ar tamiw aggugnin n‑ddunit.

²³ lliġ tẓrit ay‑agllid yan inigi amẓlay igguz‑d zġ‑ignna yini: ‹bbyayt taṣġart‑an thlkm‑tt, walaynni flayt agȷ̈̇ȷ̈̇a d‑iẓuran‑ns ġ‑wakal, tassm‑t s‑ubkkas n‑uwzzal d‑wanas ġ‑gr tuga izgzawn n‑lh̬la, a‑itmmġ s‑tġli n‑ignwan, iqama ġ‑dar luḥuš n‑lh̬la ard fllas zrin ssa n‑izmaz›,

²⁴ ġmkad a‑tga lmɛna‑ns ay‑agllid. ašku ikka‑d lamr dar rbbi amattuy f‑ssibt‑nk a‑sidi agllid.

²⁵ ra‑ttyawdḥayt zġ‑gr mddn, tqamat‑n ġ‑dar luḥuš n‑lh̬la, ar‑tšttat tuga zund amugay, ar‑ttmmġt s‑tġli n‑ignwan, ard fllak zrin ssa n‑izmaz. ġakudan a‑ra‑tissant izd rbbi amattuy a‑iḥkamn tagldit n‑bnadm ar‑tt‑yakka i‑wanna ira.

²⁶ lliġ yumr ad‑fln agȷ̈̇ȷ̈̇a d‑iẓuran n‑tṣġart‑an, ġmkan a‑s‑rad‑ak‑d‑sul‑irar tagldit‑nk, ġakud nna‑tfhmt izd bab n‑ignna a‑iḥkamn kraygatt kra.

²⁷ f‑mayan ay‑agllid, ḍalbġ‑ak a‑trḍut s‑mayd‑ak‑nniġ. wrri‑d zġ‑tjli‑nk, ar‑tskart s‑lḥqq. fl iskkirn‑nk ʷh̬šnnin, ar‑ttḥnnut ġ‑imẓlaḍ, iġ‑ityafa a‑fllak‑tdum sslamt.»

tadallit n‑nabuh̬adnaṣr

²⁸ izri ma‑izrin s‑ijra kullu ġayan i‑ugllid nabuh̬adnaṣr.

²⁹ lliġ zrin sin d‑mraw (12) n‑wayyur, ar‑ifttu‑ugllid ġ‑ukʷfaf n‑lqṣr n‑tgldit‑ns ġ‑babil,

³⁰ ar‑ittini d‑ih̬f‑ns: «is‑urd babil imqqurn ayd bniġ s‑tẓḍḍart‑inu itjhhdn a‑tg lqṣr n‑tgldit‑inu, tban gis lhibt n‑lmajd‑inu?»

³¹ sul a‑isawal s‑d‑yuška‑wawal zġ‑ignna yini‑as: «ityamar fllak ay‑agllid nabuh̬adnaṣr, han tagldit‑nk ttyattay fllak.

³² ra‑n‑ttyawdḥayt zġ‑gr mddn, tqamat‑n ġ‑dar luḥuš n‑lh̬la, ar‑tšttat tuga zund amugay, ard fllak zrin ssa n‑izmaz. ġakudan a‑ra‑tissant izd rbbi amattuy a‑iḥkamn tagldit n‑bnadm, ar‑tt‑yakka i‑wanna ira.»

³³ yan imikk s‑yuwfa lamr lli‑illan f‑nabuh̬adnaṣr, ityawdḥay zġ‑gr mddn, ar‑ištta tuga zund amugay, ar‑ttmmġ ddat‑ns s‑tġli n‑ignwan, ar‑itġzzif‑wazzar‑ns zund rriš n‑igidr, ilin‑waskarn‑ns unšk n‑wah̬bašn n‑igḍaḍ mqqurnin.

³⁴ «nkki nabuh̬adnaṣr, lliġ kmmln‑uwssan‑an, allġ alln‑inu s‑ignna, iwrri‑yyi‑d lɛaql‑inu, ar‑ttalġġ rbbi amattuy, ar‑tḥmadġ ar‑ssimġurġ walli bdda iddrn. nttan a‑rad‑bdda‑iḥkam, d‑ur‑sar‑itmmi lḥkam‑ns, d‑tgldit‑ns rad‑bdda‑tdum tasut f‑ṭayyaḍ.

³⁵ kullu imzdġn n‑ddunit ur‑dars gin yat. ar‑iskar aynna ira ġ‑gr ikabarn n‑ignna ula win‑wakal. ur‑iẓḍar yan a‑iḥṣar afus‑ns ula ad‑as‑yini: ‹mayd tskrt?›

³⁶ «lliġ‑iyi‑d‑iwrri lɛaql‑inu, twrri‑yyi‑d‑ula‑tmuġra n‑tgldit‑inu s‑lhibt d‑lmajd‑ns. ar‑iyi‑siggiln imšawarn d‑inmġurn‑inu. ġliġ daġ s‑lɛrš‑inu, tigat‑tmuġra‑nu s‑uggʷar.

³⁷ ġilad nkki nabuh̬adnaṣr ar‑ttalġġ ar‑tmjjadġ ar‑ssimġurġ agllid n‑ignwan. ašku kullu ma‑itqṣad, hati iɛdl, d‑kullu ma‑iskar, hati yʷġẓan. yiẓḍar nttan a‑iẓẓimẓay winna ssimġurnin ih̬f‑nsn.»