danyal 3 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ṣṣurt lli‑iskr nabuh̬adnaṣr

¹ iskr‑ugllid nabuh̬adnaṣr yat‑ṣṣurt zġ‑uwrġ, tġzzif s‑sin id‑mraw d‑ssa (27) n‑mitru, tɛrḍ s‑sin id‑mitru d‑mnaṣṣ. issbidd‑stt‑in ġ‑uzaġar n‑dura lli‑illan ġ‑wammas n‑tmazirt n‑babil.

² yazn‑ilmma‑ugllid nabuh̬adnaṣr ma‑d‑yaqran i‑lḥukkam d‑inmġurn d‑iriyasn d‑imšawarn d‑willi illan f‑iqaridn d‑lqanun d‑lɛskr, ntni d‑willi issftawn tinbaḍin‑ns ġ‑kullu timizar lli‑llanin ġ‑ddu‑ufus‑ns, ad‑d‑aškin knun i‑ṣṣurt lli‑issbidd‑ugllid nabuh̬adnaṣr.

³ ġmkan ad‑d‑munn lḥukkam d‑inmġurn d‑iriyasn d‑imġarn d‑willi illan f‑iqaridn d‑lqanun d‑lɛskr, ntni d‑willi issftawn tinbaḍin‑ns ġ‑kullu timizar, aškin‑d ad‑knun i‑ṣṣurt lli‑issbidd‑ugllid nabuh̬adnaṣr, biddn kullu ġ‑umnid‑ns.

⁴ ibrrḥ‑ubrraḥ ġakudan s‑jjhd yini: «ha luṣiyt da‑fllawn‑illan, ay‑ayt‑tmizar d‑iqbiln d‑tqbilin da‑isawaln s‑wawal‑nsnt.

⁵ tizi nna‑tsfldm i‑nnffar d‑uɛwwad d‑luṭar d‑rribab d‑lgnbri d‑taẓẓwayt d‑kraygatt kra igan win llġa, iqqan‑kʷn‑d a‑tknum tšjdm i‑ṣṣurt n‑uwrġ lli‑issbidd‑ugllid nabuh̬adnaṣr.

⁶ wanna ur‑ikʷnin išjd, ra‑n‑ityawgar ġakudan ġ‑ufarnu n‑lɛafiyt ijddrn.»

⁷ imikk sfldn mddn i‑ijjij n‑nnffar d‑uɛwwad d‑luṭar d‑rribab d‑lgnbri d‑taẓẓwayt d‑kraygatt kra igan win llġa, ḥarrun kullu ayt‑tmizar d‑iqbiln d‑tqbilin ad‑knun šjdn i‑ṣṣurt n‑uwrġ lli‑iskr‑ugllid nabuh̬adnaṣr.

afarnu n‑lɛafiyt ijddrn

⁸ ddun ilmma kra ġ‑lɛulama n‑ayt‑kaldan, ar‑taštkkan s‑uwdayn,

⁹ sawln i‑ugllid nabuh̬adnaṣr inin‑as: «ad‑bdda‑tdum tudrt‑nk ay‑agllid.

¹⁰ lamr‑nk lli‑tssufġt ay‑agllid, tnnit gis: ‹kullu wanna isfldn i‑nnffar d‑uɛwwad d‑luṭar d‑rribab d‑lgnbri d‑taẓẓwayt d‑kraygatt kra igan win llġa, a‑iknu išjd i‑ṣṣurt n‑uwrġ.

¹¹ wanna ur‑ikʷnin išjd‑as, han ra‑n‑ityawgar ġ‑ufarnu n‑lɛafiyt ijddrn.›

¹² llan darnġ kra n‑ayt‑yahuda, tẓlit‑tn i‑twuri n‑tgldit ġ‑wakal n‑babil, ism‑nsn šadrah̬ d‑mišah̬ d‑ɛabd‑nagu. ntni ay‑agllid, ur‑a‑stt‑gik‑tawin. ur‑a‑tqasan id‑rbbi‑nk ula da‑tšjadn i‑ṣṣurt n‑uwrġ lli‑tssbiddt.»

¹³ nabuh̬adnaṣr nkrn‑d gis iriyn, yamr ad‑as‑d‑awin šadrah̬ d‑mišah̬ d‑ɛabd‑nagu. šškšmn‑tn‑d s‑umnid n‑ugllid.

¹⁴ yini‑asn nabuh̬adnaṣr: «is‑iṣḥa a‑šadrah̬ d‑mišah̬ d‑ɛabd‑nagu, ur‑a‑ttqasam id‑rbbi‑nu ula da‑ttšjadm i‑ṣṣurt n‑uwrġ lli‑ssbiddġ?

¹⁵ zġ‑ġila tizi nna‑tsfldm i‑nnffar d‑uɛwwad d‑luṭar d‑rribab d‑lgnbri d‑taẓẓwayt d‑kraygatt kra igan win llġa, taškim‑d a‑tknum tšjdm i‑ṣṣurt lli‑skrġ, hati ifulki. walaynni iġ‑ur‑as‑tšjdm, ġakudan a‑ra‑n‑ttyawgarm ġ‑ufarnu n‑lɛafiyt ijddrn. is‑tġalm is‑illa kra n‑rbbi iẓḍarn a‑kʷn‑ifukku zġ‑gr ifassn‑inu?»

¹⁶ isawl‑d šadrah̬ d‑mišah̬ d‑ɛabd‑nagu i‑ugllid inin‑as: «wa nabuh̬adnaṣr, ur‑fllanġ‑išqi a‑njawb f‑mayan.

¹⁷ iġd ġmkan a‑iga, ha rbbi‑nġ lli‑ntqasa iẓḍar nttan ad‑aġ‑ifukku zġ‑ufarnu n‑lɛafiyt ijddrn, ifukku‑aġ ula zġ‑ufus‑nk ay‑agllid.

¹⁸ walaynni iġ‑ur‑aġ‑akkʷ‑ifukki, a‑tissant ay‑agllid, ur‑ra‑ntqasa id‑rbbi‑nk ula ra‑nšjd i‑ṣṣurt n‑uwrġ lli‑tskrt.»

¹⁹ nabuh̬adnaṣr nkrn‑d gis iriyn s‑uggʷar f‑šadrah̬ d‑mišah̬ d‑ɛabd‑nagu, ittkrs‑uwdm‑ns fllasn, yamr imqasan‑ns ad‑ssrġn afarnu uggʷar n‑mklli myurn s‑ssa n‑twal.

²⁰ yamr kra n‑iɛskriyn‑ns tjhhdnin ad‑krfn šadrah̬ d‑mišah̬ d‑ɛabd‑nagu, grn‑tn‑in ġ‑ufarnu n‑lɛafiyt ijddrn.

²¹ hatni sul lsan aslham d‑ssrwal d‑rrẓẓa d‑tmlsa‑nsn yaḍni, krfn‑tn grn‑tn‑in ġ‑ufarnu n‑lɛafiyt ijddrn.

²² yigat‑ufdaddu n‑lɛafiyt, inġ irgazn lli‑yusin šadrah̬ d‑mišah̬ d‑ɛabd‑nagu, ašku iḥurra‑d lḥukm iqjrn n‑ugllid, ar‑itqd‑ufarnu bahra.

²³ imma ntni s‑kraḍ, šadrah̬ d‑mišah̬ d‑ɛabd‑nagu s‑iskraf‑nsn, ḍrn‑in ġ‑tuẓẓunt n‑ufarnu n‑lɛafiyt ijddrn.

²⁴ ibidd‑ugllid nabuh̬adnaṣr f‑iḍarn‑ns, iḍr‑as lɛjb, yini i‑imšawarn‑ns: «is‑urd kraḍ n‑mddn tyawkrafnin a‑n‑ngr ġ‑tuẓẓunt n‑lɛafiyt?» inin‑as: «iṣḥa ay‑agllid.»

²⁵ izayd yini: «walaynni ẓriġ‑n kkuẓ n‑mddn ur‑tyawkrafn, ar‑fttun ġ‑tuẓẓunt n‑lɛafiyt, d‑ntni ur‑tn‑yaġ yat. imma wis kkuẓ irwas kra n‑yus n‑rbbi.»

²⁶ izayd nabuh̬adnaṣr yakmur‑n s‑imi n‑ufarnu n‑lɛafiyt ijddrn iġr‑asn‑in: «wa šadrah̬, wa mišah̬, wa ɛabd‑nagu, wa ih̬ddamn n‑rbbi amattuy, ffuġat‑d taškim‑d.» iffuġ‑d šadrah̬ d‑mišah̬ d‑ɛabd‑nagu ġakudan zġ‑lɛafiyt.

²⁷ munn‑in lḥukkam d‑inmġurn d‑iriyasn d‑imšawarn, ẓrn is‑ur‑tsugir lɛafiyt yat i‑ddat‑nsn, ula ijdr yan‑unẓaḍ ġ‑ih̬fawn‑nsn. ur‑mslnt‑tmlsa‑nsn ula illa‑gisnt‑waḍu n‑lɛafiyt.

²⁸ isawl‑d nabuh̬adnaṣr yini: «ambarki a‑iga rbbi n‑šadrah̬ d‑mišah̬ d‑ɛabd‑nagu. ašku yuzn‑d lmalak‑ns, ifukku ih̬ddamn‑ns lli‑fllas‑ittkln ġakud lliġ ɛṣan lamr n‑ugllid. fkn tudrt‑nsn i‑lmut wala qasan ula šjdn i‑kra n‑rbbi abla rbbi‑nsn.

²⁹ ha lamr lli‑rad‑ssufġġ ġilad f‑ssibt‑nsn. wanna irgmn ġ‑rbbi n‑šadrah̬ d‑mišah̬ d‑ɛabd‑nagu ġ‑gr kullu ayt‑tmizar d‑iqbiln d‑tqbilin, ra‑ityawbbay f‑igzman, tth̬lu‑tgmmi‑ns, ašku ur‑illi kra n‑rbbi yaḍni iẓḍarn a‑ifukku ġmkad.»

³⁰ izayd‑ilmma‑ugllid issġli šadrah̬ d‑mišah̬ d‑ɛabd‑nagu ġ‑twuri n‑tgldit ġ‑wakal n‑babil.