danyal 2 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tawargit n‑ugllid nabuh̬adnaṣr

¹ asggʷas wis sin ġ‑tgldit n‑nabuh̬adnaṣr, iwarga nabuh̬adnaṣr yat‑twargit, tġufa rruḥ‑ns bahra aylliġ‑as‑laḥ iṭs.

² yamr‑ugllid ad‑ġrn i‑išuwwafn d‑imajusiyn d‑isḥḥarn d‑lɛulama n‑ayt‑kaldan [ayt‑babil] ad‑as‑mln ma‑iwarga. aškin‑d biddn ġ‑umnid n‑ugllid.

³ yini‑asn‑ugllid: «hati wargaġ yat‑twargit, tssġufa rruḥ‑inu. iriġ ad‑issanġ lmɛna‑ns.»

⁴ sawln‑d lɛulama n‑ayt‑kaldan inin i‑ugllid s‑iwaliwn n‑ayt‑aram: «ad‑bdda‑tdum tudrt‑nk ay‑agllid. ini‑d i‑ih̬ddamn‑nk ma‑tẓrit ġ‑twargit, nfasr‑ak lmɛna‑ns.»

⁵ irar‑asn‑ugllid yini: «nniġ‑awn awal izgan. iġ‑ur‑iyi‑tnnim mad‑ẓriġ ġ‑twargit ula lmɛna‑ns, ra‑kʷn‑bbiġ f‑igzman, h̬luġ tigʷmma‑nun.

⁶ walaynni iġ‑iyi‑tnnam mad‑ẓriġ ġ‑twargit tfasrm‑iyi‑tt, rad‑awn‑fkġ tismġurin d‑twafkiw ula timuġra iggutn. aywa mlayt‑iyi mad‑wargaġ, tfasrm‑iyi lmɛna‑ns.»

⁷ sawln‑d daġ inin‑as: «ini‑d i‑ih̬ddamn‑nk ma‑tẓrit ġ‑twargit ay‑agllid, s‑rad‑ak‑nfasr lmɛna‑ns.»

⁸ irar‑asn‑ugllid: «ssnġ ġilad is‑a‑yyi‑ġir‑tssmaṭalm, ašku tsfldm is‑izga‑wawal‑inu.

⁹ iġ‑ur‑iyi‑tnnim mad‑ẓriġ ġ‑twargit, ra‑giwn‑iban ma‑fllawn‑illan. ašku hatin tmšaškam‑d i‑ngratun a‑yyi‑tsawalm s‑tkrkas d‑tkndawt ard gllbn izmaz. aywa inyayt‑iyi mad‑ẓriġ ġ‑twargit f‑ad‑issanġ is‑tẓḍarm a‑stti‑tfasrm.»

¹⁰ sawln‑d lɛulama n‑ayt‑kaldan ġ‑umnid n‑ugllid inin‑as: «ur‑illi yan f‑wakal iẓḍarn a‑iskr maylli iḍalb‑ugllid. ur‑jji‑illi yan ġ‑igldan hiyyanin mqqurnin ma‑iḍalbn zund mayad zġ‑imajusiyn d‑isḥḥarn d‑lɛulama n‑ayt‑kaldan.

¹¹ maylli iḍalb‑ugllid išqa bahra. ur‑iẓḍar yan ad‑ak‑t‑iml abla id‑rbbi, d‑ntni ur‑a‑tgawarn ġ‑gr mddn.»

¹² ibzg‑ugllid bahra f‑wawal‑an, nkrn‑d gis iriyn, yamr ad‑fnun kullu ayt‑tḥkimt n‑babil.

¹³ iffuġ lamr‑an, skrn f‑ad‑nġn ayt‑tḥkimt, ddun ad‑d‑awin ula danyal d‑imddukkʷal‑ns a‑tn‑nġn.

¹⁴ imma danyal irur i‑aryuh̬ lli‑igan ariyas n‑waḍafn n‑ugllid, yini‑as awal n‑tfhimt ula lmɛqul. lliġ‑d‑iffuġ aryuh̬ ariyas n‑waḍafn a‑inġ ayt‑tḥkimt n‑babil, isqsa‑t danyal:

¹⁵ «mah̬ a‑d‑iḥurra lḥukm‑ad iqjrn n‑ugllid?» iɛawd aryuh̬ i‑danyal f‑ma‑ijran.

¹⁶ inkr danyal ikšm s‑dar‑ugllid, iḍalb zġ‑gis imikk n‑luqt f‑ad‑as‑ifasr tawargit‑ns.

lmɛna n‑twargit

¹⁷ iwrri‑d danyal s‑tgmmi‑ns, iɛawd i‑imddukkʷal‑ns ḥananyah d‑mišayil d‑ɛzaryah f‑ma‑ijran.

¹⁸ izzɛam‑tn ad‑ẓẓalln i‑rbbi n‑ignna, ḍalbn‑as ad‑fllasn‑iḥnnu, iml‑asn‑d maylli intln, baš a‑ur‑fnun ntni d‑ayt‑tḥkimt n‑babil kullutn.

¹⁹ ġ‑iḍ‑an a‑d‑imla rbbi maylli intln i‑danyal ġ‑yat‑twargit. izayd danyal yalġ rbbi n‑ignna

²⁰ yini: «ambarki a‑iga ism n‑rbbi, ġilad ula kullu mayd iftan, ašku nttan a‑iṭṭafn taḥkimt ula taẓḍḍart.

²¹ ar‑issgllab tiziwin d‑izmaz, ar‑izzuguz igldan ar‑issaqlay wiyyaḍ, ar‑yakka taḥkimt i‑ayt‑tḥkimt, ar‑yakka tawassna i‑ayt‑tfhmt,

²² ar‑d‑issbayyan ma‑idran ula ma‑intln, yissan ma‑illan ġ‑tillas, tlulliy‑as tifawt.

²³ ar‑ki‑ttalġġ ar‑ki‑tškarġ a‑rbbi n‑id‑baba. tfkit‑iyi taḥkimt ula taẓḍḍart, tssbayynt‑iyi‑d maylli‑zġ‑gik‑nḍalb, tssmlt‑aġ‑d taġawsa n‑ugllid.»

²⁴ ikšm danyal ġakudan s‑dar aryuh̬ lli‑yuṣṣa‑ugllid a‑ifnu ayt‑tḥkimt n‑babil, yini‑as: «ad‑ur‑tfnut ayt‑tḥkimt n‑babil. šškšm‑yyi s‑dar‑ugllid, ad‑as‑fasrġ tawargit‑ns.»

²⁵ iḥarru aryuh̬, yawi danyal s‑dar‑ugllid yini‑as: «hati ufiġ ġ‑gr imsukfn n‑ayt‑yahuda, yan iẓḍarn ad‑ak‑issml ay‑agllid lmɛna n‑twargit‑nk.»

²⁶ isawl‑d‑ugllid i‑danyal lli‑mi ism‑ns balṭašaṣṣar isqsa‑t: «is‑tẓḍart a‑yyi‑tinit mad‑ẓriġ ġ‑twargit lli‑wargaġ, tfasrt‑iyi‑tt?»

²⁷ isawl‑d danyal ġ‑umnid n‑ugllid yini‑as: «maylli iḍalb‑ugllid f‑kra intln, ur‑illi yan ġ‑ayt‑tḥkimt ula imajusiyn ula išuwwafn ula iqddašn ma‑iẓḍarn ad‑ak‑yini ma‑tẓrit.

²⁸ walaynni illa yan rbbi ġ‑ignna ar‑d‑issbayyan ma‑intln. hati imla‑yak‑d ay‑agllid nabuh̬adnaṣr ma‑ra‑ijru ġ‑uwssan ggʷranin. ġmkad a‑tga‑twargit ula tiwuẓra lli‑kkanin ih̬f‑nk lliġ tgnt ġ‑tisi.

²⁹ way‑agllid, uškan‑k‑id iswingimn ġ‑ma‑ra‑ijru tigira n‑uwssan‑ad. rbbi lli‑d‑issbayyann ma‑intln, imla‑yak‑d ma‑ra‑yili.

³⁰ urd f‑ssibt n‑kra n‑tḥkimt dari illan uggʷar n‑kullu mddn a‑f‑iyi‑d‑issbayyn rbbi maylli intln, walaynni ira ad‑ak‑iml lmɛna ay‑agllid, baš a‑tissant iswingimn n‑ih̬f‑nk.

³¹ «tmnadt ay‑agllid, tẓrt yat‑ṣṣurt imqqurn, tbidd ġ‑umnid‑nk. han ṣṣurt‑an ar‑tssiwid, tġzzif tiddi‑ns ar‑bahra‑tssmrġa.

³² ih̬f n‑ṣṣurt iga win‑uwrġ iṣfan. idmarn‑ns d‑iġalln‑ns gan win nnʷqrt. aḥbbuḍ‑ns d‑imṣaḍn‑ns gan win‑wanas.

³³ tiġanimin n‑iḍarn‑ns gant tin‑uwzzal. imma ibaširn‑ns gan win‑uwzzal d‑win idqqi.

³⁴ sul a‑gis‑tmnadt kiyi, s‑ityawkkas yan‑uẓru, urd s‑ufus n‑bnadm, s‑n‑yut ibaširn n‑ṣṣurt lli‑ganin win‑uwzzal d‑idqqi, irẓ‑tn ifts‑tn.

³⁵ inġd kullu uzzal d‑idqqi d‑wanas d‑nnʷqrt d‑uwrġ, wrrin gn zund alim inġdn ġ‑unrar ġ‑tizi n‑rrwa, yasi‑tn‑waḍu aylliġ‑tn‑laḥ zund iġ‑ur‑jji‑llin. imma aẓru lli‑yutn ṣṣurt‑an, iwrri iga yan‑udrar bahra imqqurn, yamẓ ddunit kullutt.

³⁶ «ġmkan a‑tga‑twargit. ġilad ra‑nfasr lmɛna‑ns ġ‑umnid n‑ugllid.

³⁷ kiyi ay‑agllid, tgit agllid n‑igldan lli‑mi‑d‑ifka rbbi n‑ignna tagldit d‑tẓḍḍart d‑tmuġra d‑lhibt.

³⁸ ig ġ‑ddu‑ufus‑nk tarwa n‑bnadm d‑luḥuš n‑tagant d‑igḍaḍ n‑ignwan. hati kullu maniġ a‑zddġn, ifk‑ak ad‑fllasn‑tḥkamt. kiyi a‑igan ih̬f‑an n‑uwrġ.

³⁹ tigira‑nk ra‑di‑tnkr yat‑tgldit yaḍni tmẓẓi f‑tink. tggru‑as‑tgldit tis kraṭṭ tg tin‑wanas, ra‑tḥkam nttat f‑ddunit kullutt.

⁴⁰ tili‑ilmma‑tgldit tis kkuẓṭ, tqqur zund uzzal. ġmklli itnġad‑uwzzal ar‑imzzi kraygatt kra, ġmkan a‑s‑ra‑trẓẓa tiglday‑an kullutnt tmzi‑tnt.

⁴¹ ġmklli tẓrit ibaširn d‑tfdnin, gan win idqqi n‑ufh̬h̬ar d‑win‑uwzzal, ġmkan a‑ra‑tbḍu‑tgldit‑an, yili gis ma‑iqqurn ġmklli tẓrit uzzal‑an, ih̬lḍ d‑idqqi ilggʷaġn.

⁴² ġmklli gant‑tfdnin n‑ibaširn tin‑uwzzal d‑idqqi, ġmkan a‑ra‑yili ġ‑tgldit‑an ma‑iqqurn d‑ma‑ihšušan.

⁴³ d‑ġmklli tẓrit uzzal ih̬lḍ d‑idqqi ilggʷaġn, ġmkan a‑ra‑gis‑h̬lḍn mddn. walaynni ur‑rad‑d‑mšaškan, ġmklli ur‑a‑d‑itmšaška‑uwzzal d‑idqqi.

⁴⁴ ġ‑uwssan n‑igldan‑an a‑ġ‑ra‑issbidd rbbi n‑ignna yat‑tgldit lli‑ur‑ra‑sar‑ihrš, ula sar‑tt‑umẓn mddn yaḍni. nttat a‑ra‑inġd tiglday‑an yaḍni tsstmmu‑tnt, d‑nttat a‑rad‑bdda‑iqama,

⁴⁵ ġmklli tẓrit aẓru lli‑ityawkkasn zġ‑udrar bla afus n‑bnadm, inġd uzzal d‑wanas d‑idqqi d‑nnʷqrt d‑uwrġ. ha rbbi imqqurn a‑d‑issbayynn i‑ugllid ma‑ra‑ijru ġ‑mayd iftan. tṣḥa‑twargit, tzga lmɛna‑ns.»

iwrri danyal iga lḥakm f‑babil

⁴⁶ issknu‑d‑ugllid nabuh̬adnaṣr ih̬f‑ns ar akal, išjd i‑danyal. yamr ad‑d‑awin isakmurn d‑lbh̬ur ma‑s‑a‑ti‑tɛbadn.

⁴⁷ isawl‑ugllid s‑danyal yini‑as: «s‑ṣṣaḥt rbbi‑nun iga walli imqqurn ġ‑id‑rbbi, ig walli itḥkamn ġ‑igldan, ig walli‑d‑issbayyann aynna intln, ašku kiyi a‑mi‑ityawfka a‑di‑tmalat maylli irgsn.»

⁴⁸ inkr‑ugllid ġakudan ig i‑danyal ššan iggutn, ifk‑as kigan d‑tsmġurin ġʷlanin, issġli‑t a‑ig lḥakm f‑tmazirt n‑babil kullutt, ig‑t d‑uriyas f‑ayt‑tḥkimt n‑babil.

⁴⁹ iḍalb‑as danyal f‑šadrah̬ d‑mišah̬ d‑ɛabd‑nagu, iẓli‑tn‑ugllid a‑tqasan tawuri n‑tgldit f‑wakal n‑babil. imma danyal iqama nttan ġ‑tama n‑ugllid.