danyal 12 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tudrt idumn ula tadallit idumn

¹ [yuška‑d yan lmalak s‑danyal isawl‑as f‑uwssan ggʷranin yini:] «ġ‑uwssan‑an ra‑inkr mih̬ayil lmalak ihiyyan lli‑itbiddadn d‑mddn‑nk. ra‑tili‑tnukmut išqan ġ‑uwssan‑an, ur‑jji‑tlli zund nttat zġ‑isizwur n‑tmazirt ar ġakudan. ġ‑uwssan‑an a‑ġ‑rad‑njmn mddn‑nk, kullu winna‑mi‑n‑ityafa ism‑nsn ġ‑warra.

² ggutn willi‑n‑iṭṭasn ġ‑ugdrur n‑wakal, rad‑di‑tfaqn, kra gisn s‑tudrt idumn, kra s‑lɛar ula tadallit idumn.

³ imma willi iṭṭafn taḥkimt, hati rad‑sufun zund tifawt n‑ignna. d‑willi irurn kigan s‑uġaras iṣlaḥn, hati rad‑sufun zund itran kullu mayd iftan.

⁴ imma kiyin a‑danyal, ḥḍu iwaliwn‑an, trglt arra ar ussan ggʷranin. kigan a‑ra‑itazzal s‑ġid ula ġid ar‑tzayadn ġ‑twassna.»

⁵ nkki danyal mnadġ‑n s‑ẓriġ sin mddn yaḍni biddn‑in, yan ġ‑ugmmaḍ‑ad n‑wasif, d‑yan ġ‑ugmmaḍ‑an yaḍni.

⁶ yan gisn isawl i‑lmalak lli‑ilsan timlsit n‑lkttan yili f‑iggi n‑waman n‑wasif, isqsa‑t: «mnšk a‑iqaman ard kmmlnt kullu lɛjayb‑ad?»

⁷ sfldġ i‑lmalak bu‑tmlsit n‑lkttan lli‑illan f‑iggi n‑waman n‑wasif, yall afus‑ns afasi s‑ignwan, yall ula afus‑ns aẓlmaḍ, iggall s‑rbbi lli‑bdda‑iddrn yini: «kraḍ isggʷasn d‑mnaṣṣ, ard kullu ttrẓ‑tdwast n‑uqbil amẓlay, ġakudan a‑ra‑yafu kullu mayad.»

⁸ sfldġ‑as nkki walaynni ur‑fhimġ. sqsaġ‑t ġakudan: «a‑sidi, ġ‑isiggʷra n‑kullu mayad, ma‑ra‑yili?»

⁹ yini‑yyi: «ddu a‑danyal, ašku qqnn iwaliwn‑an, rgln ar ussan n‑isiggʷra.

¹⁰ iggut ma‑ra‑iwrri iġus yimlul iṣfu, imma ayt‑lh̬ʷšant ra‑sul‑skarn ma‑yʷh̬šnn. ġ‑gr willi ʷh̬šnnin ur‑ra‑yili yan ifhmn. han willi ṭṭafnin taḥkimt a‑ra‑ifhm.

¹¹ zġ‑wass‑an ġ‑rad‑ittint‑tġrṣiw jdrnin n‑kraygatt ass, ar ass lliġ‑n‑tbidd‑tjlh̬it lli‑ifnnun, ra‑yili ġ‑gratsnt alf d‑sin id‑miyya d‑ṭẓa n‑id‑mraw (1290) n‑wass.

¹² imbarkiyn ad‑gan winna qlnin ard iruḥ‑wass wis‑walf d‑kraḍ id‑miyya d‑kraḍ id‑mraw d‑smmus (1335).

¹³ imma kiyi, mun d‑uġaras‑nk ar isiggʷra. ra‑tsunfut tnkrt‑d ilmma ġ‑wass iggʷran, tbiddt ġ‑udġar lli‑ak‑ijjujad sidi rbbi.»