ayyub 7 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

⁷ [yini ilmma ayyub i‑rbbi:] «swangm‑d izd zund yat‑tunfust a‑tzray tudrt‑inu, d‑ur‑sar‑n‑gis‑ẓriġ lh̬ir.

⁸ kiyi‑ad gigi itmnadn, ur‑sul‑ra‑yyi‑tẓrt. iġ‑sri‑tsigglt, ur‑sul‑ra‑yyi‑taft.

⁹ ġmklli tfsi‑tmdlut laḥ‑tt, ġmkan a‑itgga yan igguzn s‑udġar n‑willi mmutnin. ur‑sar‑d‑zġ‑gis‑inkir.

¹⁰ ur‑sul‑a‑d‑itwrri s‑tgmmi‑ns, wala sar‑t‑id‑kttin ayt‑tmazirt‑ns.

¹¹ f‑ġayan a‑f‑ur‑sul‑rad‑fssaġ. taġuft n‑uwl a‑yyi‑idḥin ad‑sawalġ, d‑usmmum n‑tasa‑nu ayd‑s‑a‑ssmummuyġ.

¹² izd amda idran ad‑giġ, nġd luḥš lli‑gis‑illan, aylliġ‑iyi‑tglit?

¹³ ha‑yyi ar‑ttiniġ: ‹tisi‑nu a‑ġ‑rad‑afġ asunfu, d‑usddul‑inu a‑flla‑issifsasn takrrayt.›

¹⁴ walaynni ar‑iyi‑tssiwidt s‑twargiwin, ar‑iyi‑tssġufut s‑tiwuẓra,

¹⁵ ard iriġ ad‑qqajiġ mmtġ, a‑ur‑sul‑ssmussuġ ih̬ṣan‑inu.

¹⁶ ha‑yyi kurhiġ tudrt‑inu. ur‑sul‑riġ ad‑ddrġ ġilad tasawnt. adj‑iyi, han ussan‑inu zund tunfust ad‑gan.

¹⁷ «ma‑iga bnadm aylliġ‑a‑gis‑tswingimt ar‑ti‑ttgabalt?

¹⁸ ar‑gis‑tsiggilt zikk ṣbaḥ ar‑ti‑ttarmt ass kullut.

¹⁹ is‑ur‑ra‑n‑trart alln‑nk flla, tadjt‑iyi ad‑zzriġ ilufẓan?

²⁰ a‑walli igabln bnadm, iġ‑jliġ nkki, mad‑ak‑iddan? mah̬ a‑yyi‑tstit tniyyšt flla? mah̬ aylliġ‑dark‑giġ zund iġ‑tusit aẓaẓu?

²¹ mah̬ aylliġ ur‑iyi‑tṣamḥt f‑lɛib nna‑gigi‑illan, tssurft aynna skrġ yʷh̬šn? imikk rad‑gnġ ġ‑ddu‑wakal, tsigglt sri, ur‑ra‑yyi‑taft.»