ayyub 42 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ayyub yudr i‑ih̬f‑ns

¹ isawl ayyub i‑sidi rbbi ġakudan yini:

² «ssnġ is‑tẓḍart i‑kraygatt kra. d‑aynna tqṣadt, ur‑illi ma‑ra‑t‑iḥṣar.

³ tnnit: ‹ma‑iga ġwad issllasn aġaras, ar‑isawal f‑ma‑ur‑issin?› s‑ṣṣaḥt sawlġ f‑ma‑ur‑fhimġ, lhuġ‑n s‑lɛjayb lli‑flla yattuyn ssurfnt tawassna‑nu.

⁴ tinit: ‹sfld ġilad, ra‑k‑sqsaġ, tsslmdt‑iyi.›

⁵ kkiġ‑ttin sfldġ fllak s‑imẓgan‑inu, imma ġilad ẓriġ‑k s‑walln‑inu.

⁶ ha nkki ḥgrġ ih̬f‑inu. s‑ugdrur d‑iġd a‑s‑rad‑ssdulluġ ih̬f‑inu.»

iġḍb rbbi f‑imddukkʷal n‑ayyub

⁷ lliġ ikmml sidi rbbi iwaliwn‑ns i‑ayyub, isawl‑d sidi rbbi s‑alifaz gu‑tayman yini‑as: «iznd lġaḍab‑inu fllak kiyi d‑imddukkʷal‑nk s‑sin, ašku ur‑flla‑tnnim lḥqq ġmklli‑t‑inna‑uh̬ddam‑inu ayyub.

⁸ nkrat ġilad tawim ssa n‑imugayn d‑ssa n‑izamarn, tddum s‑dar‑uh̬ddam‑inu ayyub, tssattuym‑iyi‑d tiġrṣiw jdrnin f‑ssibt‑nun. ra‑fllawn‑iẓẓall‑uh̬ddam‑inu ayyub, sfldġ i‑ma‑fllawn‑iḍalb, f‑a‑ur‑awn‑rarġ f‑ġmklli iga‑unufl‑nun. ašku han ur‑flla‑tnnim lḥqq ġmklli‑t‑inna‑uh̬ddam‑inu ayyub.»

⁹ iddu alifaz gu‑tayman d‑bildad gu‑šuḥ d‑ṣufar gu‑naɛmat, skrn ġmklli‑s‑asn‑inna sidi rbbi, irḍu sidi rbbi s‑tẓallit n‑ayyub.

sidi rbbi irur‑d lh̬ir i‑ayyub

¹⁰ lliġ iẓẓulla ayyub f‑imddukkʷal‑ns, irar‑as‑d sidi rbbi lh̬ir lli‑sttin‑dars‑ikkan, izayd‑as sidi rbbi snat‑twal f‑mad‑yadlli‑iṭṭaf.

¹¹ aškin‑d dars kullu aytmas d‑istmas d‑willi‑t‑ssnnin ġayd izrin, ššn dids aġrum ġ‑tgmmi‑ns, ar‑dids‑allan ar‑ti‑tṣbbarn f‑kullu tiġufiwin lli‑d‑fllas‑izzugz sidi rbbi. izayd kud yan gisn ifk‑as yan‑uqarid d‑yat‑th̬urṣt n‑uwrġ.

¹² ibark sidi rbbi ġ‑uwssan ggʷranin n‑ayyub uggʷar n‑isizwur‑ns. ilin dars kkuẓ d‑mraw n‑walf (14 000) n‑ih̬f n‑uwlli, d‑sḍis n‑id‑walf (6000) n‑urɛm, d‑walf (1000) n‑tyuga n‑imugayn, d‑walf (1000) n‑uġyul.

¹³ ilin ula dars ssa n‑ifrh̬an d‑kraṭṭ‑tfrh̬in.

¹⁴ ig ism i‑tmzwarut ‹yamima›, ig i‑tis snat ism ‹qaṣiɛa›, ig i‑tis kraṭṭ ‹qarn‑haffuk›.

¹⁵ ur‑llint ġ‑tmazirt‑an kullutt kra n‑tɛyyalin fulkint uggʷar n‑istis n‑ayyub. ifk‑asnt babatsnt lwrt ġ‑gr aytmatsnt.

¹⁶ tigira n‑mayan iddr sul ayyub miyya d‑kkuẓ id‑mraw (140) n‑usggʷas, iẓr tarwa‑ns d‑tarwa n‑tarwa‑ns ar tis kkuẓṭ tasutin.

¹⁷ immt ilmma ayyub, imqqur ġ‑lɛmr išbɛ ussan.