ayyub 4 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

awal n‑alifaz

¹ isawl‑d alifaz gu‑tayman yini‑as:

² «is‑trit a‑tṣbrt i‑yan izɛmn ad‑ak‑yini yan‑wawal? is‑illa ma‑iẓḍarn a‑fllak‑iḥṣar ils‑ns?

³ ašku kiyi ad‑yadlli‑isslmadn mddn ggutnin, tssdust ifassn ḍɛfnin.

⁴ iwaliwn‑nk a‑d‑issnkarn wanna tut‑tbayḍḍrt, tzzgat ifaddn h̬wanin.

⁵ imma ġilad tjra gik, ur‑tẓḍart a‑tṣbrt. tlkm‑k‑id, ṭiyr‑ak.

⁶ is‑ur‑tdust f‑ssibt n‑ma‑ttuqqart rbbi? is‑ur‑dark rrja iggutn f‑ssibt n‑ma‑tzgat ġ‑uġaras iṣlaḥn?

⁷ «swangm ġ‑mayad. is‑jji‑itthlk yan iṣfan? is‑jji‑fnan willi nmnin?

⁸ maylli ẓriġ nkki, winna krznin lh̬ʷšant d‑winna zrɛnin lhul, ġayan ad‑mggrn.

⁹ tthlkn ntni s‑unfus n‑rbbi, ifnu‑tn s‑ssh̬ṭ lli‑d‑fllasn‑iṣuḍ.

¹⁰ han izm ar‑itġuwwat. ar‑ikkat izm s‑wawal iqjrn. imil rẓan uh̬ṣan i‑izmawn‑lli tjhhdnin.

¹¹ izm nna‑idusn, iġ‑as‑laḥ tagʷmrt ra‑immt, akutn kullu tarwa n‑tizmt.

¹² «ilkm‑iyi‑d yan‑wawal ġ‑tntla, ssḥssaġ s‑kra ar‑iyi‑itmšmuš ġ‑umẓẓuġ.

¹³ aškint‑iyi‑d‑twargiwin ġ‑iyḍ ġakud lliġ‑iyi‑n‑yiwi iṭs iẓẓayn,

¹⁴ ssġuwḍn‑iyi iswingimn, ar‑sri‑tkkat tawda, ar‑tndudiyn kullu ih̬ṣan‑inu.

¹⁵ han yat rruḥ tsli udm‑inu, tssbidd kullu inẓaḍn n‑ih̬f‑inu.

¹⁶ tqama ġin walaynni ur‑tt‑ukʷzġ mamnk a‑tga. ibidd kra ġ‑umnid‑inu ifssa. imikk sfldġ i‑yan‑wawal inna:

¹⁷ ‹bnadm lli‑itmmtatn, is‑iẓḍar a‑ig wad iṣlaḥn ġ‑iẓri n‑rbbi? is‑iẓḍar bnadm a‑ig wad iṣfan ġ‑umnid n‑walli‑t‑ih̬lqn?›

¹⁸ han rbbi ur‑a‑itamn ula ġ‑ih̬ddamn‑ns. ula lmlayka‑ns, ar‑gisn‑itukkʷad lɛib.

¹⁹ s‑uggʷar a‑s‑ra‑itukkʷad ġ‑winna mi‑tga ddat‑nsn zġ‑tallaġt, ig llsas‑nsn ġ‑ugdrur n‑wakal, ar‑tnġadn zund tatuni.