ayyub 38 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

isawl‑d sidi rbbi s‑ayyub

¹ isawl‑d sidi rbbi s‑ayyub ġakudan zġ‑tmziwit yini‑as:

² «ma‑iga ġwad issllasn aġaras, ar‑isawal f‑ma‑ur‑issin?

³ bkis tgt argaz f‑a‑k‑sqsaġ tsslmdt‑iyi.

⁴ maniġ tllit ġakud lliġ ssrṣiġ llsas n‑ddunit? sawl‑iyi fllas iġ‑tgit bu‑tfhimt.

⁵ ma‑iɛbbrn tiġzi ula tadrut? ml‑iyi‑t iġ‑tssnt. mad‑asn‑igan izikr issġl‑tn?

⁶ man tisiliw a‑f‑biddnt‑tġariwin‑ns? manwa isrsn aẓru n‑uwẓu‑ns

⁷ ġakud lliġ a‑kullu‑ttirirn itran n‑ṣbaḥ, ar‑tsbbaḥn lmlayka n‑rbbi s‑lfrḥ?

⁸ ma‑iqqnn amda s‑iflwan ġakud lliġ‑d‑ibbaqi zġ‑waḥlig n‑wakal?

⁹ nkkin ad‑as‑isslsan imdla, ssmuttlġ‑t s‑iḥzman n‑tillas.

¹⁰ gliġ‑t s‑iwtta, gġ‑as ifggign d‑iflwan,

¹¹ iniġ‑as: ‹ar ġid a‑ra‑di‑ttidut, d‑ur‑sar‑ti‑tssurft. d‑ġid a‑ġ‑rad‑tbiddadnt taḍangiwin‑nk tfššišnin.›

¹² «izd kiyi yan‑wass ġ‑uwssan‑nk a‑yumrn azal a‑d‑ifaw, tssmlt i‑tafukt manizġ a‑di‑taqlay,

¹³ f‑a‑tġwi nttat ġ‑tamiw n‑wakal, tssuss ayt‑lɛar zġ‑gis.

¹⁴ tifawt‑ns a‑itbddaln ṣṣurt n‑ddunit zund tallaġt da‑ittutn s‑ṭṭabɛ, ar‑tbannt ssifat‑ns zund inaḍan n‑tmlsit,

¹⁵ rwln zġ‑gis ayt‑lh̬ʷšant, irẓ‑asn‑ufus lli‑s‑a‑kkatn.

¹⁶ «is‑tkšmt s‑iġbula n‑umda, tftut ġ‑iġarasn n‑tdrut?

¹⁷ is‑ak‑rẓmn iflwan n‑tillas dranin, taggʷt‑n s‑udġar n‑willi mmutnin?

¹⁸ is‑tẓrit mnšk a‑s‑tusɛa ddunit? ini‑yyi f‑kullu mayan iġ‑ti‑tssnt.»