ayyub 33 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

awal n‑alihu f‑rbbi ula bnadm

¹² [izayd alihu yini i‑ayyub:] «han iwaliwn‑nk ur‑ġʷẓann. rad‑ak‑mlġ ma‑illan. ašku rbbi yugʷr bnadm bahra.

¹³ mah̬ aylliġ‑a‑srs‑ttaštkkat ar‑ttinit: ‹ur‑a‑d‑itjawab f‑isqsitn n‑bnadm›?

¹⁴ hati ar‑d‑isawal rbbi ġmk ula ġmk, walaynni bnadm ur‑ifhim mayan.

^15-16 s‑twargit ula tawaẓrit n‑iyḍ a‑s‑a‑irẓẓm imẓgan n‑yan. lliġ ign ġ‑tisi yawi‑t iṭs, ġakudan a‑t‑itẓi rbbi ar‑t‑issiwid,

¹⁷ f‑a‑t‑id‑issanf i‑uskkir yʷh̬šnn, iḥṣar‑t a‑ur‑issattuy ih̬f‑ns.

¹⁸ d‑ġmkan a‑s‑a‑d‑itkkis rruḥ n‑bnadm i‑ugʷḍi n‑lmut, ifukku tudrt‑ns zġ‑uwzzal inqqan.

¹⁹ «yan yaḍni ar‑t‑itẓi rbbi s‑ingaẓn ġ‑tisi‑ns, aḍnn ula ih̬ṣan‑ns,

²⁰ tḥaša tasa‑ns aġrum, ula adis‑ns ur‑sul‑a‑ittiri tirmt imimn.

²¹ ar‑as‑teṭṭar‑tfiyi‑ns ard‑stt‑laḥ, bann‑d ih̬ṣan‑ns lli‑dlnin.

²² takmur rruḥ‑ns s‑umḍḍal, tlkm tudrt‑ns ibrraḥn n‑lmut.

²³ walaynni iġ‑illa kra n‑lmalak izuyd ibidd ġ‑gras d‑rbbi, ig yan zġ‑walf n‑lmalak lli‑imalan i‑bnadm mad‑as‑iṣlaḥn,

²⁴ iḥnnu gis yini: ‹rẓm‑as a‑ur‑iggʷz s‑ugʷḍi n‑lmut, ašku ufiġ ma‑t‑id‑ifrrun.

²⁵ adj tifiyi‑ns a‑tjji, twrri tg zund mẓẓiy‑ns, twrri ula ddat‑ns tg zund ussan‑ns imzwura.›

²⁶ iẓẓall bnadm‑an i‑rbbi, irḍu fllas, iẓr udm n‑rbbi, yall awal‑ns ġakudan s‑lfrḥ, ašku irur‑t daġ a‑ig wad dars iṣlaḥn.

²⁷ ar‑itbrraḥ ġ‑lgddam n‑mddn ar‑ittini: ‹ha‑yyi jliġ zġ‑uġaras n‑rbbi, ssmuttlġ maylli inmn, walaynni ur‑iyi‑irur f‑ġmklli‑yyi‑igan.

²⁸ hati ifukka rruḥ‑inu a‑ur‑tgguz s‑ugʷḍi n‑lmut, ifk‑iyi tudrt ad‑daġ‑isfiwġ tifawt.›

²⁹ han ġmkan a‑iskar rbbi i‑bnadm. snat‑twal ar kraṭṭ,

³⁰ a‑itkkis tudrt‑ns i‑ugʷḍi n‑lmut, f‑a‑yisfiw tifawt n‑tudrt.»