ayyub 31 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

¹ [isawl‑d daġ ayyub yini:] «ha‑yyi skrġ lɛhd d‑walln‑inu. iġ‑n‑mnadġ ġ‑kra n‑tɛyyalt,

² man lh̬ir a‑rad‑iyi‑yili zġ‑dar rbbi n‑ignna? man lwrt a‑ra‑yyi‑d‑ifk‑umattuy lli‑iẓḍarn i‑kulši?

³ is‑urd tagat a‑d‑iqqann ayt‑lɛar, yili lhalak i‑willi skarnin ma‑yʷh̬šnn?

⁴ is‑ur‑a‑itgabal kullu tiġarasin‑inu, ar‑iyi‑itḥasab kraygatt asurf?

⁵ «iġ‑munġ d‑uġaras n‑tkrkas, nġd yuzzl‑uḍar‑inu s‑tkndawt,

⁶ adjat rbbi a‑yyi‑yuwzn s‑lmizan n‑lḥqq, f‑a‑iẓr is‑giġ wad iṣfan.

⁷ «iġ‑iffuġ‑uḍar‑inu zġ‑uġaras, nġd iḍfur‑uwl‑inu ġaylli tẓra ṭiṭṭ‑inu, nġd islġ kra indsn ġ‑ufus‑inu,

⁸ adjat wiyya ad‑ššn maylli krzġ, yakuf ula mad‑ẓẓiġ nkki.

⁹ «iġ‑iḍfur‑uwl‑inu kra n‑tmġart, nġd mdiġ‑tt ġ‑imi n‑tgmmi n‑wadjar‑inu,

¹⁰ adjat tamġart‑inu a‑tẓẓaḍ dar kra n‑yan yaḍni, knun‑in fllas wiyya.

¹¹ lɛar imqqurn a‑ra‑ig ġayan, ig lmɛṣiyt ma‑f‑a‑ikkat lḥukm.

¹² ig lɛafiyt ijddrn ar lfna, thlk aẓur n‑kullu lġllt‑inu.

¹³ «iġ‑nakrġ ah̬ddam‑inu nġd tah̬ddamt‑inu ġ‑ma‑igan winsn, tizi nna‑flla‑taštkkan,

¹⁴ ma‑rad‑iniġ ġakud nna‑flla‑ibidd rbbi? ma‑s‑ra‑ys‑jawbġ, iġ‑iyi‑fllas‑isqsa?

¹⁵ walli‑yyi‑ih̬lqn ġ‑udis n‑inna, is‑ur‑t‑ih̬lq ula nttan? is‑urd yan rbbi a‑yġ‑iskrn s‑sin?

¹⁶ «iġ‑ssrgsġ f‑umẓluḍ ma‑iḥtajja, nġd flġ alln n‑thjjalt ar‑brrint,

¹⁷ nġd ḥḍiġ aġrum i‑ih̬f‑inu, ur‑t‑bḍiġ d‑igigil.

¹⁸ hati zund babas a‑t‑rbbaġ, sul mẓẓiġ nkki, d‑ar‑tɛawanġ tanna iḍɛfn kullu ussan‑inu.

¹⁹ «iġ‑ẓriġ yan ġ‑usmmiḍ d‑ur‑dars ma‑s‑a‑itḥbu ddat‑ns, nġd yan iẓlḍn laḥ‑as timlsit,

²⁰ iġ‑ur‑iyi‑škirn ih̬ṣan‑ns, d‑iġ‑ur‑ti‑tssrġi taḍut n‑uwlli‑nu,

²¹ iġ‑ššiġ yan igan igigil, issanġ is‑ra‑t‑nruġ ġ‑lmḥkama,

²² adjat taġruṭṭ‑inu a‑tḍr zġ‑ddat‑inu, takuf‑tġʷma n‑ufus zġ‑tsga‑nu.

²³ ašku ha‑yyi ksuḍġ tagat n‑rbbi, wala ẓḍarġ a‑n‑biddġ ġ‑lgddam n‑lmajd‑ns issiwidn.

²⁴ «mra is‑ddiġ ar‑tɛnnaġ s‑uwrġ, iniġ i‑uwrġ iṣfan: ‹kiyi a‑ġ‑n‑rjiġ.›,

²⁵ nġd frḥġ s‑tugtt n‑wayda, ula lh̬ir lli‑skrġ s‑ifassn‑inu,

²⁶ nġd mnadġ‑n ġ‑tafukt issklulun, nġd ayyur issmrġan ġ‑twada‑ns,

²⁷ aylliġ‑t‑iḍfar‑uwl‑inu, ssudnġ afus‑inu dɛuġ srs.

²⁸ mra is‑ġḍrġ ula ġmkan ġ‑rbbi amattuy, ra‑ig lmɛṣiyt imqqurn ma‑f‑a‑ikkat lḥukm.

²⁹ «mra is‑frḥġ s‑ugʷri lli‑illan i‑unuwwaš‑inu, nġd rḍiġ s‑ššrr lli‑fllas‑izrin.

³⁰ walaynni ur‑udjiġ imi‑nu a‑t‑ih̬zu, ula dɛiġ i‑tudrt‑ns s‑nnɛlt.

³¹ «mra is‑nnan ayt‑uh̬iyyam‑inu: ‹illa ġid ma‑ur‑išbɛn tifiyi›.

³² walaynni ar‑bdda‑rẓẓmġ tiflwin i‑yan‑d‑imuddan, d‑ur‑jji‑flġ abrrani a‑ins ġ‑tsukt.

³³ «mra is‑ssntalġ ddnub‑inu zund wiyyaḍ, ḥḍuġ‑n lɛib‑inu ġ‑ugʷns n‑uwl,

³⁴ ašku ksuḍġ a‑yyi‑ḥgrn mddn, d‑ur‑ẓḍarġ i‑trggam n‑tagʷmatin‑inu, aylliġ fssaġ ur‑nniġ yat wala ffuġġ s‑mani.

³⁵ amar yufan yan iran a‑yyi‑isflid. «ha‑yyi ġilad rad‑ršmġ awal‑inu, adjat rbbi da‑iẓḍarn i‑kulši a‑yyi‑d‑ijawb. amar yufan ad‑dari amṣraḍ ityaran s‑ufus n‑walli‑yyi‑iṣrḍn

³⁶ s‑ṣṣaḥt ra‑t‑agʷlġ i‑tġʷraḍ‑inu, sslulliyġ‑t i‑ih̬f‑inu zund rrẓẓa.

³⁷ rarġ‑as lḥsab f‑kullu isurfn‑inu, akmurġ‑n srs s‑zzɛmt.

³⁸ «iġ‑sri‑issmummʷi‑wakal‑inu, d‑iḍrfan ar‑allan f‑ingratsn,

³⁹ d‑iġ‑ššiġ ṣṣabt bla friġ d‑išuwwaln, flġ imzdġn‑ns tġašan s‑laẓ,

⁴⁰ adjat‑t ad‑issmġay isnnann urd irdn, iġli‑d gis wazkkun urd ṭumẓin.» ġmkan ad‑kmmln iwaliwn n‑ayyub.