ayyub 3 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tʷgraẓ ayyub f‑tlalit‑ns

¹ tigira n‑ġayan irẓm ayyub imi‑ns, inɛl ass n‑tlalit‑ns,

² yini ayyub:

³ «yuf mra is‑ur‑illi‑wass lli‑ġ‑d‑lulġ, wala illa iḍ‑an‑ġ‑nnan ‹ittzuyd bnadm.›

⁴ mra is‑illas‑wass‑an, ur‑t‑iḥasb rbbi amattuy, wala tġli‑d‑fllas tifawt.

⁵ mra is‑t‑ḥḍant tillas d‑imula n‑lmut, ggʷzn‑d fllas imdla ẓẓaynin, idl‑t ma‑iḍlan.

⁶ mra is‑ġwint tillas dranin iḍ‑an, a‑ur‑sul‑yili ġ‑uwssan n‑usggʷas, ula ityawḥasab ġ‑gr‑iyrn lli‑zrinin.

⁷ mra is‑ur‑ilul yan ġ‑iḍ‑an, ula sfldn mddn i‑tʷġriyt n‑lfrḥ.

⁸ adjat willi itnɛaln ussan, ad‑nɛln ass‑an. adjat‑tn ad‑ssduyyn lquwwat n‑tdrut.

⁹ a‑ur‑isfiwn itran n‑zikk ṣbaḥ ġ‑iḍ‑an, ula tġli‑d fllas tafukt lli‑iẓuẓḍ, ula utn‑d gis iznzarn imzwura.

¹⁰ ašku ur‑n‑flla‑iqqin tiflut n‑uḥlig n‑inna, ula idl alln‑inu f‑tmmara.

¹¹ «aḥḥ‑inu, mah̬ aylliġ ur‑mmutġ ġ‑tizi n‑tlalit? mah̬ a‑ur‑ttuwfaġ ġakudan ġ‑d‑ffuġġ zġ‑waḥlig?

¹² mah̬ a‑yyi‑usin ifaddn, ar‑yyi‑ssngaynt tibbišin?

¹³ mra is‑mmutġ tizi‑an, lukun gnġ ġ‑lhna yawi‑yyi‑yiṭs,

¹⁴ sunfuġ ġ‑dar igldan d‑iriyasn n‑zman, dar willi bnanin igudar‑ad darnġ h̬ʷlanin,

¹⁵ dar inmġurn lli‑ṭṭafnin urġ, ɛmmrn tigʷmma‑nsn s‑nnʷqrt.

¹⁶ mra is‑giġ amsrug, ttḥḍuġ ġakudan zġ‑mddn. mra is‑giġ arraw ur‑iẓrin azal.

¹⁷ ġin a‑ġ‑iḥudda uduyy n‑ayt‑lɛar, d‑ġin a‑ġ‑ufan ayt‑tmmara ad‑sunfun.

¹⁸ ġin a‑ġ‑d‑munn ayt‑iskraf s‑sslamt, ur‑sul‑a‑sflidn i‑trggam n‑ingabaln.

¹⁹ imqqurn d‑imẓẓiyn, ġin a‑ġ‑gan yan, tyawfsayn kullu ismgan zġ‑ufus n‑id‑siditsn.

²⁰ mah̬ a‑ttfka tifawt i‑yan taġ‑tguḍi? mah̬ a‑ttfka tudrt i‑yan mi tsmmum tasa‑ns?

²¹ hati iẓuẓḍ lmut d‑nttat tagʷi‑t. ar‑fllas‑iqqaz uggʷar n‑lknz irgsn.

²² iġ‑yufa a‑ilkm amḍḍal, ifjjij ifrḥ bahra.

²³ mah̬ a‑ttfka tifawt i‑yan mi ur‑iban‑uġaras, igli‑t rbbi zġ‑kraygatt tasga?

²⁴ ha‑yyi ar‑šttaġ isgunfal urd aġrum, ngint‑zġ‑gigi‑tndriwin zund aman.

²⁵ ašku ġaylli ksuḍġ ayd‑iyi‑ijran. taġuft lli‑usiġ ayd‑ġ‑knukiġ.

²⁶ laḥ‑iyi lhna, laḥ dari sslamt, trwl zġ‑gigi rraḥt. ha‑uduyy ka‑d‑dari‑yuškan.»