ayyub 23 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

isawl ayyub f‑sidi rbbi

¹ ijawb ayyub ġakudan yini:

² «sul s‑ġassad ismmum‑usmammi‑inu, ar‑sul‑nddrġ ašku iẓẓay‑flla‑ufus‑ns.

³ amar yufan ad‑issanġ maniġ ra‑t‑afġ. amar yufan a‑n‑akmurġ s‑lɛrš‑ns,

⁴ ssġliġ aṣraḍ‑inu s‑lgddam‑ns, sawlġ‑as s‑iwaliwn n‑lmɛqul,

⁵ issanġ ma‑s‑ra‑yyi‑d‑ijawb, fhmġ ma‑ra‑yyi‑d‑yini.

⁶ is‑ra‑yiri a‑didi‑immaġ s‑lquwwa‑ns itjhhdn? uhu, ra‑isfld i‑wawal‑inu,

⁷ afġ dars nkki‑ad inmn a‑d‑dids‑mšaškaġ, irẓm‑iyi walli flla iḥkamn anurẓm idumn.

⁸ «ha‑yyi ddiġ s‑tsga n‑usġlay n‑tafukt, ur‑t‑in‑ufiġ. dduġ s‑tsga n‑umṭar‑ns, ur‑iyi‑n‑gis‑iban.

⁹ iġ‑iskr kra ġ‑tsgiw lli‑iwalan asmmiḍ, ur‑t‑ẓriġ. iġ‑illa ġ‑tsgiw lli‑iwalan tirġi, ur‑t‑in‑ukʷzġ.

¹⁰ imma ntta issn aġaras‑ad ġ‑a‑ttiduġ. tigira n‑ma‑yyi‑yurm, rad‑d‑ffuġġ zund urġ iṣfan.

¹¹ ašku ḍfurn iḍarn‑inu laturat n‑iḍarn‑ns. munġ bdda d‑uġaras‑ns, d‑ur‑jji‑zġ‑gis‑jliġ.

¹² rḍuġ s‑iwaliwn n‑imi‑ns uggʷar n‑taġamt‑inu ġ‑tirmt, d‑ur‑jji‑unfġ i‑luṣiyat n‑infurn‑ns.

¹³ ha ntta, ġmklli iga a‑iga, d‑ur‑illi ma‑iẓḍarn a‑t‑irar. d‑aynna iqṣad, ra‑t‑iskr.

¹⁴ ra‑ikmml ma‑gigi‑inuwwa, d‑nttan kigan a‑iqṣad a‑t‑iskr.

¹⁵ mayan a‑f‑ġuwḍġ ġ‑umnid‑ns. ġakud nna‑gis‑swingimġ, ar‑bahra‑tiksaḍġ.

¹⁶ rbbi issġufa ul‑inu. walli iẓḍarn i‑kulši, hati issiwd‑iyi.

¹⁷ walaynni tillas d‑imula ḍlanin lli‑dlnin udm‑inu, hatni ur‑iyi‑ssfssan.»