ayyub 2 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

laḥ‑as ula ṣṣaḥt‑ns

¹ ass yaḍni munn daġ lmlayka n‑rbbi a‑n‑ḥaḍrn ġ‑lgddam n‑sidi rbbi. iḥaḍr‑n ula šiṭan ġ‑gratsn ġ‑umnid n‑sidi rbbi.

² yini sidi rbbi i‑šiṭan: «mani‑di‑tkkit?» irar‑as‑d: «ġir ar‑tlulliyġ ġ‑wakal ar‑gis‑fttuġ.»

³ yini sidi rbbi i‑šiṭan: «is‑tlhit s‑uh̬ddam‑inu ayyub? ur‑illi yan ġ‑ddunit zund nttan. ig argaz ikmmln inm, ar‑tt‑itawi ġ‑rbbi‑ns, ar‑itanf i‑kullu ma‑yʷh̬šnn. wah̬h̬a‑yyi‑d‑fllas‑tssnkrt a‑itthlk bla sabab, izga bdda ġ‑uġaras‑ns ikmmln.»

⁴ irar šiṭan ġakudan i‑sidi rbbi yini‑as: «ilm s‑ilm. kullu ma illan dar bnadm, ra‑t‑ifk a‑ijjnjm rruḥ‑ns.

⁵ walaynni mdi‑n afus‑nk, tutt ih̬ṣan‑ns d‑tfiyi‑ns s‑k‑irgm f‑uwdm‑nk.»

⁶ yini daġ sidi rbbi i‑šiṭan: «hatin ġ‑ufus‑nk. abla rruḥ‑ns, a‑ur‑tti‑tlkmt.»

⁷ iffuġ šiṭan zġ‑dar sidi rbbi, yut ayyub s‑iḥbba šqanin zġ‑wallaġ n‑iḍarn‑ns ar aflla n‑ih̬f‑ns.

⁸ igawr ayyub ġ‑wammas n‑iġd, yasi‑d tazgwit ar‑srs‑ikkʷmz ddat‑ns.

⁹ tsawl‑srs‑tmġart‑ns tini‑as: «is‑sul‑tumẓt ġ‑uġaras‑nk ikmmln? rgm rbbi tmmtt.»

¹⁰ imma nttan irur‑as: «tsawlt kmmi ġmklli sawalnt tujhilin. izd a‑nqbl ma‑išwan zġ‑dar rbbi bla nqbl ma‑išqan?» kullu ġayan, sul ur‑isawl ayyub s‑kra iffuġn aġaras n‑rbbi.

kraḍ imddukkʷal n‑ayyub

¹¹ lliġ sfldn kraḍ imddukkʷal n‑ayyub f‑kullu tiġufiwin lli‑iqasa, aškin‑d ntni, kud yan zġ‑illiġ‑n‑illa. ismawn‑nsn alifaz gu‑tayman, d‑bildad gu‑šuḥ, d‑ṣufar gu‑naɛmat. skrn ntni f‑ad‑dars‑munn a‑ti‑tṣbbarn ar‑ssfjjijn f‑uwl‑ns.

¹² lliġ‑t‑in‑ẓran zġ‑tuggugt ur‑t‑ukʷzn. alln awal‑nsn, ar‑allan, bbin islhamn‑nsn, zuzzrn‑d agdrur f‑ih̬fawn‑nsn.

¹³ gawrn dids f‑wakal ssa n‑uwssan d‑ssa n‑waḍan. fssan ntni ur‑as‑nnin yat, ašku ẓran tugtt n‑tguḍi lli‑fllas‑illan.