ayyub 19 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

irur‑d ayyub i‑imddukkʷal‑ns

¹ ijawb ayyub ġakudan yini:

² «mnšk a‑rad‑sul‑tqdm tasa‑nu, ar‑iyi‑tssyagasm s‑iwaliwn.

³ mrawt‑twal ayd‑iyi‑trgmm. is‑ur‑tḥšimm a‑gigi‑takʷim?

⁴ mra is‑ffuġġ aġaras, nkki waḥdiyi a‑thmma‑tjli.

⁵ iġ‑tram a‑flla‑tssimġurm ih̬f‑nun tlumm‑iyi f‑tdallit‑inu,

⁶ issanayt izd rbbi a‑yyi‑issknukin, issmuttl‑iyi ġ‑ššbkt‑ns.

⁷ «ha‑yyi ar‑ssġuyyuġ iniġ: ‹taɛddiyt ayad› walaynni ur‑iyi‑d‑ijawb. ġrġ‑as a‑yyi‑iɛawn, imma lḥqq ur‑akkʷ‑iban.

⁸ iqqn flla aġaras a‑ur‑zriġ, issllas flla ula tiġarasin lli‑riġ.

⁹ ikks flla ššan lli‑liġ, issitti ula ttaj i‑ih̬f‑inu.

¹⁰ yut‑iyi zġ‑kraygatt tasga, yawi kullu ma‑dari‑illan, issukf rrja‑nu ġmklli takuf‑tṣġart.

¹¹ iznd lġaḍab‑ns flla, ig‑iyi d‑yan zġ‑inuwwašn‑ns.

¹² munn‑d flla ikabarn‑ns, sslulliyn i‑uh̬iyyam‑inu igudiyn n‑imiġ.

¹³ «issngara‑yyi‑d d‑aytma, agʷin‑iyi imddukkʷal‑inu.

¹⁴ fln‑iyi ayt‑dari, ttun‑iyi laḥbab‑inu.

¹⁵ gġ abrrani dar ayt‑takat‑inu ula dar‑tmqasatin n‑tgmmi‑nu, skrn zġ‑gigi zund aġrib.

¹⁶ ar‑aqraġ s‑umqasa‑inu, yagʷi a‑yyi‑issadmr, wah̬h̬a da‑t‑ssḥurmuġ s‑imi.

¹⁷ tamġart‑inu ur‑sul‑tḥmil unfus‑inu, tarwa n‑inna kurhan tuȷ̈̇ȷ̈̇uṭ‑inu.

¹⁸ ḥgrn‑iyi ula lḥšum mẓẓinin, ġakud nna‑nkrġ ar‑gigi‑rggmn.

¹⁹ hatni ḥašan‑iyi kullu lḥbab‑inu, wrrin flla willi dari ɛzzanin.

²⁰ ha ilm‑inu d‑tfiyi‑nu ġwin ġ‑ih̬ṣan‑inu, ur‑dari‑injim abla ilm n‑uh̬ṣan.

²¹ ḥnnwat, ḥnnwat zġ‑gigi, a‑imddukkʷal‑inu. ašku yut‑iyi‑d‑ufus n‑rbbi.

²² mah̬ a‑yyi‑ttzayadm taguḍi f‑tin rbbi? is‑ur‑ta‑tšbɛm zġ‑tfiyi‑nu?

²³ «amar yufan a‑tyaran iwaliwn‑inu. amar yufan a‑tzmmimn ġ‑yan‑warra.

²⁴ amar yufan a‑tyaran s‑lqlm n‑uwzzal ġ‑talluḥt n‑rrṣaṣ, nġd a‑tyawnqašn ġ‑uẓru ad‑bdda‑qaman.

²⁵ ašku ssnġ is‑bdda‑iddr walli ra‑yyi‑ifukku, ra‑ibidd f‑wakal n‑ddunit‑ad ġ‑isiggʷra.

²⁶ tigira n‑ma‑imda ilm‑inu, rad‑ẓrġ rbbi ġ‑ddat‑inu.

²⁷ nkki a‑ra‑t‑iẓr, urd wayya, mnadġ‑n gis s‑walln‑inu. ġmkan a‑iẓuẓḍ‑uwl ġ‑ugʷns‑inu.»