ayyub 15 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ṭaẓit n‑alifaz

¹ isawl‑d alifaz gu‑tayman ġakudan yini:

² «izd iswingimn h̬wanin a‑s‑a‑isawal yan igan aḥkim, iɛmmr‑uḥlig‑ns s‑waḍu irġan?

³ is‑ra‑itjaḥad s‑waqqur ibasln ula s‑iwaliwn ġ‑ur‑tlli lfaytt?

⁴ han da‑ttettut tiksaḍ n‑rbbi, tḥṣart ula ma‑t‑isiggiln.

⁵ ddnub‑nk ayd irẓmn imi‑nk, d‑tḥssaqt a‑issmussun ils‑nk.

⁶ han imi‑nk ayd fllak iḥkamn urd nkki, d‑infurn‑nk ayd fllak igan inagan.

⁷ «izd kiyi a‑d‑iluln amzwaru ġ‑bnadm? izd ur‑ta‑tyawskarn iwrar, a‑ttzuydt kiyi?

⁸ is‑ttin‑tkkit ġ‑umšawar n‑rbbi? is‑tġalt izd ġir kiyi a‑iṭṭafn taḥkimt?

⁹ is‑tssnt kra ur‑t‑nssin nkkʷni? is‑tfhmt kra fllanġ intln?

¹⁰ illa ġ‑gratnġ kra išibn d‑kra yuwssrn, hatni ugʷrn babak.

¹¹ is‑ur‑tqnɛt s‑iwaliwn rh̬anin lli‑s‑a‑k‑itṣbbar rbbi?

¹² is‑urd wasmmum n‑tasa‑nk ayd‑k‑ijllun? mah̬ a‑tkkat s‑walln?

¹³ mah̬ a‑tzzbzagt rruḥ‑nk f‑rbbi, aylliġ a‑di‑tffin wan iwaliwn‑an zġ‑imi‑nk?

¹⁴ is‑iẓḍar bnadm a‑ig wad iṣfan? is‑iẓḍar yan‑d‑iluln zġ‑tmġart a‑ig wad iṣlaḥn dar rbbi?

¹⁵ han ur‑a‑itamn rbbi ula ġ‑lmlayka‑ns imẓlayn. ignwan ula ntni ur‑ṣfin ġ‑iẓri‑ns.

¹⁶ s‑uggʷar a‑s‑ra‑itukkʷad ġ‑bnadm lli‑ijlh̬n iɛwwj ar‑issa lh̬ʷšant zund aman.»