ayyub 12 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

isawl‑d ayyub

¹ ijawb ayyub ġakudan yini:

² «tġalm izd kunni a‑ihiyyan ġ‑mddn. tġalm iġ‑kʷn‑laḥ, laḥ taḥkimt.

³ walaynni ur‑kkiġ ddawatun. tlla‑dari‑tfhimt ula nkki. ma‑ur‑issinn wan tiġawsiwin‑an?

⁴ ar‑gigi‑ḍṣṣan imddukkʷal‑inu, nkki lli‑yaqran i‑rbbi s‑iyi‑d‑ijawb. ar‑gigi‑ṭṭnaẓn, nkki da‑iṣlaḥn ṣfuġ.

⁵ imma yan dar ihnna lḥal, ar‑itḥgar taguḍi lli‑yutn yan mi inšg‑uḍar.

⁶ han ih̬iyyamn n‑iqṭṭaɛn a‑ġ‑illa lh̬ir. willi itmmaġn d‑rbbi a‑iqaman ġ‑laman, asin laṣnam‑nsn ġ‑ufus‑nsn.

⁷ «sqsa lbhaym, ra‑k‑sslmadnt. d‑igḍaḍ n‑ignwan, mln‑ak‑t‑id.

⁸ d‑imġyan n‑wakal, ra‑k‑sslmadn. d‑islman n‑umda, ɛlmn‑k srs.

⁹ kullu ġwin, is‑illa ġ‑gratsn ma‑ur‑issinn izd afus n‑sidi rbbi a‑tn‑iskrn?

¹⁰ ġ‑ufus‑ns a‑ġ‑tlla tudrt n‑kullu ma‑iddrn, ar‑yakka unfus i‑kullu ma‑igan bnadm.

¹¹ «is‑ur‑a‑tmiyyazn imzgan awal, ġmklli imḍḍi ils amššu?

¹² taḥkimt tga tin ifqqirn, tašk‑id‑tfhimt s‑tugtt n‑uwssan.

¹³ rbbi ad‑dar taḥkimt ula taẓḍḍart, izga ġ‑ulmmud ula tafhimt.

¹⁴ kra ih̬ʷla nttan, ur‑iẓḍar yan a‑t‑daġ‑ibnu. d‑wanna mi iqqn, ur‑illi ma‑rad‑as‑irẓẓm.

¹⁵ iġ‑ibbi inẓritn, ra‑yiqar‑wakal. iġ‑tn‑d‑yuzn, ar‑tssayakn f‑tmazirt.

¹⁶ nttan ad‑dar lquwwa ula taḥkimt iṣḥan. ġ‑ufus‑ns a‑ġ‑illa walli ijlan ula walli ijllun wiyya.

¹⁷ ar‑issmsar imšawarn bla yat, ar‑issnuful lḥukkʷam.

¹⁸ ar‑itkkis tanbaṭṭ i‑igldan, ibkis‑asn s‑twuri.

¹⁹ ar‑issmsar imsakmurn bla yat, ar‑d‑issṭar ih̬fawn mqqurnin.

²⁰ ar‑itqqn ils i‑willi dar iwaliwn ɛdlnin, irar imġarn a‑ur‑sul‑tmiyyazn yat.

²¹ ar‑itffi lɛar f‑iriyasn, ikks imqlad i‑inmmaġn.

²² ar‑d‑issbayyan maylli‑n‑intln ġ‑tdrut iḍlan, yisfiw i‑ma‑irgsn ġ‑tillas n‑lmut.

²³ ar‑issusɛu timizar, ar‑tnt‑ithlak. ar‑issimġur iqbiln, ar‑tn‑issitti.

²⁴ ar‑itkkis lɛaql i‑inmġurn n‑ddunit, irar‑tn ar‑tlulliyn ġ‑lh̬la ih̬wan.

²⁵ irar‑tn ar‑tḥndllun zund iskayriyn, ar‑ssdrfašn ġ‑tillas bla tifawt.»