ayyub 11 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

awal n‑ṣufar

¹ isawl‑d ṣufar gu‑naɛmat ġakudan yini:

² «is‑ur‑illi ma‑itraran f‑kullu iwaliwn‑an h̬wanin? is‑ra‑nadj bu‑taqqurt a‑iġal is‑yʷġẓan?

³ is‑izri a‑tssfssat mddn s‑isfurrugn‑nk? is‑ur‑ra‑k‑issḥššam yan f‑ṭṭnẓ‑nk?

⁴ ha kiyi ar‑ttdɛut tinit: ‹iṣḥa mayd ttiniġ, ṣfuġ ġ‑iẓri n‑rbbi.›

⁵ amar yufan a‑d‑isawl rbbi, irẓm‑d fllak infurn‑ns,

⁶ iml‑ak taḥkimt lli‑intln f‑bnadm, f‑a‑tissant ur‑a‑yk‑d‑itrara rbbi ġunšk lli‑sthllan ddnub‑nk.

⁷ is‑tẓḍart a‑di‑tssbayynt tiġawsiwin ntlnin n‑rbbi? is‑tufit a‑tlkmt iwtta n‑walli iẓḍarn i‑kulši?

⁸ han attuyn f‑ignwan. ma‑rad‑asn‑tskrt kiyi? drun f‑udġar n‑willi mmutnin. ma‑fllasn‑tssnt kiyi?

⁹ ġzzifn f‑wakal n‑ddunit, usɛun f‑waman n‑umda.

¹⁰ iġ‑ira rbbi a‑yanf i‑yan, nġd a‑t‑yamẓ, nġd a‑t‑issmun d‑wiyyaḍ, ma‑ra‑t‑iḥṣar?

¹¹ han issn id‑bu‑ijrman, ar‑itmnad iskkirn ʷh̬šnnin. is‑ur‑ra‑fllasn‑yut lḥsab?

¹² imma bnadm, mra is‑iẓḍar‑uḥšmi a‑d‑ilal zġ‑tġyult n‑tagant, lukun iẓḍar‑unafal a‑iwrri ig bu‑tfhimt.

¹³ «iġ‑tfkit ul‑nk i‑rbbi, tmdit‑n srs ifassn‑nk,

¹⁴ iġ‑tluḥt lh̬ʷšant nna‑tusit ġ‑ufus‑nk, d‑iġ‑ur‑tudjit lbaḍl a‑izdġ ġ‑uh̬iyyam‑nk,

¹⁵ s‑ṣṣaḥt ra‑tallt ih̬f‑nk bla tḥšmt, tbiddt ġ‑laman, ur‑ra‑tiksaḍt yat.

¹⁶ ra‑tettut kullu tiguḍiwin‑nk, gnt dark zund aman iġ‑zrin.

¹⁷ ra‑tsufu tudrt‑nk uggʷar n‑azal, gn ula imula‑ns zund tawaġla n‑tafukt.

¹⁸ rad‑bdda‑thnnut ašku illa dark rrja iṣḥan, tmnadt ġ‑kraygatt tasga tsunfut ġ‑laman.

¹⁹ ra‑tgnt d‑ur‑ra‑yili ma‑k‑issiwidn, igatn willi isiggiln a‑k‑rḍun.

²⁰ imma willi ʷh̬šnnin, han rad‑llasnt‑walln‑nsn, ur‑rad‑issann manis a‑rggʷln, d‑ur‑sul‑ra‑n‑rjun ġ‑yat, abla tunfust‑nsn iggʷran.