ayyub 1 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ayyub d‑tarwa‑ns

¹ ikka‑tt‑in ġ‑tmazirt n‑ɛuṣ yan‑urgaz ism‑ns ayyub. iga nttan wad iṣlaḥn inm, yawi‑tt bdda ġ‑rbbi, yanf i‑kullu ma‑yʷh̬šnn.

² luln dars ssa n‑ifrh̬an d‑kraṭṭ‑tfrh̬in.

³ ilin dars ssa n‑id‑walf (7000) n‑ih̬f n‑uwlli, d‑kraḍ id‑walf (3000) n‑urɛm, d‑smmust id‑miyya (500) n‑tyuga n‑imugayn, d‑smmus id‑miyya (500) n‑uġyul, igatn bahra dars imqasan. argaz‑an yugʷr kullu ayt‑tmizar ġ‑tsgiw n‑usġlay n‑tafukt.

⁴ myurn tarwa‑ns ad‑skarn imnsi imqqurn ġ‑tgʷmma n‑ingratsn kud yan s‑wass‑ns, ar‑taznn ar‑d‑aqran i‑kraṭṭ istmatsn ar‑didsn‑šttant ar‑ssant.

⁵ ġakud nna‑kmmln‑uwssan n‑imnsi, ar‑srsn‑itazn ayyub baš a‑tn‑issġus. ar‑d‑inkkr zikk ṣbaḥ a‑n‑issakmur i‑rbbi tiġrṣi ijdrn f‑kraygatt yan gisn. ašku ar‑ittini: «ur‑ssinġ is‑jlan tarwa‑inu, rgmn rbbi ġ‑uwl‑nsn.» ġmkan a‑iskar ayyub kullu ussan‑ns.

šiṭan inuwwa a‑yarm ayyub

⁶ ha yan‑wass munn‑in lmlayka n‑rbbi a‑n‑ḥaḍrn ġ‑lgddam n‑sidi rbbi. yili ġ‑gratsn šiṭan ula nttan.

⁷ yini sidi rbbi i‑šiṭan: «mani‑di‑tkkit?» irar‑d šiṭan i‑sidi rbbi: «ġir ar‑tlulliyġ ġ‑wakal ar‑gis‑fttuġ.»

⁸ yini sidi rbbi i‑šiṭan: «is‑tlhit s‑uh̬ddam‑inu ayyub? ur‑illi yan ġ‑ddunit zund nttan. ig argaz ikmmln inm, ar‑tt‑itawi ġ‑rbbi‑ns, ar‑itanf i‑kullu ma‑yʷh̬šnn.»

⁹ irar‑d šiṭan ġakudan i‑sidi rbbi yini: «izd bla lfaytt a‑s‑a‑stt‑itawi ayyub ġ‑rbbi‑ns?

¹⁰ is‑ur‑as‑tsutlt ifrig i‑ih̬f‑ns d‑tgmmi‑ns d‑kullu ma‑igan wins zġ‑kraygatt tasga, tbarkt ġ‑iskkirn n‑ifassn‑ns, tssigtt ula lksibt‑ns f‑wakal?

¹¹ walaynni mdi‑n afus‑nk, tutt kullu ma‑dars‑illan, s‑k‑irgm f‑uwdm‑nk.»

¹² yini ilmma sidi rbbi i‑šiṭan: «kullu ma‑dars‑illan, hatin ġ‑ufus‑nk. abla nttan s‑ih̬f‑ns, a‑ur‑n‑srs‑tmdit afus‑nk.» iffuġ šiṭan ġakudan zġ‑dar sidi rbbi.

laḥ tarwa‑ns ula ayda‑ns

¹³ izri ma‑izrin, yan‑wass munn‑in tarwa n‑ayyub d‑istis ġ‑tgmmi n‑gʷmatsn amqqur, ar‑šttan ar‑ssan aman n‑waḍil iktin.

¹⁴ imma ayyub, yuška‑d dars yan‑urqqas yini‑as: «lliġ a‑kkrzn izgarn frdn iġʷyal ġ‑tama‑nsn,

¹⁵ han ayt‑saba ukʷin fllasn awin‑tn, nġn imqasan s‑uwzzal, d‑nkki waḥduyy a‑injmn ad‑ak‑t‑iniġ.»

¹⁶ ar‑sul‑isawal s‑d‑yuška yan yaḍni yini‑as: «han lɛafiyt n‑rbbi tgguz‑d zġ‑ignwan tjdr ulli d‑imqasan tšš‑tn kullu, d‑nkki waḥduyy a‑injmn ad‑ak‑t‑iniġ.»

¹⁷ ar‑sul‑isawal nttan s‑d‑yuška yan yaḍni yini‑as: «han ayt‑kaldan munn‑d s‑kraṭṭ‑trubba, akʷin‑d f‑irɛman awin‑tn, nġn imqasan s‑uwzzal, d‑nkki waḥduyy a‑injmn ad‑ak‑t‑iniġ.»

¹⁸ ar‑sul‑isawal nttan s‑d‑yuška yan yaḍni yini‑as: «han tarwa‑nk d‑istik ar‑šttan ar‑ssan aman n‑waḍil iktin ġ‑tgmmi n‑gʷmatsn amqqur,

¹⁹ s‑hay‑aḍu itjhhdn ikka‑d lh̬la, yut kkuẓṭ‑tġmrin n‑tgmmi, tḍr‑d fllasn tnġ‑tn, d‑nkki waḥduyy a‑injmn ad‑ak‑t‑iniġ.»

²⁰ inkr ayyub ġakudan, ibbi aslham‑ns, issmakkrḍ azzar‑ns, iknu ar akal isjd,

²¹ yini: «bla yat ad‑d‑ffuġġ zġ‑waḥlig n‑inna, hati bla yat a‑rad‑wrriġ. sidi rbbi a‑ifkan, d‑nttan a‑yiwin. ambarki a‑iga ism n‑sidi rbbi.»

²² kullu ġayan, ur‑iffuġ ayyub aġaras n‑rbbi, ula iga rbbi d‑wad iskrn kra yʷh̬šnn.