ayt‑lawi 4 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tinbaḍin n‑usakmur f‑tjli

¹ yini sidi rbbi i‑musa:

² «sawl s‑ayt‑israyil tinit‑asn: ‹iġ‑ijla yan bla inuwwa, iskr kra ġ‑aylli‑f‑kʷn‑umrġ a‑ur‑ti‑tskrm, ha ma‑fllas‑illan a‑t‑iskr.

³ iġd amsakmur ihiyyan a‑ijlan, yawi‑d lɛqubit f‑kullu mddn‑ns, hati illa fllas a‑iskr yan‑umugay ġ‑ur‑illi kra n‑lɛib, issakmur‑t‑id i‑rbbi da‑illan a‑ig ‹asakmur f‑tjli›.

⁴ ra‑d‑yawi amugay‑an s‑imi n‑uh̬iyyam n‑umnaggar, ig afus‑ns f‑ih̬f n‑umugay, iġrṣ‑as ġ‑umnid n‑rbbi da‑illan.

⁵ yasi‑d‑umsakmur kra ġ‑idammn n‑umugay, išškšm‑tn s‑uh̬iyyam n‑umnaggar.

⁶ ar‑itssayk aḍaḍ‑ns ġ‑idammn‑an, ar‑itrušš ssa n‑twal ġ‑umnid n‑rbbi da‑illan s‑idammn‑an ġ‑lgddam n‑lh̬amiya n‑tḥanut tamẓlayt.

⁷ ig‑n‑ilmma‑umsakmur kra ġ‑idammn‑an f‑waskawn n‑ṭṭabla n‑lbh̬ur imimn ġ‑umnid n‑rbbi da‑illan ġ‑uh̬iyyam n‑umnaggar. iffi‑n ilmma aynna‑d‑iqaman ġ‑idammn n‑umugay ġ‑ddu tisi n‑tġrṣiw jdrnin lli‑illan ġ‑dar imi n‑uh̬iyyam n‑umnaggar.

⁸ izayd ġakudan ikks kullu tadunt i‑umugay lli‑igan ‹asakmur f‑tjli›, ikks ula tadunt lli‑isutln i‑wadan,

⁹ ikks‑d ula snat‑tgẓẓal d‑tadunt lli‑fllasnt‑illan, ikks ula talli illan ġ‑tama‑nsnt d‑uḍaḍ n‑tasa.

¹⁰ ra‑ikks kullu tadunt‑an ġmklli bdda ttyawkkas i‑umugay n‑‹twafka n‑sslamt›, ijdr‑tt‑umsakmur f‑tisi n‑tġrṣiw jdrnin.

¹¹ imma ilm n‑umugay d‑tfiyi‑ns kullutt, d‑ih̬f‑ns d‑ifnza‑ns d‑wadan‑ns d‑umazir‑ns,

¹² ra‑tn‑kullu‑yasi s‑brra n‑usras, s‑mani iġusn lli‑ġ‑a‑n‑ttffim iġd, ijdr kullu ma‑iqaman ġ‑umugay f‑ikššuḍn s‑lɛafiyt. ġmkan a‑s‑rad‑kullu‑ityawjdar ġ‑umdduz n‑iġd.› »