ayt‑lawi 19 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

luṣiyat f‑ma‑iġusn ula ma‑indsn

¹ isawl‑d sidi rbbi s‑musa yini‑as:

² «sawl s‑tamunt n‑ayt‑israyil kullutt tinit‑asn: ‹ġusat, ašku nkki‑ad igan rbbi‑nun da‑bdda‑illan, giġ wad iġusn.

³ illa f‑kraygatt yan giwn a‑stt‑itawi ġ‑innas d‑babas, ar‑bdda‑iẓlay ussan‑inu n‑usunfu. ha‑yyi giġ wad bdda illan gġ rbbi‑nun.

⁴ a‑ur‑tgrawlm s‑laṣnam, ula tɛdlm i‑ih̬f‑nun id‑rbbi zġ‑maylli ifssin. ha‑yyi giġ rbbi da‑bdda‑illan gġ rbbi‑nun.

⁵ « ‹iġ‑tram a‑di‑tssakmurm tiġrṣi n‑sslamt s‑rbbi da‑illan, ssakmurat‑stt‑id ġmkad baš a‑tamẓm rrḍa.

⁶ iššayt‑stt ass nna‑ys‑tġrṣm nġd azkka‑ns, walaynni aynna‑ywn‑iqaman ġ‑wis kraḍ‑uwssan, tjdrm‑tt s‑lɛafiyt.

⁷ iġ‑ttyawšša wis kraḍ‑uwssan, han tajlh̬it a‑tga, ur‑gis rrḍa.

⁸ wanna‑stt‑iššan, ra‑yasi ddnub‑ns, ašku nttan a‑indsn maylli ityawẓlayn i‑rbbi da‑illan. zund ġwan ra‑yakuf zġ‑gr mddn‑ns.

⁹ « ‹iġ‑a‑tmggrm ṣṣabt n‑wakal‑nun, ad‑ur‑tmggrm ar tamiw n‑igr, ula da‑ttgrrum aynna iḍrn i‑išuwwaln.

¹⁰ ad‑ur‑ttkksm kullu lġllt zġ‑igr‑nun n‑waḍil, ula da‑ttgrrum aynna‑yawn‑iḍrn. adjat‑t i‑imẓlaḍ d‑iġribn. ha‑yyi giġ rbbi da‑bdda‑illan gġ rbbi‑nun.

¹¹ « ‹a‑ur‑takʷrm. a‑ur‑tġʷššum. a‑ur‑tsskarksm f‑ingratun.

¹² a‑ur‑tggallm s‑ism‑inu f‑lbaḍl, tndsm srs ism n‑rbbi‑nun. nkkin a‑igan wad bdda illan.

¹³ « ‹a‑ur‑ttɛddat f‑wadjar‑nk ula tkkist‑as ma‑igan wins. a‑ur‑dark‑nsnt‑tġrad n‑uh̬ddam‑nk ar ṣbaḥ.

¹⁴ a‑ur‑trgmt aḍrḍur ula tskrt tabayḍḍrt i‑ubukaḍ, walaynni uqqr bdda rbbi‑nk. ha‑yyi giġ wad bdda illan.

¹⁵ « ‹a‑ur‑tskrt s‑ḍḍulm ġ‑lmḥkama. a‑ur‑ki‑tjllu lḥnant f‑umẓluḍ ula tidukkʷla n‑unmġur, walaynni ḥkam bdda s‑lḥqq f‑wadjarn‑nk.

¹⁶ a‑ur‑ttlulliyt ar‑tskart tanuwwašt ġ‑gr mddn‑nk. a‑ur‑taštkkat s‑wadjar‑nk f‑kra‑f‑isthlla lmut. ha‑yyi giġ wad bdda illan.

¹⁷ « ‹a‑ur‑tkrhut gʷmak ġ‑uwl‑nk, walaynni sawal s‑wadjar‑nk s‑lmɛqul, a‑ur‑imil ityafa gik lɛib f‑ssibt‑ns.

¹⁸ a‑ur‑tasit lḥsift f‑uqbil‑nk ula trurt‑asn f‑mad‑ak‑skrn, walaynni a‑ttirit adjar‑nk zund ih̬f‑nk. ha‑yyi giġ wad bdda illan.› »