ayt‑lawi 16 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

aġaḍ f‑tjli n‑ayt‑israyil

¹ isawl‑d sidi rbbi s‑musa tigira n‑lmut n‑sin tarwa n‑harun lli‑n‑akmurnin s‑umnid n‑sidi rbbi mmtn. yini‑as:

² «ini i‑gʷmak harun a‑ur‑d‑ikšm kraygatt luqt s‑tḥanut ityawqdasn ġ‑ugʷns n‑lh̬amiya, ġ‑dar‑waddal n‑rrḥmt lli‑illan f‑ṣṣnduq n‑lɛhd, a‑ur‑imil immt. ašku rad‑banġ ġ‑umdlu f‑uflla n‑waddal n‑rrḥmt.

³ walaynni ġmkad a‑s‑illa f‑harun a‑d‑ikšm s‑tḥanut ityawqdasn. a‑d‑yawi yan‑umugay a‑ig asakmur f‑tjli, d‑yan izimmr a‑ig tiġrṣi ijdrn.

⁴ ad‑zwar‑isird ddat‑ns s‑waman, ils ilmma aqššab amẓlay igan win lkttan, ils ssrwal n‑lkttan, ibkis s‑taggʷst n‑lkttan, ils rrẓẓa n‑lkttan. h̬tin a‑igan timlsa timẓlay.

⁵ yamẓ‑d ilmma sin‑waġaḍn iwtman zġ‑dar tamunt n‑ayt‑israyil ad‑gn asakmur f‑tjli, d‑yan izimmr a‑ig tiġrṣi ijdrn.

⁶ «ra‑n‑issakmur harun amugay‑an f‑lɛib nna‑gis‑illan, a‑ifukku ih̬f‑ns d‑ayt‑dars.

⁷ yawi‑d ilmma sin‑waġaḍn, issbidd‑tn ġ‑umnid n‑rbbi da‑illan ġ‑dar imi n‑uh̬iyyam n‑umnaggar.

⁸ izayd harun ġakudan igr‑d fllasn aṣġar. a‑ig yan gisn win rbbi da‑illan, ig wayya win ‹ɛzazl› [tga lmɛna‑ns ‹tawaksa›].

⁹ aġaḍ lli‑d‑yaġ‑uṣġar n‑rbbi da‑illan, rad‑as‑iġrṣ harun a‑ig asakmur f‑tjli.

¹⁰ imma aġaḍ lli‑d‑yaġ‑uṣġar n‑‹ɛzazl›, ra‑t‑issbidd sul iddr ġ‑umnid n‑rbbi da‑illan a‑kʷn‑srs‑ifukku. yazn‑t ilmma s‑lh̬la a‑fllawn‑ikks lɛib‑nun.

¹¹ «ġmkad a‑s‑ra‑n‑issakmur harun amugay‑an f‑lɛib nna‑gis‑illan, a‑ifukku ih̬f‑ns d‑ayt‑dars. ra‑iġrṣ i‑umugay‑an igan asakmur f‑tjli‑ns,

¹² yasi‑d ilmma taṭṭast iɛmmrn s‑trgin rġanin zġ‑ṭṭabla n‑umnid n‑rbbi da‑illan, yasi‑d ula sin‑uwrawn n‑lbh̬ur mimnin nġdnin, išškšm‑tn s‑ugʷns n‑lh̬amiya.

¹³ igr‑n lbh̬ur f‑trgin ġ‑umnid n‑rbbi da‑illan, ard idl‑wawwu n‑lbh̬ur addal n‑rrḥmt lli‑illan f‑ṣṣnduq n‑lɛhd, a‑ur‑imil immt nttan.

¹⁴ yasi‑d ilmma kra ġ‑idammn‑an n‑umugay, ar‑n‑srs‑itrušš s‑uḍaḍ‑ns iggi n‑waddal n‑rrḥmt, izayd ar‑n‑srs‑itrušš izdar n‑waddal n‑rrḥmt s‑uḍaḍ‑ns ssa n‑twal.

¹⁵ «iġrṣ ilmma i‑waġaḍ f‑lɛib nna‑illan ġ‑mddn. yasi‑d idammn n‑waġaḍ s‑ugʷns n‑lh̬amiya, irušš srsn iggi n‑waddal n‑rrḥmt ula izdar‑ns, ġmklli iskr s‑idammn n‑umugay n‑tjli.

¹⁶ ġmkan a‑s‑ra‑ifukku taḥanut tamẓlayt zġ‑nndast n‑ayt‑israyil ula kullu tijli lli‑s‑jlan ntni. izayd iskr ġmkan ula i‑uh̬iyyam n‑umnaggar lli‑bdda‑illan ġ‑wammas n‑nndast‑nsn.

¹⁷ «han a‑ur‑yili yan ġ‑uh̬iyyam n‑umnaggar, zġ‑tizi lli‑ġ‑ra‑ikšm harun s‑tḥanut ityawqdasn ard‑d‑zġ‑gis‑iffuġ. ašku ra‑gis‑ifukku ih̬f‑ns d‑ayt‑dars d‑kullu ayt‑israyil.

¹⁸ iffuġ‑d ilmma s‑dar ṭṭabla n‑umnid n‑rbbi da‑illan a‑stt‑ifukku ula nttat, yasi‑d kra zġ‑idammn n‑umugay d‑win‑waġaḍ ig‑tn i‑waskawn n‑ṭṭabla ġ‑kraygatt tasga.

¹⁹ irušš‑tt s‑idammn‑an ssa n‑twal s‑uḍaḍ‑ns, a‑stt‑issġus iẓli‑tt zġ‑nndast n‑ayt‑israyil.

²⁰ «ġmkan a‑s‑ra‑ifukku harun taḥanut ityawqdasn d‑uh̬iyyam n‑umnaggar ula ṭṭabla. yawi‑d ilmma aġaḍ lli‑iqaman.

²¹ isrs ifassn‑ns f‑ih̬f n‑waġaḍ, iqrru fllas s‑kullu lh̬ʷšanat lli‑skrn ayt‑israyil ula lɛib‑nsn d‑tjli‑nsn, isrs‑tn ġmkan f‑ih̬f n‑waġaḍ, iṭṭay‑t ġakudan s‑lh̬la f‑ufus n‑kra n‑urgaz yujadn i‑uskkir‑an.

²² aġaḍ‑an a‑yusin kullu lh̬ʷšanat‑nsn s‑mani yaggugn. rẓmn i‑waġaḍ‑an ġ‑lh̬la.»