ayt‑lawi 11 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tifiyi lli‑izrin i‑umššu

¹ isawl‑d sidi rbbi s‑musa d‑harun yini‑asn:

² «sawlat s‑ayt‑israyil tinim‑asn: ‹ha ma‑ra‑izri a‑ti‑tšttam ġ‑gr lmh̬luqat lli‑llanin f‑wakal.

³ izri a‑tšttam kullu ma‑mi‑bḍan ifnza ar‑iglli ilfẓẓ.

⁴ walaynni ma‑mi‑bḍan ifnza ur‑a‑iglli ilfẓẓ, ur‑izri a‑ti‑tšttam. zund arɛm, wah̬h̬a da‑iglli ilfẓẓ, ur‑dars ifnza bḍanin, hati inds‑awn.

⁵ ġmkan d‑walqniw n‑ijarifn, wah̬h̬a da‑iglli ilfẓẓ, ur‑dars ifnza bḍanin, hati inds‑awn.

⁶ ula awtil, wah̬h̬a da‑iglli ilfẓẓ, ur‑dars ifnza bḍanin, hati inds‑awn.

⁷ ula ilf, wah̬h̬a dars ifnza bḍanin, ur‑a‑iglli ilfẓẓ nttan, hati inds‑awn.

⁸ a‑ur‑tšttam tifiyi n‑lmh̬luqat‑an ula tggrm i‑tfiyi‑nsn, hatni ndsn‑awn.› »