astir 8 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

lamr n‑ugllid f‑uwdayn

¹ ġassan a‑ifka‑ugllid aḥašwiruš i‑tgllidt astir tigmmi n‑haman lli‑igan anuwwaš n‑uwdayn. ikšm murdah̬ay s‑lgddam n‑ugllid, ašku tnna astir i‑ugllid mad‑as‑iga.

² ildi‑d‑ugllid tah̬urṣt lli‑ikkis i‑haman, ifk‑tt i‑murdah̬ay. tfk ula astir tigmmi n‑haman ġ‑ufus n‑murdah̬ay.

³ tsawl daġ astir ġ‑umnid n‑ugllid, tknu ġ‑dar iḍarn‑ns, ar‑ti‑tssḥurmu s‑imṭṭawn a‑issanf ḍḍrurt lli‑s‑inuwwa haman yus n‑agag a‑srs‑ihlk udayn.

⁴ imdi‑d‑ugllid akuray n‑uwrġ i‑astir, tnkr tbidd ġ‑umnid n‑ugllid,

⁵ tini‑as: «iġ‑ak‑iga lh̬aṭr ay‑agllid, d‑iġ‑ufiġ rrḍa ġ‑iẓri‑nk, d‑iġ‑ak‑ibayyn is‑iga lḥqq, d‑iġ‑sul‑dark‑ɛzzaġ, a‑tarat yan lamr ma‑isfaḍn tibratin lli‑yura haman yus n‑hammadata n‑ayt‑agag, iqṣad srsnt a‑ifnu udayn lli‑illan ġ‑kullu timizar‑nk ay‑agllid.

⁶ ašku mamnk a‑rad‑iẓḍarġ a‑tmnadġ lhalak n‑mddn‑inu? mamnk a‑rad‑iḥmalġ a‑n‑aggʷġ s‑lfna n‑tagʷmat‑inu?»

⁷ isawl‑d‑ugllid aḥašwiruš ġakudan i‑tgllidt astir d‑uwday murdah̬ay yini: «ha tigmmi n‑haman, fkiġ‑tt i‑astir, d‑nttan ityagal f‑usatur, ašku imdi‑n afus‑ns a‑yut udayn.

⁸ walaynni lamr nna‑ityaran s‑ism n‑ugllid ittršm s‑th̬urṣt n‑ugllid, ur‑iẓḍar a‑ifiḍ. zaydat ġilad taram yan lamr yaḍni mknna tram ġ‑ljiht n‑uwdayn s‑ism n‑ugllid, tršmm‑t s‑th̬urṣt‑inu.»

⁹ ġrn‑d ġakudan i‑iktatbin n‑ugllid. ig lḥal ass wis sin id‑mraw d‑kraḍ (23) ġ‑wayyur wis kraḍ lli‑mi‑ttinin ‹siwan›. aran kullu ma‑f‑tn‑yuṣṣa murdah̬ay ġ‑ljiht n‑uwdayn f‑a‑t‑aznn i‑lḥukkam d‑inmġurn d‑iriyasn ġ‑kullu timizar n‑tgldit, zġ‑wakal n‑lhnd ar akal n‑ḥabaš. miyya d‑snat id‑mrawt d‑ssa (127) n‑tmazirt a‑mi‑uran, kraygatt tamazirt s‑tirra‑ns, d‑kraygatt aqbil s‑iwaliwn‑ns, aran ula i‑uwdayn s‑tirra‑nsn d‑iwaliwn‑nsn.

¹⁰ yara murdah̬ay tibratin‑an s‑ism n‑ugllid aḥašwiruš, iršm‑tnt s‑th̬urṣt n‑ugllid, yazn‑tnt f‑ufus n‑imnayn f‑iysan fssusnin lli‑iluln ġ‑rrwa n‑ugllid, tyawẓlayn i‑twuri n‑ugllid.

¹¹ iɛlm srsnt is‑yudja‑ugllid udayn ġ‑kraygatt tamdint ad‑munn mmaġn f‑tudrt‑nsn. yadj‑tn ad‑hlkn kra igan ayt‑tmazirt nġd ayt‑uqbil nna‑fllasn‑yukʷin s‑imqlad, nġn‑tn fnun‑tn ntni d‑iḥšmiyn‑nsn d‑tmġarin‑nsn, kksn‑asn ula ayda‑nsn,

¹² ġ‑kullu timizar n‑ugllid aḥašwiruš, ġ‑yan‑wass, a‑t‑igan d‑wass wis kraḍ d‑mraw (13) ġ‑wayyur wis sin d‑mraw (12) lli‑mi‑ttinin ‹adar›.

¹³ yuṣṣa‑tn ad‑ɛlmn s‑lamr n‑warra‑yan ġ‑kraygatt tamazirt ula ġ‑dar kraygatt aqbil baš ad‑ḥiyyln‑uwdayn i‑wass‑an f‑ad‑amẓn lḥqq ġ‑inuwwašn‑nsn.

¹⁴ ffuġn imazzaln ḥarrun f‑iysan fssusnin lli‑ityawẓlayn i‑twuri n‑ugllid, ar‑tazzaln s‑wawal n‑ugllid. ar‑tbrraḥn s‑lamr‑an ula ġ‑tmdint idusn n‑šušan.

¹⁵ iffuġ murdah̬ay zġ‑dar‑ugllid, ils timlsa n‑tgldit tizgzawin d‑tumlilin, ig‑n rrẓẓa imqqurn n‑uwrġ, d‑uslham azggʷaġ n‑lkttan ilggʷaġn. ayt‑tmdint n‑šušan ar‑ttalln awal‑nsn ar‑tfraḥn.

¹⁶ fjjijn‑uwdayn s‑lhna d‑lɛzz d‑luqr lli‑darsn‑illan.

¹⁷ frḥn‑uwdayn ġ‑kullu timizar d‑tmdinin, ula kullu inna tlkm‑tnbaṭṭ n‑ugllid d‑lamr‑ns. ig darsn ass ihiyyan, skrn gis imnsiwn mqqurnin. iggut ula ġ‑ayt‑iqbiln yaḍni ma‑ittinin izd udayn ad‑gan, ašku wrrin ar‑bahra‑tuqqarn udayn.