astir 6 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ira‑ugllid a‑issimġur murdah̬ay

¹ ġ‑iḍ‑an igammi‑yiṭs a‑yawi agllid, yamr imqasan‑ns ad‑as‑d‑awin arra n‑ukttay, a‑t‑igan d‑warra n‑iskkirn n‑uwssan. ġrn‑t‑id f‑ugllid.

² ttaġ‑d agzzum lli‑ġran, ityara gis f‑murdah̬ay mamnk a‑iɛlm s‑bigtan d‑taraš, ingabaln zuzlnin lli‑yadlli‑ganin aḍafn n‑uġgʷmmi, skrn f‑ad‑nġn agllid aḥašwiruš.

³ isqsa‑ugllid imqasan‑ns: «man luqr ula man timuġra a‑ityawskarn i‑murdah̬ay f‑mayan?» inin‑as imqasan‑ns: «ur‑as‑ityawskar yat.»

⁴ isqsa‑tn‑ugllid: «manwa illan ġilad ġ‑usarag?» ttaġ‑d haman bḥra‑d‑ikšm s‑usarag n‑tgmmi n‑ugllid, yiri ad‑as‑iḍalb a‑yagʷl murdah̬ay f‑usatur lli‑as‑ijjujad.

⁵ inin imqasan i‑ugllid: «haman a‑illan, ibidd ġ‑usarag.» yini‑ugllid: «awyat‑t‑id.»

⁶ lliġ ikšm haman yini‑as‑ugllid: «ma‑ra‑ityawskar i‑urgaz nna‑s‑irḍa‑ugllid a‑t‑issimġur?» yini haman d‑ih̬f‑ns: «manwa‑s‑irḍa‑ugllid a‑t‑issimġur abla nkki?»

⁷ ijawb ilmma i‑ugllid yini: «argaz nna‑s‑irḍa‑ugllid a‑t‑issimġur,

⁸ ad‑as‑d‑awin timlsa n‑tgldit zund malssa n‑ugllid, awin‑d ula ayyis lli‑f‑a‑itnay‑ugllid s‑ttaj n‑tgldit f‑ih̬f‑ns.

⁹ a‑ttfknt‑tmlsa d‑wayyis ġakudan ġ‑ufus n‑yan ihiyyan ġ‑iriyasn n‑ugllid, f‑ad‑sslsn i‑urgaz lli‑s‑irḍa‑ugllid a‑t‑issimġur, ssidun‑t f‑wayyis ġ‑usays n‑tmdint, zwurn‑as ar‑tbrraḥn: ‹ġmkad a‑ityawskarn i‑yan‑s‑irḍa‑ugllid a‑t‑issimġur.› »

¹⁰ yini‑ugllid ġakudan i‑haman: «ḥarru tawit‑d timlsa d‑wayyis ġmklli‑s‑tnnit, tskrt ġmkan i‑uwday murdah̬ay lli‑itgawarn ġ‑dar imi n‑tgmmi n‑ugllid. a‑ur‑n‑tflt yat zġ‑ġaylli‑s‑kullu‑tnnit.»

¹¹ yawi‑d haman timlsa d‑wayyis, issls‑tnt i‑murdah̬ay issidu‑t f‑wayyis ġ‑usays n‑tmdint, izwur‑as ar‑itbrraḥ: «ġmkad a‑ityawskarn i‑yan‑s‑irḍa‑ugllid a‑t‑issimġur.»

¹² lliġ izri mayan iwrri‑d murdah̬ay s‑dar imi imqqurn n‑tgmmi n‑ugllid. imma haman idl udm‑ns iḥarru s‑tgmmi‑ns ar‑inddr.

¹³ iɛawd haman i‑tmġart‑ns zaraš d‑imddukkʷal‑ns f‑kullu mad‑as‑ijran. jawbn‑as‑d imšawarn‑ns d‑tmġart‑ns zaraš inin: «lliġ iga murdah̬ay zġ‑uqbil n‑uwdayn, d‑kiyi tgguzt ar‑ttknukit ġ‑lgddam‑ns, han ur‑sar‑ti‑tnrit. s‑lḥqq ra‑tḍrt ġ‑umnid‑ns.»

¹⁴ sul a‑dids‑sawaln s‑d‑lkmn ingabaln zuzlnin n‑ugllid, ssḥarrun‑t‑in s‑dar imnsi lli‑tskr astir.