astir 5 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

astir tjjujad imnsi

¹ wis kraḍ‑uwssan tls astir timlsa‑ns n‑tgldit, tddu s‑usarag ġ‑ugʷns n‑tgmmi n‑ugllid, tbidd ġ‑dar imi n‑uḥanu ihiyyan n‑ugllid. tizi‑an iskiws‑ugllid ġ‑uḥanu‑an f‑lɛrš n‑tgldit‑ns, iwala‑d imi.

² iẓr tagllidt astir tbidd‑n ġ‑usarag, irḍu srs imdi‑as‑d akuray n‑uwrġ lli‑illan ġ‑ufus‑ns. takmur‑n astir, tggr‑n i‑ih̬f n‑ukuray.

³ yini‑as‑ugllid: «ma‑km‑yaġn a‑tagllidt astir? ma‑trit a‑tḍalbt? wah̬h̬a iga mnaṣṣ n‑tgldit‑inu, rad‑am‑t‑fkġ.»

⁴ tini‑as astir: «iġ‑trḍit ay‑agllid s‑wawal‑inu, ad‑di‑taškt ġassad kiyi d‑haman s‑imnsi lli‑jjujadġ i‑ugllid.»

⁵ yini‑ugllid i‑imqasan‑ns: «ḥarrwat tawim‑d haman a‑nskr s‑mayd tḍalb astir.» iddu‑ilmma‑ugllid d‑haman s‑imnsi lli‑tjjujad astir.

⁶ lliġ a‑ssan aman n‑waḍil iktin tigira n‑imnsi, yini‑ugllid i‑astir: «ma‑trit? rad‑am‑t‑fkġ. ma‑ra‑zġ‑gigi‑tḍalbt? wah̬h̬a iga mnaṣṣ n‑tgldit‑inu, rad‑am‑t‑ssafuġ.»

⁷ tsawl‑d astir tini‑as: «mayd riġ ula mayd rad‑ḍalbġ,

⁸ iġ‑ufiġ rrḍa ġ‑iẓri‑nk ay‑agllid, d‑iġ‑ak‑iga lh̬aṭr ad‑iyi‑tfkt mad‑sigglġ tskrt‑iyi mad‑ḍalbġ, a‑di‑taškt kiyi d‑haman s‑imnsi lli‑rad‑awn‑skrġ azkka. rad‑ak‑jawbġ tizi‑an f‑maylli‑f‑iyi‑tsqsat.»

iqṣad haman a‑inġ murdah̬ay

⁹ iffuġ‑d haman ġassan ifrḥ ifjjij‑uwl‑ns. walaynni lliġ‑d‑iffuġ, iẓr murdah̬ay ġ‑dar imi n‑tgmmi n‑ugllid, iẓr is‑ur‑as‑ibidd ula da‑itrgigiy ġ‑umnid‑ns. nkrn‑d gis iriyn bahra f‑murdah̬ay.

¹⁰ walaynni haman yumẓ ġ‑ih̬f‑ns, iddu s‑tgmmi‑ns, iġr‑d i‑imddukkʷal‑ns d‑tmġart‑ns zaraš s‑dars.

¹¹ ibdu ar‑ittalġ ih̬f‑ns f‑tugtt n‑wayda‑ns d‑tugtt n‑tarwa‑ns, ula f‑mamnk a‑t‑issġli‑ugllid ig‑t f‑uflla n‑kullu imɛawann‑ns d‑iriyasn‑ns.

¹² yini‑asn haman: «ula tagllidt astir, ur‑tɛrḍ i‑kra n‑yan a‑n‑imun d‑ugllid s‑imnsi lli‑tskr abla nkki. ula azkka nkki waḥduyy a‑mi‑tɛrḍ a‑n‑munġ d‑ugllid s‑dars.

¹³ walaynni kullu mayan ur‑dari‑igi yat, ašku ar‑sul‑ẓrraġ uday‑an murdah̬ay ar‑itgawar ġ‑dar imi imqqurn n‑tgmmi n‑ugllid.»

¹⁴ tsawl‑d‑tmġart‑ns zaraš d‑imddukkʷal‑ns kullutn inin‑as: «zayd tskrt yan‑usatur tgt‑t f‑tannalin n‑ukššuḍ, a‑yili ġ‑tiddi‑ns sin id‑mraw d‑smmus (25) mitru. zikk ṣbaḥ tinit i‑ugllid a‑n‑gis‑yagʷl murdah̬ay, tddut ilmma s‑lfrḥ kiyi d‑ugllid s‑dar imnsi.» haman iɛjb‑t‑wawal‑an ijjujad asatur.