astir 4 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

tskr astir f‑a‑tbidd d‑mddn‑ns

¹ lliġ isfld murdah̬ay f‑ġaylli kullu ityawskarn, ibbi timlsit‑ns, ils lh̬iš, ig iġd f‑ih̬f‑ns. iffuġ ġakudan ar‑ittall awal‑ns ġ‑wammas n‑tmdint, ar‑bahra‑issġuyyu s‑tguḍi.

² yawn s‑dar imi imqqurn n‑tgmmi n‑ugllid ibidd, ašku yan ilsan lh̬iš, ur‑darsn‑izri a‑n‑ikšm d‑imi n‑tgmmi n‑ugllid.

³ kraygatt tamazirt nna‑n‑tlkm‑tnbaṭṭ n‑ugllid d‑lamr‑ns, nkrnt‑gis‑tndriwin ggutnin ġ‑dar‑uwdayn, ar‑taẓumn s‑imṭṭawn ar‑ssmummuyn. yigat gisn ma‑iggan ġ‑lh̬iš d‑iġd.

⁴ ula tagllidt astir, lliġ‑d‑dars‑uškant‑tɛyyalin‑ns d‑imqasan‑ns zuzlnin inin‑as f‑murdah̬ay, taġ‑tt‑bahra‑tguḍi. tazn‑as timlsa baš a‑ikks lh̬iš ils‑tnt, imma ntta ur‑iri.

⁵ tġr‑d astir i‑hatah̬ angabal izuzln lli‑iẓli‑ugllid a‑fllas‑itsh̬h̬ar, tuṣṣa‑t a‑iddu s‑dar murdah̬ay a‑t‑isqsa f‑ma‑ijran ula mah̬ aylliġ iskr ġmkan.

⁶ iffuġ hatah̬ s‑dar murdah̬ay ġ‑usarag n‑tmdint ġ‑tama n‑imi imqqurn n‑ugllid.

⁷ iɛawd‑as murdah̬ay f‑kullu mad‑as‑ijran, yini‑as mnnaw iqaridn a‑s‑iqawl haman a‑tn‑ifk i‑lh̬zin n‑ugllid baš a‑ifnu udayn kullutn.

⁸ ifk‑d murdah̬ay i‑hatah̬ arra n‑lamr lli‑iffuġn ġ‑tmdint n‑šušan ma‑s‑a‑tn‑ifnnu, iḍalb‑as a‑t‑iml i‑astir ifasr‑as‑t. izayd iḍalb‑as a‑yuṣṣa astir a‑tddu s‑dar‑ugllid, tḍalb‑as rrḍa tssḥurmu‑t zġ‑ljiht n‑mddn‑ns.

⁹ iwrri hatah̬ s‑dar astir, iɛawd‑as iwaliwn n‑murdah̬ay.

¹⁰ tsawl astir ġakudan i‑hatah̬, tuṣṣa‑t a‑iddu daġ s‑dar murdah̬ay yini‑as:

¹¹ «hati ityawssan dar kullu imqasan n‑ugllid ula ġ‑dar kullu mddn ġ‑tmizar n‑ugllid, iġ‑ikšm yan nġd yat s‑dar‑ugllid ġ‑ugʷns n‑tgmmi‑ns bla‑yas‑iġra s‑dars, yat‑tnbaṭṭ a‑rad‑as‑yili. lmut a‑t‑id‑iqqann, abla iġ‑as‑d‑imdi‑ugllid akuray‑ns n‑uwrġ baš a‑iddr. nkki ur‑iyi‑d‑iġri‑ugllid s‑dars kraḍ id‑mraw (30) n‑wass ayad.»

¹² awin‑d iwaliwn n‑astir i‑murdah̬ay.

¹³ iḍalb‑asn murdah̬ay ad‑rarn awal i‑astir yuṣṣa‑tt: «a‑ur‑tswangmt kmmi is‑ra‑tnjmt ġ‑tgmmi n‑ugllid zġ‑ġaylli ra‑ijru i‑kullu‑uwdayn.

¹⁴ iġ‑tfssat ġ‑tizi‑ad, ra‑d‑yašk‑ujnjm d‑lhna i‑uwdayn zġ‑mani yaḍni, walaynni ra‑thlkt kmmi d‑tagʷmat n‑babam laḥ‑kʷn. ma‑issnn izd f‑ssibt n‑wan tizi‑ad a‑f‑truḥt tagldit?»

¹⁵ tazn‑tn astir ġakudan ad‑inin i‑murdah̬ay:

¹⁶ «zayd tssmunt kullu udayn lli‑illan ġ‑šušan, tɛlmt‑tn s‑uẓum ġ‑ljiht‑inu. ad‑ur‑tššm ula tswam kraḍ‑uwssan azal wala iḍ. nkki d‑tɛyyalin‑inu ula nkkʷninti ra‑naẓum, kšmġ ilmma s‑dar‑ugllid, wah̬h̬a ssurfġ lqanun. d‑iġ‑iyi‑di‑tqqan lmut, mmtġ‑iyt.»

¹⁷ iddu murdah̬ay ġakudan iskr kullu maylli‑f‑ti‑tuṣṣa astir.