astir 3 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

iqṣad haman a‑ihlk udayn

¹ izri ma‑izrin iskr‑ugllid aḥašwiruš f‑a‑issimġur haman lli‑igan yus n‑hammadata zġ‑ayt‑agag. issġli‑t ig‑t‑in f‑lkursi lli‑yattuyn f‑kullu iriyasn n‑usmun‑ns.

² ar‑as‑knnun kullu imqasan n‑ugllid lli‑itkkan imi n‑tgmmi n‑ugllid, ar‑n‑tbndaqn i‑haman, ašku ġmkan a‑s‑yumr‑ugllid f‑ssibt‑ns. walaynni murdah̬ay ur‑a‑ys‑iknnu ula da‑ys‑itbndaq.

³ sawln‑d imqasan n‑ugllid lli‑illan ġ‑dar imi n‑tgmmi n‑ugllid sqsan murdah̬ay: «mah̬ aylliġ ur‑a‑tskart s‑lamr n‑ugllid?»

⁴ zaydn ass f‑wass ar‑t‑sqsan ġmkan, imma ntta ur‑tt‑gisn‑yiwi. ddun ilmma inin‑t i‑haman ad‑ẓrn is‑ra‑iqama murdah̬ay ġ‑wawal‑ns, ašku inna‑yasn izd uday a‑iga.

⁵ lliġ iẓra haman is‑ur‑a‑ys‑iknnu murdah̬ay ula da‑ys‑itbndaq, nkrn‑d gis iriyn.

⁶ walaynni ur‑t‑yuwdi a‑inġ ġir murdah̬ay waḥdut. lliġ‑t‑ɛlmn f‑uqbil lli‑zġ‑iga murdah̬ay, ar‑isiggil ġakudan mamnk a‑ithlak kullu udayn lli‑illan ġ‑tgldit n‑aḥašwiruš kullutt, ašku iga murdah̬ay zġ‑gisn.

⁷ asggʷas wis sin d‑mraw (12) n‑ugllid aḥašwiruš, ġ‑wayyur amzwaru lli‑mi‑ttinin ‹nisan›, grn‑d aṣġar lli‑mi‑ttinin ‹aṣġar n‑bur› ġ‑umnid n‑haman, a‑iẓr man ayyur d‑man ass a‑ġ‑ra‑iskr ġaylli ira. yaški‑asn‑d ġ‑wayyur wis sin d‑mraw (12) lli‑mi‑ttinin ‹adar›.

⁸ yini ilmma haman i‑ugllid aḥašwiruš: «han illa yan‑uqbil yakut ġ‑kraygatt mani, bḍun mddn‑ns ġ‑gr iqbiln yaḍni ġ‑kullu timizar n‑tgldit‑nk. tinbaḍin‑nsn ur‑gint zund tin iqbiln yaḍni, d‑ur‑a‑skarn s‑tnbaḍin‑nk ay‑agllid. ġayan a‑f‑ur‑ak‑iṣlaḥ a‑tn‑sul‑tadjt ġmkan ay‑agllid.

⁹ iġ‑trḍit s‑wawal‑ad ay‑agllid, tssufġt lamr ad‑kullu‑fnun. rad‑fkġ kraḍ id‑miyya d‑smmus‑walf (35 000) n‑kilu n‑nnʷqrt ġ‑ifassn n‑willi skarnin tawuri n‑ugllid, ad‑ttrsn ġ‑lh̬zin n‑ugllid.»

¹⁰ ikks‑d‑ugllid tah̬urṣt zġ‑ufus‑ns, ifk‑tt ġakudan i‑haman yus n‑hammadata zġ‑ayt‑agag lli‑igan anuwwaš n‑uwdayn.

¹¹ yini‑ugllid i‑haman: «han nnʷqrt tga tink, ula mddn‑an gan wink. skr srsn aynna ifulkin ġ‑iẓri‑nk.»

¹² issmun‑d iktatbin n‑ugllid ġ‑wass wis kraḍ d‑mraw (13) ġ‑wayyur amzwaru, aran lamr ġmklli‑s‑asn‑t‑inna haman i‑kullu lḥukkam n‑ugllid d‑inmġurn n‑tmizar‑ns d‑iriyasn n‑iqbiln‑ns. aznn lamr‑an s‑kraygatt tamazirt s‑id‑lif‑ns, ula kraygatt aqbil s‑tirra‑ns, s‑ism n‑ugllid aḥašwiruš, ršmn‑tn s‑th̬urṣt‑ns.

¹³ aznn tibratin‑an f‑ufus n‑imazzaln s‑kullu timizar n‑tgldit, baš ad‑hlkn udayn nġn‑tn fnun‑tn kullutn, zġ‑wid mẓẓinin ar wid mqqurnin, timġarin ula iḥšmiyn kullutn ġ‑yan‑wass. iga‑t‑wass wis kraḍ d‑mraw (13) ġ‑wayyur wis sin d‑mraw (12) lli‑mi‑ttinin ‹adar›, kksn‑asn ula ayda‑nsn.

¹⁴ uṣṣan ad‑ɛlmn mddn ġ‑kullu timizar f‑lamr lli‑illan ġ‑warra‑yan, baš ad‑kullu‑ḥiyyln mddn i‑wass‑an.

¹⁵ ffuġn imazzaln ḥarrun ad‑sslkmn awal n‑ugllid, brrḥn s‑lamr ula ġ‑tmdint idusn n‑šušan. iskiws‑ugllid d‑haman ad‑ssan, imma kullu ayt‑tmdint n‑šušan duhdan.