astir 2 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

twrri astir tga tagllidt

¹ tigira n‑mayan, lliġ ihnna lġaḍab n‑ugllid aḥašwiruš, iswangm‑d wašti ula ġaylli tskr ula ma‑s‑fllas‑iḥkam.

² sawln‑d ilmma iɛyyaln lli‑igan imqasan n‑ugllid inin‑as: «adj ih̬ddamn‑nk ad‑ak‑siggiln tifrh̬in fulkinin bahra ġ‑iẓri.

³ skr ingabaln ġ‑kullu timizar n‑tgldit‑nk ad‑d‑awin kullu tifrh̬in fulkinin s‑tgmmi n‑tmġarin ġ‑tmdint‑ad tamzwarut n‑šušan, ilint ġ‑ddu‑ufus n‑higay angabal izuzln lli‑tgit ay‑agllid f‑tmġarin, ifk‑asnt ilmma tujjutin ma‑s‑a‑siridnt.

⁴ tafruh̬t nna‑yufan rrḍa dar‑ugllid, a‑tg nttat tagllidt ġ‑udġar n‑wašti.» awal‑an iɛjb agllid, iskr srs.

⁵ illa yan‑uwday ġ‑tmdint idusn n‑šušan, iga ism‑ns murdah̬ay yus n‑yayir lli‑igan yus n‑šamɛi lli‑igan yus n‑qiš zġ‑ayt‑bnyamin.

⁶ ig yan zġ‑ġwilli akufnin zġ‑urušalim ġ‑usmun n‑yakunyah [lli‑mi‑ttinin yahuyah̬in] agllid n‑yahuda, ġakud lliġ‑t‑id‑ikks nabuh̬adnaṣr agllid n‑babil.

⁷ murdah̬ay ar‑itrbba illis n‑ɛmmis, ašku immut‑as babas d‑innas. iga ism‑ns hadassah, ar‑as‑daġ‑ttinin astir. tafruh̬t‑an tfulki bahra la ġ‑uwdm‑ns ula ġ‑tiddi‑ns. lliġ‑as‑immut babas d‑innas, iskr gis murdah̬ay zund illis.

⁸ izri ma‑izrin sfldn mddn s‑tnbaṭṭ ula lamr n‑ugllid. munnt‑d kigan d‑tfrh̬in ġ‑tmdint idusn n‑šušan ġ‑ddu‑ufus n‑higay, awin astir ula nttat s‑tgmmi n‑ugllid s‑dar higay lli‑illan f‑tmġarin.

⁹ ttaġ‑d tafruh̬t tɛjb higay, taf rrḍa ġ‑iẓri‑ns. ur‑imaṭl ifk‑as tujjutin ma‑s‑a‑tsirid, iẓli‑as taġamt‑ns ġ‑umššu. isti‑as ssa n‑tsh̬h̬arin zġ‑tgmmi n‑ugllid, issmatti‑tt nttat d‑tsh̬h̬arin‑ns s‑illi kullu iɛdln ġ‑tgmmi n‑tmġarin.

¹⁰ astir ur‑tnni i‑yan man aqbil ula man tagʷmat zġ‑tga, ašku yuṣṣa‑tt murdah̬ay f‑mayan.

¹¹ ass f‑wass ar‑ifttu murdah̬ay ġ‑tama n‑usarag n‑tmġarin, a‑ur‑imil isfld is‑thnna astir, yissan ma‑rad‑as‑yili.

¹² kraygatt yat ġ‑tfrh̬in‑an, iqqan‑tt‑id a‑tzzri asggʷas ar‑gis‑tssfulki ih̬f‑ns s‑mklli gant‑tnbaḍin n‑tmġarin. sḍis‑iyrn ra‑gisn‑tẓġġur s‑zzit n‑lmurr, sḍis yaḍni s‑tujjutin mimnin, f‑ad‑ilmma‑tlkm‑twala‑ns a‑n‑tkšm s‑dar‑ugllid aḥašwiruš.

¹³ tizi nna‑ra‑tkšm dar‑ugllid, ittfk‑as aynna tra, a‑t‑dids‑tawi zġ‑dar‑tmġarin s‑tgmmi n‑ugllid.

¹⁴ ra‑n‑dars‑tkšm tadggʷat, tzayd ilmma zikk ṣbaḥ s‑tgmmi tis‑snat n‑tmġarin, ġ‑ddu‑ufus n‑šaɛašgaz angabal izuzln n‑ugllid lli‑illan f‑tsmgin lli‑itahl‑ugllid. ur‑ra‑tkšm tawala yaḍni s‑dar‑ugllid abla iġ‑srs‑ifrḥ bahra iġr‑as‑d s‑ism‑ns.

¹⁵ tlkm‑twala n‑astir a‑tkšm s‑dar‑ugllid. tg nttat illis n‑abiḥayil ɛmmis n‑murdah̬ay lli‑stt‑igan d‑illis. tizi‑an ur‑tḍalb yat abla maylli‑as‑imla higay angabal izuzln n‑ugllid lli‑illan f‑tmġarin. han astir tufa rrḍa ġ‑iẓri n‑kullu ma‑stt‑iẓran.

¹⁶ wis mraw‑iyrn lli‑mi‑ttinin ‹ṭibit›, ad‑iwin astir dar‑ugllid aḥašwiruš ġ‑tgmmi‑ns, ġ‑wis ssa isggʷasn n‑tgldit‑ns.

¹⁷ iḥubbu‑ugllid astir uggʷar n‑kullu timġarin yaḍni, taf rrḍa ġ‑iẓri‑ns, tɛzza dars uggʷar n‑kullu tifrh̬in yaḍni. ig‑as ttaj n‑tgldit f‑ih̬f‑ns, ig‑tt nttat d‑tgllidt ġ‑udġar n‑wašti.

¹⁸ iskr‑ugllid yan imnsi imqqurn i‑imɛawann‑ns d‑iriyasn‑ns, ar‑as‑ttinin ‹imnsi n‑astir›. issikki ḍḍabiyt ġ‑kullu timizar‑ns, ifk timih̬ar i‑mddn‑ns s‑ljudit n‑igldan hiyyanin.

murdah̬ay iɛawn agllid

¹⁹ tawala yaḍni ssmunn‑d tifrh̬in. iqama murdah̬ay ar‑itgawar ġ‑dar imi imqqurn n‑tgmmi n‑ugllid.

²⁰ astir ur‑jji‑tnni i‑yan man aqbil ula man tagʷmat zġ‑tga, ġmklli‑stt‑yuṣṣa murdah̬ay, ašku tmyur astir a‑tqama ġ‑wawal n‑murdah̬ay ġmklli‑stt‑irbba.

²¹ ġ‑uwssan‑an ġ‑a‑itgawar murdah̬ay ġ‑dar imi n‑tgmmi n‑ugllid, qlaqln sin‑waḍafn n‑uġgʷmmi. gan ntni ingabaln zuzlnin n‑ugllid, ismawn‑nsn bigtan d‑taraš. ar‑tmšiwirn i‑ngratsn mamnk a‑rad‑nġn agllid aḥašwiruš.

²² murdah̬ay iwrri issn mad‑nuwwan, yini‑t i‑tgllidt astir, tinit‑t nttat i‑ugllid f‑ism n‑murdah̬ay.

²³ lliġ ššnubbšn ġ‑tġawsa‑yan, afn‑tt‑in ġmkan a‑tga, agʷln‑in sin irgazn‑an ġ‑usatur. aran ġaylli ijran ġ‑warra n‑iskkirn n‑uwssan ġ‑umnid n‑ugllid.