astir 1 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

aḥašwiruš agllid n‑faras

¹ ġ‑uwssan n‑ugllid aḥašwiruš lli‑iḥkamn f‑miyya d‑sin id‑mraw d‑ssa (127) n‑tmazirt zġ‑wakal n‑lhnd ar akal n‑ḥabaš,

^2-3 ġ‑wis kraḍ isggʷasn n‑tgldit‑ns, lliġ iskiws‑ugllid aḥašwiruš f‑lɛrš‑ns ġ‑šušan lli‑igan tamdint‑ns tamzwarut, iskr yan‑imnsi imqqurn i‑kullu inmġurn‑ns d‑imɛawann‑ns. munn‑d dars iriyasn n‑lɛskr n‑ayt‑faras d‑ayt‑maday, ntni d‑ih̬fawn d‑inmġurn n‑tmizar‑ns kullutn.

⁴ zrin ussan ggutnin ar‑asn‑imala timih̬ar‑ns ula lhibt n‑tgldit‑ns ula tugtt n‑wayda‑ns ula kullu timuġra lli‑dars‑illan. ġmkan a‑iskar miyya d‑tam id‑mraw (180) n‑wass.

⁵ lliġ kmmln‑uwssan‑an, iskr‑ugllid imnsi yaḍni i‑kullu mddn‑ns lli‑illan ġ‑tmdint‑an idusn n‑šušan, zġ‑wad imqqurn ar wad imẓẓin. ssa n‑uwssan ad‑dars‑tmunun ġ‑usarag n‑talɛrṣt n‑tgmmi n‑tgldit‑ns.

tagllidt wašti

¹⁰ wis ssa n‑uwssan‑an, lliġ bahra ifjjij‑ugllid aḥašwiruš s‑waman n‑waḍil iktin, yuṣṣa mhuman d‑bizzta d‑ḥarbuna d‑bigta d‑abagta d‑zitar d‑karkas lli‑igan ssa n‑ingabaln‑ns zuzlnin,

¹¹ ad‑d‑ssḥaḍrn tagllidt wašti s‑lgddam‑ns, tg‑n ttaj‑ns n‑tgldit, baš a‑iml i‑mddn‑ns d‑inmġurn‑ns mnšk a‑s‑bahra‑tfulki, ašku nttat tfulki bahra ġ‑iẓri.

¹² walaynni lliġ sslkmn ingabaln zuzlnin lamr n‑ugllid i‑tgllidt wašti, tagʷi a‑d‑dars‑tddu. nkrn‑d iriyn ġ‑ugllid, iġḍb bahra.

¹³ izayd‑ugllid isqsa ayt‑tḥkimt lli‑ifhmn izmaz, ġmklli imyur a‑itmšawar d‑willi issnn ġ‑lqanun d‑lḥkamat.

¹⁴ imšiwirn‑ns gan ssa n‑iriyasn n‑faras d‑maday, ismawn‑nsn karšana d‑šitar d‑admata d‑taršiš d‑maras d‑marsana d‑mamukan. gn ntni willi srs yakmurn ilin dids ar‑dids‑tgawarn f‑tgldit‑ns.

¹⁵ yini‑asn‑ugllid: «ma‑s‑inna lqanun a‑t‑nskr ġ‑tgllidt wašti lli‑irẓan lamr n‑ugllid aḥašwiruš lli‑stt‑in‑ilkmn f‑imi n‑ingabaln zuzlnin?»

¹⁶ isawl‑d mamukan ġ‑lgddam n‑ugllid d‑iriyasn‑ns yini: «tagllidt wašti, urd agllid waḥdut a‑ġ‑tskr lɛar, walaynni tskr‑t ġ‑kullu iriyasn ula kullu ayt‑tmizar‑nk ay‑agllid aḥašwiruš.

¹⁷ ašku ġaylli tskr‑tgllidt, rad‑fllas‑sfldnt‑kullu‑tmġarin, wrrint ḥgrnt irgazn‑nsnt ar‑ttinint: ‹han agllid aḥašwiruš a‑yumrn ad‑as‑n‑ssḥaḍrn tagllidt wašti, tagʷi a‑d‑dars‑tddu.›

¹⁸ ġassad nnit, han kullu timġarin n‑iriyasn n‑faras d‑maday lli‑isfldn f‑ġaylli tskr‑tgllidt, rad‑wrrint ar‑aġ‑tjawabnt ġmkan, tigat bahra lḥgriwt ula lġaḍab ġ‑ingratnġ.

¹⁹ iġ‑trḍit ay‑agllid s‑wawal‑ad, ssufġ tanbaṭṭ n‑ugllid a‑ur‑sar‑sul‑tk‑tgllidt wašti lgddam‑nk, tarat tanbaṭṭ‑ad ġ‑lqanun n‑faras d‑maday a‑ur‑sar‑titti. tẓlit ilmma yat yaḍni lli‑stt‑yufn, a‑tg tagllidt ġ‑udġar‑ns.

²⁰ iġ‑tffuġ‑tnbaṭṭ‑ad n‑ugllid ar‑srs‑ntbrraḥ ġ‑kullu tisgiw n‑tgldit‑nk imqqurn, rad‑kullu‑tuqqarnt‑tmġarin irgazn‑nsnt, ġ‑dar inmġurn ula ġ‑dar wiyyaḍ.»

²¹ awal‑an iɛjb agllid d‑iriyasn, iskr maylli‑s‑inna mamukan.

²² yazn tibratin s‑kullu timizar n‑tgldit, kraygatt tamazirt s‑tirra‑ns, d‑kraygatt aqbil s‑wawal‑ns, yini‑asn a‑iḥkam‑kraygatt‑urgaz ġ‑tgmmi‑ns, ar‑isawal s‑wawal n‑uqbil‑ns.