amslmd 4 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

taɛddiyt ġ‑ddu tafukt

¹ mnadġ‑n daġ s‑ẓriġ taɛddiyt lli‑tqasan mddn ġ‑kraygatt mani ġ‑ddu tafukt. ẓrġ‑n imṭṭawn n‑willi‑f‑iḍr lbaḍl, d‑ur‑illi ma‑fllasn‑issfjjijn. ayt‑ḍḍulm ad‑dar afud, imma wiyyaḍ ur‑darsn ma‑fllasn‑issfjjijn.

² iniġ d‑ih̬f‑inu, willi mmutnin, hatni raḥan f‑willi iqaman ġ‑tudrt,

³ walaynni yuf‑tn s‑sin wanna ur‑ta‑d‑iluln, ur‑jji‑iẓri iskkirn ʷh̬šnnin lli‑tyawskarnin ġ‑ddu tafukt.

⁴ ẓrġ ilmma mah̬ aylliġ a‑itnhataf bnadm ar‑itḥraš ġ‑twuri‑ns. ur‑iri abla a‑yati adjar‑ns. ula ġayan ur‑gis amya, ig zund yan itakʷin a‑yamẓ aḍu.

⁵ hay‑anafal ar‑issnaḍaw ifassn‑ns, ar‑ištta ġ‑ṣṣaḥt‑ns.

⁶ walaynni yat tummit n‑lhna tuf snat tummitin n‑tkrrayt f‑tummaẓt n‑waḍu.

⁷ mnadġ‑n daġ s‑ẓriġ kra yaḍni ġ‑ur‑illi‑umya ġ‑ddu tafukt.

⁸ yan igan waḥdut, ur‑iṭṭaf arraw ula gʷmas, walaynni ar‑bdda‑itnhataf, igammi a‑isunfu, ur‑sar‑šbɛnt‑walln‑ns ayda. ur‑jji‑isqsa ih̬f‑ns «manwa‑f‑a‑tnhatafġ? manwa‑f‑kksġ i‑ih̬f‑inu rraḥt?» ula ġayan ur‑gis amya, ig tawuri isshrašn.