amslmd 3 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

kraygatt kra, tlla tizi‑ns

¹ kraygatt kra ila tizi‑ns. yili‑uzmz i‑kraygatt taġawsa ġ‑ddu ignwan:

² tizi n‑tlalit ula tizi n‑lmut, tizi n‑uwẓu ula tizi n‑uwkuf n‑uwẓu.

³ tizi n‑tnaġa ula tizi n‑ujjuji, tizi n‑trẓi ula tizi n‑tbnnayt,

⁴ tizi n‑imṭṭawn ula tizi n‑taḍṣa, tizi n‑tndra ula tizi n‑uḥwaš,

⁵ tizi ġ‑a‑ttgarm iẓran ula tizi ġ‑a‑tssmunum iẓran, tizi ġ‑a‑ttḥbbalm ula tizi ġ‑a‑ur‑ttḥbbalm,

⁶ tizi ġ‑a‑tsiggilm ula tizi ġ‑a‑ttfalm, tizi ġ‑a‑ttḥḍum ula tizi ġ‑a‑ttluḥm,

⁷ tizi n‑ušrrig ula tizi n‑tgni, tizi n‑tfssi ula tizi n‑waqqur,

⁸ tizi n‑tayri ula tizi n‑ṭaẓit, tizi n‑imiġ ula tizi n‑sslamt.

⁹ man lfaytt illan i‑uh̬ddam ġ‑unhataf‑ns?

¹⁰ ẓriġ tiwuriw lli‑ifka rbbi ad‑srsnt‑tlhun tarwa n‑bnadm.

¹¹ iskr kraygatt taġawsa tfulki ġ‑tizi‑ns. d‑kra yaḍni, yudja mddn ad‑swingimn ġ‑lih̬rt ur‑ilin ttmi, walaynni ur‑iẓḍar bnadm a‑yissan iskkirn n‑rbbi zġ‑isizwur ar isiggʷra.

¹² ẓriġ nkki is‑ur‑asn‑illi ma‑yufn ġwad, a‑tfraḥn ar‑skarn afulki maḥdd tqama tudrt‑nsn.

¹³ d‑kra yaḍni, ra‑ifulki i‑kraygatt yan iġ‑a‑ištta ar‑issa ar‑itfraḥ s‑twuri‑ns, ašku mayan a‑igan tawafka n‑rbbi i‑bnadm.

¹⁴ ẓrġ aynna iskr rbbi, hati rad‑bdda‑idum, ur‑tẓḍart ad‑as‑tzaydt kra wala tnaqṣt‑as kra. iskr‑t rbbi ġmkan baš ad‑iksaḍn mddn ġ‑umnid‑ns.

¹⁵ kullu ma‑illan ġilad, ikka‑ttin illa. kullu ma‑ra‑yili, illa yad. kullu ma‑izrin, itabɛa‑t rbbi s‑lḥsab.

lmut n‑bnadm ula lbhaym

¹⁶ d‑kra yaḍni ẓriġ‑t ġ‑ddu tafukt. innaġ a‑tlhun mddn s‑lqanun da‑ittili ššrr, d‑innaġ a‑tlhun s‑lḥqq da‑ittili ššrr.

¹⁷ iniġ d‑ih̬f‑inu, rbbi ra‑yut lḥukm f‑wad iṣlaḥn ula wad yʷh̬šnn, ašku kraygatt taġawsa d‑kraygatt askkir, tla tizi‑ns.

¹⁸ iniġ daġ d‑ih̬f‑inu, ha tarwa n‑bnadm, ar‑tn‑itarm rbbi baš ad‑fhmn izd zund lbhaym ad‑gan.

¹⁹ ašku ġaylli ijrrun i‑tarwa n‑bnadm a‑ijrrun i‑lbhaym. ġmklli itmmtat yan a‑itmmtat wayya. s‑yat rruḥ a‑s‑a‑kullu‑ssunfusn. bnadm ur‑yugir lbhaym s‑yat. han kraygatt kra, ur‑gis amya.

²⁰ ašku s‑yan mani a‑s‑rad‑kullu‑gguzn. tyawskarn kullu zġ‑ugdrur n‑wakal, wrrin ilmma s‑ugdrur.

²¹ is‑illa ma‑issnn is‑a‑ttattuy rruḥ n‑bnadm s‑uflla, ar‑ttgguz rruḥ n‑lbhimt s‑tdrut n‑wakal?

²² afġ ġmkan is‑ur‑illi ma‑yufn ġwad, a‑ifrḥ yan s‑twuri‑ns, ašku mayan ad‑as‑illan. ma‑iẓḍarn ad‑as‑iml ma‑ra‑yili tigira n‑lmut‑ns?