amslmd 2 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

rršuq ur‑gis amya

¹ nniġ i‑ih̬f‑inu: «hiya ġilad a‑k‑armġ s‑rršuq. ġir tfjjij d‑ugayu‑nk.» walaynni ufiġ ula mayan, ur‑gis amya.

² iniġ f‑taḍṣa «anufl ka‑tga», iniġ f‑rršuq «man lfaytt gis illan?»

³ skrġ ilmma d‑ih̬f‑inu ad‑ssfrḥġ ddat‑inu s‑waman n‑waḍil iktin. tini‑yyi‑tḥkimt‑inu ad‑armġ anufl, f‑ad‑ẓrġ ma‑ra‑ifulki i‑tarwa n‑bnadm a‑t‑skarn ġ‑uwssan drusnin lli‑zzrayn ġ‑ddu ignwan.

⁴ skrġ ilmma tiġawsiwin mqqurnin, bnuġ tigʷmma i‑ih̬f‑inu, ẓẓuġ aḍil ġ‑igran.

⁵ skrġ talɛrṣin d‑uwrtan i‑ih̬f‑inu, ẓẓuġ gisn tiṣġarin s‑kullu ma‑igan lġllt.

⁶ skrġ ifraḍn n‑waman ma‑s‑a‑sswaġ iṣġarn lli‑d‑yaqlayn ġ‑uwrtan.

⁷ sġġ‑d ismgan d‑tsmgin, ṭṭafġ ula wiyyaḍ lli‑d‑iluln ġ‑tgmmi‑nu. ssigatġ ġ‑dari lksibt, imugayn d‑uwlli uggʷar n‑kullu willi‑yyi‑d‑izwurn ġ‑urušalim.

⁸ ssmunġ‑d nnʷqrt d‑uwrġ d‑lknuz zġ‑dar igldan ula iqbiln. ilin dari inḍḍamn d‑tmḍḍanin, d‑tsmgin ma‑issfraḥn ul n‑bnadm.

⁹ ġliġ nkki s‑tmuġra iggutn, agʷrġ kullu willi‑yyi‑d‑izwurn ġ‑urušalim, ar‑bdda‑skarġ s‑tḥkimt‑inu.

¹⁰ aynna tra ṭiṭṭ, amẓġ‑t‑id i‑ih̬f‑inu. mknna iga rršuq, ur‑t‑kkisġ i‑uwl‑inu. ašku tɛjb‑iyi‑twuri lli‑f‑a‑tnhatafġ, d‑mayan a‑igan tiġrad‑inu f‑twuri.

¹¹ ar‑ilmma‑tmnadġ ġ‑kullu iskkirn n‑ifassn‑inu, ula takrrayt lli‑utġ f‑twuri‑an, afġ‑n mayan kullut ur‑gis amya, ig zund yan itakʷin a‑yamẓ aḍu. ur‑tlli kra n‑lfaytt ġ‑ddu tafukt.

taḥkimt ur‑gis amya

¹² wrriġ ilmma ar‑siggilġ ġ‑tḥkimt d‑umuɛḍr d‑unufl. ašku sqsaġ ih̬f‑inu: «ma‑ra‑iskr wanna‑yyi‑d‑iggʷran ġ‑tgldit? walu abla maylli yadlli skrġ nkki?»

¹³ ẓriġ‑n is‑tlla lfaytt ġ‑tḥkimt uggʷar n‑unufl, ġmklli tlla lfaytt ġ‑tifawt uggʷar n‑tillas,

¹⁴ ašku yan iṭṭafn taḥkimt ar‑itmnad s‑walln‑ns, imma anafal ar‑ifttu ġ‑tillas, walaynni ufiġ‑tn‑in ġ‑isiggʷra‑nsn yan ad‑gan.

¹⁵ iniġ d‑ih̬f‑inu: «ġaylli‑s‑tggʷra i‑unafal a‑s‑ra‑yyi‑tggru ula nkki. man lfaytt ad‑dari ġ‑tugtt n‑tḥkimt‑inu?» iniġ: «ula ġayan ur‑igi amya.»

¹⁶ ašku ġir imikk, la bu‑tḥkimt wala anafal ra‑tn‑ttun mddn. ur‑sul‑ra‑tn‑d‑swingimn kullu mayd iftan. ẓr mamnk a‑itmmtat bu‑tḥkimt zund anafal.

¹⁷ wrriġ nkki ḥašaġ tudrt, ašku kullu ma‑ityawskarn ġ‑ddu tafukt issaġ‑iyi taguḍi. han ur‑gis amya, ig zund yan itakʷin a‑yamẓ aḍu.

tawuri ur‑gis amya

¹⁸ wrriġ ḥašaġ kullu tawuri lli‑s‑a‑tnhatafġ ġ‑ddu tafukt, ašku iqqan‑iyi‑d ad‑flġ kulši i‑walli ra‑yyi‑d‑iggru.

¹⁹ ma‑issnn is‑ra‑ig ntta bu‑tḥkimt nġd anafal? walaynni ra‑yamẓ kullu maylli‑f‑utġ tammara ġ‑ddu tafukt s‑tḥkimt lli‑dari‑illan. ula ġayan, ur‑gis amya.

²⁰ iwrri‑uwl‑inu ġakudan ṭiyr‑as bahra f‑tkrrayt lli‑s‑a‑tnhatafġ ġ‑ddu tafukt.

²¹ ašku bnadm ar‑itsala tawuri‑ns s‑tḥkimt d‑twassna iḥaršn, ifl‑tt ilmma f‑a‑gis‑iršq yan ur‑fllas‑yutn tammara. ula ġayan, ur‑gis amya, ig lbaḍl išqan.

²² ašku sqsaġ ih̬f‑inu: «ma‑ra‑yili i‑bnadm f‑tmmara‑yan kullutt ula takrrayt n‑uwl‑ns lli‑s‑a‑itnhataf ġ‑ddu tafukt?»

²³ kullu ussan‑ns ar‑ti‑taġ‑tguḍi, thuwwl‑t‑bdda‑twuri‑ns. ula iḍ ur‑a‑itafa‑uwl‑ns rraḥt. ula ġayan ur‑gis amya.

²⁴ bnadm, ur‑dars‑illi ma‑yufn ġwad, a‑ištta ar‑issa ar‑iššfjjij f‑uwl‑ns s‑twuri‑ns. ẓriġ ula mayan ikka‑d afus n‑rbbi,

²⁵ ašku ma‑iẓḍarn a‑ištta ifjjij iġ‑ur‑as‑t‑ifki rbbi?

²⁶ ašku wanna‑f‑irḍa rbbi, ar‑as‑yakka taḥkimt d‑twassna d‑lfrḥ. imma bu‑lh̬ʷšant, ar‑t‑issh̬dam a‑issmunu ar‑issgudi ġir afad a‑t‑ifk i‑walli‑f‑irḍa rbbi. ula ġayan, ur‑gis amya, ig zund yan itakʷin a‑yamẓ aḍu.