amslmd 12 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

amarg f‑tuwssrt n‑bnadm

¹ swingim ġ‑ġwalli‑k‑ih̬lqn sul tmẓẓit, ur‑ta‑tlkimt ussan n‑tkrrayt, ur‑ta‑k‑id‑lkimn isggʷasn lli‑ġ‑ra‑ttinit: «ur‑iyi‑iɛjib yat».

² swingim gis ur‑ta‑yk‑llasnt tifawin n‑tafukt d‑wayyur d‑itran, ula‑da‑d‑dark‑twrrin imdla tigira n‑unẓar.

³ ussan‑an a‑ra‑trgigiyn‑waḍafn n‑tgmmi, knun‑d ula irgazn dusnin, gammint‑sul‑tzrgin ad‑ẓaḍnt ašku drusnt, bukḍnt ula tilli taggʷanin zġ‑tarryaḥin,

⁴ qqnnt‑tflwin f‑tsukt, ar‑ttfssa taqqurt n‑izrgan, ar‑k‑sul‑ssnkarnt tallġatin n‑igḍaḍ, walaynni zrin fllak imurign n‑ist‑uḥwaš.

⁵ ussan‑an a‑ġ‑ra‑tgammit ma‑yattuyn, ar‑k‑issiwid aynna illan ġ‑uġaras. hati ijjujg lluz, ar‑ttštutul‑tmurġi, imma bnadm ur‑sul‑gis‑tqama ššhawa. ašku yakmur a‑iddu s‑tgmmi‑ns idumn, nkrn willi fllas allanin ar‑tlulliyn ġ‑tswak.

⁶ swingim gis ur‑ta‑tbbi‑tzikrt n‑nnʷqrt, ur‑ta‑trẓi‑tkint n‑uwrġ, ur‑ta‑tfrsi‑tbʷqqalt dar‑uġbalu, ur‑ta‑trẓi tajrrart n‑iggi n‑wanu,

⁷ ula iwrri‑ugdrur s‑wakal lli‑d‑ikka, twrri rruḥ s‑dar rbbi lli‑stt‑id‑ifkan.

awal iggʷran n‑umslmd

⁸ kullu mayan ur‑akkʷ‑gis‑illi‑umya. ġmkan a‑s‑inna‑umslmd. kraygatt kra illan, ur‑gis amya.

⁹ lliġ iṭṭaf‑umslmd taḥkimt, ar‑isslmad mddn f‑maylli issn. ig‑n tiqqi‑ns ad‑bdda‑isflid i‑imrwasn, ar‑tn‑ituwzan ar‑tn‑issngadda.

¹⁰ izayd‑umslmd ar‑isiggil s‑iwaliwn mimnin, yara maylli igan lmɛqul ula lḥqq.

¹¹ iwaliwn n‑id‑bu‑tḥkimt gan zund ikurayn ġ‑ufus n‑umksa, gn zund tigusin ar‑tnt‑zzgan willi‑tnt‑d‑issmunn.

¹² rar lɛaql a‑iwi, a‑ur‑asn‑tzaydt yat. han tirra n‑warratn ggutnin ur‑ṭṭafnt ttmi. tugtt n‑tġri ar‑tssrmay ddat n‑bnadm.

¹³ hati tsfldt i‑kullu ma‑illan. hay‑awal iggʷran. iksaḍ rbbi, tawit‑stt bdda ġ‑luṣiyat‑ns. awal‑an a‑issmunn kullu ma‑illan f‑bnadm.

¹⁴ rbbi ra‑yut lḥukm f‑kullu ma‑ityawskarn ula kullu ma‑intln, ig‑iyt ma‑ifulkin nġd ma‑yʷh̬šnn.