2 ṣamwil 8 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

dawd issusɛa tagldit‑ns

¹ tigira n‑mayan iffuġ dawd inru ayt‑filisṭin, irẓ‑tn ikks‑asn akal n‑matag‑hammah zġ‑ufus‑nsn.

² inru ula ayt‑muwab, issġrḍ inmmaġn‑nsn f‑wakal s‑kraḍ ṣṣfuf, issġl‑tn s‑izikr. inġ gisn sin ṣṣfuf, yadj ṣṣff yaḍni iddr. wrrin gn ayt‑muwab ih̬ddamn ġ‑ddu‑ufus n‑dawd, ar‑as‑di‑tawin ḍḍabiyt.

³ iddu dawd a‑izzga tagldit‑ns f‑wakal ġ‑tama n‑wasif n‑furat, inru hadad‑ɛazar lli‑igan yus n‑raḥub agllid n‑ṣuba.

⁴ yamẓ‑as dawd alf d‑ssa n‑id‑miyya (1700) n‑umnay, d‑sin id‑mraw n‑walf (20 000) n‑urgaz lli‑iftan f‑uḍar. ibbi lɛṣbt n‑ifaddn i‑kullu‑iysan n‑lkrarṣ, ifl zġ‑gisn ma‑itqaddan miyya n‑lkurriṣa.

⁵ lliġ‑d‑uškan ayt‑aram zġ‑tmdint n‑dimašq ad‑ɛawnn hadad‑ɛazar agllid n‑ṣuba, inġ gisn dawd sin id‑mraw d‑sin‑walf (22 000) n‑urgaz n‑ayt‑aram.

⁶ iskr ilmma lqʷšlat i‑lɛskr‑ns ġ‑iduran n‑aram lli‑ilulliyn i‑dimašq. wrrin gn ayt‑aram ih̬ddamn ġ‑ddu‑ufus n‑dawd ar‑as‑di‑tawin ḍḍabiyt. ifk sidi rbbi i‑dawd a‑inru kullu manis a‑ittidu.

⁷ yasi‑d dawd timsntlin n‑uwrġ lli‑tasin‑waḍafn n‑hadad‑ɛazar, yawi‑tnt‑d s‑urušalim.

⁸ yasi‑d‑ugllid dawd anas iggutn zġ‑baṭiḥ d‑birutay lli‑ganin timdinin n‑hadad‑ɛazar.

⁹ lliġ isfld tuɛi agllid n‑ḥamat is‑inra dawd kullu inmmaġn n‑hadad‑ɛazar,

¹⁰ yazn‑d yus yuram s‑dar‑ugllid dawd, baš a‑gis‑isqsa yalġ‑t f‑mamnk a‑immaġ d‑hadad‑ɛazar inru‑t. ašku hadad‑ɛazar ikka‑tt‑in ar‑bahra‑itmmaġ d‑ugllid tuɛi. yawi‑as‑d yuram tismġurin n‑nnʷqrt d‑tin‑uwrġ d‑tin‑wanas.

¹¹ ifk‑tnt‑ugllid dawd i‑sidi rbbi, ġmklli‑as‑ifka kullu nnʷqrt d‑uwrġ lli‑d‑yiwi zġ‑dar kullu ayt‑tmizar lli‑inra.

¹² gan‑tn ayt‑adum d‑ayt‑muwab d‑ayt‑ɛammun d‑ayt‑filisṭin d‑ayt‑ɛamaliq. ifk‑as ula kra ġ‑wayda lli‑d‑ikks i‑hadad‑ɛazar yus n‑raḥub agllid n‑ṣuba.

¹³ ism n‑dawd iwrri imqqur s‑uggʷar lliġ‑d‑iwrri zġ‑tnaġa n‑tam d‑mraw n‑walf (18 000) n‑urgaz n‑ayt‑adum ġ‑uzaġar n‑tisnt.

¹⁴ iskr ilmma lqʷšlat i‑lɛskr‑ns ġ‑tmazirt n‑adum kullutt, wrrin ayt‑adum kullutn gn ih̬ddamn ġ‑ddu‑ufus n‑dawd. ifk sidi rbbi i‑dawd a‑inru kullu manis a‑ittidu.

¹⁵ ġmkan a‑s‑iḥkam dawd f‑kullu akal n‑israyil, ar‑izzga tinbaḍin n‑lḥqq ġ‑dar kullu mddn‑ns.

¹⁶ ig yuwab yus n‑ṣaruyah amzwar f‑lɛskr‑ns.