2 ṣamwil 7 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

awal n‑sidi rbbi i‑dawd

¹ izri ma‑izrin, izdġ‑ugllid dawd ġ‑tgmmi‑ns, ifk‑as sidi rbbi asunfu zġ‑inuwwašn‑ns ġ‑kraygatt tasga.

² yini‑ugllid i‑nnabi natan: «ẓr ġilad, ha nkki zdġġ ġ‑tgmmi n‑ukššuḍ n‑idgl, imma ṣṣnduq n‑rbbi hati illa ġir ġ‑uh̬iyyam.»

³ yini natan i‑ugllid: «zayd skr kullu ma‑s‑ak‑inna‑uwl‑nk, ašku sidi rbbi illa dik.»

⁴ yašk‑id‑wawal n‑sidi rbbi ġ‑iḍ‑an i‑natan yini‑as:

⁵ «ddu tinit i‑uh̬ddam‑inu dawd: ‹ha ma‑inna rbbi sidik: is‑rad‑iyi‑tbnut tigmmi ma‑ġ‑a‑zddġġ?

⁶ ur‑jji‑zdġġ ġ‑kra n‑tgmmi, zġ‑ġakud lliġ‑d‑ssiwnġ ayt‑israyil zġ‑miṣr sul s‑ġassad. ah̬iyyam a‑ġ‑skrġ tazdġt‑inu, ar‑tmattayġ zġ‑udġar s‑wayya.

⁷ kullu innas a‑tmudduġ d‑ayt‑israyil, is‑jji‑nniġ awal‑ad i‑kra ġ‑iriyasn n‑israyil lli‑uṣṣaġ ad‑kssan mddn‑inu n‑ayt‑israyil? is‑jji‑nniġ: mah̬ aylliġ ur‑jji‑yyi‑tbnim kra n‑tgmmi zġ‑ukššuḍ n‑idgl?›

⁸ «ġilad ini awal‑ad i‑uh̬ddam‑inu dawd: ‹ha ma‑inna sidi rbbi n‑lmlayka. iwiġ‑k‑id zġ‑issakan lli‑ġ‑a‑ttḍfart ulli, baš a‑tgt amzwar i‑mddn‑inu n‑ayt‑israyil.

⁹ lliġ dik nkki ġinna tkkit, ssukfġ kullu inuwwašn‑nk ġ‑lgddam‑nk. rad‑sul‑ssimġurġ ism‑nk, zund ismawn n‑inmġurn n‑ddunit.

¹⁰ hati ẓliġ akal‑ad i‑mddn‑inu n‑ayt‑israyil, ẓẓuġ‑tn gis f‑ad‑zdġn ġ‑wakal‑nsn, a‑ur‑sul‑tndudiyn. ur‑sul‑rad‑fllasn‑ttakʷln ayt‑imiġ

¹¹ zund ussan lli‑ġ‑giġ iriyasn f‑mddn‑inu n‑ayt‑israyil. ašku fkiġ‑ak asunfu ġilad zġ‑kullu inuwwašn‑nk. hati ġilad ɛlmġ‑k nkki‑ad igan rbbi sidik is‑rad‑zzgaġ tasut n‑wamud‑nk.

¹² tizi nna‑kmmln‑uwssan‑nk tgnt ġ‑gr id‑babak, rad‑ssġliġ amud n‑ddat‑nk, zzgaġ tagldit‑ns tigira‑nk.

¹³ d‑nttan a‑ra‑ibnu tigmmi i‑ism‑inu. rad‑zzgaġ lɛrš n‑tgldit‑ns kullu mayd iftan.

¹⁴ d‑ra‑t‑gġ d‑zund iwi, gġ dars ntta zund babas. iġ‑iffuġ aġaras, ra‑t‑rbbaġ s‑ukuray n‑bnadm, s‑ḍḍrbat n‑ufus n‑mddn.

¹⁵ walaynni ur‑ra‑fllas‑asiġ lḥnant‑inu izgan, ġmklli‑stt‑usiġ f‑šawl lli‑ssittiġ ġ‑lgddam‑nk.

¹⁶ rad‑bdda‑tdum‑tgldit‑nk d‑wamud n‑tgmmi‑nk ġ‑umnid‑inu, izga lɛrš‑nk kullu mayd iftan.› »

¹⁷ s‑iwaliwn‑an a‑s‑isawl natan s‑dawd ġmklli‑s‑as‑imla rbbi ma‑ra‑yili.