2 ṣamwil 6 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

yiwn‑d ṣṣnduq s‑urušalim

¹ issmun daġ dawd kullu irgazn tjhhdnin n‑israyil, gan kraḍ id‑mraw n‑walf (30 000).

² inkr dawd yawi asmun‑ns kullut s‑baɛla ġ‑yahuda, f‑a‑d‑zġ‑gis‑ssawnn ṣṣnduq n‑lɛhd n‑rbbi lli‑f‑illa ism n‑sidi rbbi n‑lmlayka, iskr zġ‑gis lɛrš‑ns ġ‑gr lmh̬luqat tjhhdnin.

³ asin‑d ṣṣnduq n‑rbbi, srsn‑t f‑yat lkurriṣa n‑ljdid, awin‑t‑id zġ‑tgmmi n‑abinadab lli‑illan f‑yat‑tuwrirt. tarwa n‑abinadab ɛuzza d‑ah̬iyu ṣugn lkurriṣa n‑ljdid

⁴ lli‑f‑illa ṣṣnduq n‑rbbi. ah̬iyu a‑stt‑iguwwdn.

⁵ ifrḥ dawd d‑ayt‑israyil kullutn ġ‑umnid n‑sidi rbbi, ar‑ttirirn s‑luṭar d‑rribab d‑illuna d‑nnaqus d‑tqrqawin.

⁶ lliġ lkmn anrar n‑nah̬un, ig‑n ɛuzza afus‑ns yamẓ ġ‑ṣṣnduq, ašku ɛṭrn imugayn lli‑ijurrn lkurriṣa.

⁷ iznd lġaḍab n‑sidi rbbi f‑ɛuzza, yut‑t rbbi ġin f‑ssibt n‑ddṣart‑ns, immt ġ‑tama n‑ṣṣnduq n‑rbbi.

⁸ iġḍb dawd ġ‑lliġ iẓra sidi rbbi ihlk ɛuzza. adġar‑an, ar‑as‑ttinin ‹fariṣ‑ɛuzza› sul s‑ġassad [tga lmɛna‑ns ‹itthlk ɛuzza›].

⁹ ġassan iwrri dawd iksuḍ zġ‑sidi rbbi, yini: «han išqa a‑d‑dari‑yašk ṣṣnduq n‑rbbi.»

¹⁰ ur‑sul‑iri dawd a‑n‑išškšm ṣṣnduq s‑tmdint n‑dawd. yawi‑t s‑tgmmi n‑ɛubid‑adum gu‑gatt.

¹¹ iqama‑n ṣṣnduq lɛhd n‑sidi rbbi kraḍ‑iyrn ġ‑tgmmi n‑ɛubid‑adum gu‑gatt, s‑ibark sidi rbbi ġ‑ɛubid‑adum d‑kullu ayt‑tgmmi‑ns.

¹² ityawnna i‑ugllid dawd: «han sidi rbbi ibark ġ‑ayt‑tgmmi n‑ɛubid‑adum d‑kullu ma‑dars‑illan f‑ssibt n‑ṣṣnduq n‑rbbi.» iddu dawd issawn‑d ṣṣnduq n‑rbbi zġ‑tgmmi n‑ɛubid‑adum s‑tmdint n‑dawd, frḥn srs mddn.

¹³ lliġ a‑zzigizn willi yusin ṣṣnduq n‑sidi rbbi wis sḍis isurufn, iġrṣ dawd i‑yan‑umugay iḍnin.

¹⁴ ar‑itakʷi dawd s‑kullu jjhd‑ns ġ‑umnid n‑sidi rbbi, ibkis s‑ubannka n‑lkttan.

¹⁵ ġmkad a‑s‑d‑issiwn dawd wala kullu ayt‑israyil ṣṣnduq n‑lɛhd n‑sidi rbbi, ar‑kullu‑ttalln awal‑nsn s‑lfrḥ ar‑kkatn s‑nnffarat.

dawd d‑mikal illis n‑šawl

¹⁶ lliġ‑d‑ikšm ṣṣnduq n‑sidi rbbi s‑tmdint n‑dawd, taggʷ‑n mikal illis n‑šawl zġ‑yan‑warryaḥ, s‑a‑ttmnad agllid dawd ar‑itakʷi ar‑itštaḥ ġ‑umnid n‑sidi rbbi, tḥgr‑t ġ‑uwl‑ns.

¹⁷ šškšmn ṣṣnduq n‑sidi rbbi, srsn‑t‑in ġ‑udġar‑ns ġ‑tuẓẓunt n‑uh̬iyyam lli‑fllas‑iskr dawd. izayd ifk isakmurn jdrnin d‑twafkiw n‑sslamt ġ‑umnid n‑sidi rbbi.

¹⁸ lliġ ikmml dawd isakmurn jdrnin d‑twafkiw n‑sslamt, ibark kullu mddn‑an s‑ism n‑sidi rbbi n‑lmlayka.

¹⁹ ifk yat‑tngult n‑uġrum d‑yan ibri n‑tfiyi d‑yat tummit n‑zzbib i‑kud yan ġ‑irgazn d‑tmġarin n‑tamunt‑an n‑ayt‑israyil, ddun ilmma mddn, kraygatt yan s‑tgmmi‑ns.

²⁰ iddu dawd a‑ibark ayt‑tgmmi‑ns, imma mikal illis n‑šawl tffuġ‑d a‑n‑dids‑tmnaggar. tini‑as: «awa ġassad imqqur‑ak ššan ay‑agllid n‑israyil, lliġ tzzudft iḍarn‑nk i‑walln n‑tmqasatin n‑imqasan‑nk zund kra n‑unafal itkksn bla iḥšm.»

²¹ yini dawd i‑mikal: «ġ‑umnid n‑sidi rbbi a‑ġ‑skrġ mayan. nttan a‑yyi‑istin ġ‑udġar n‑babam wala f‑ayt‑tgmmi‑ns kullutn, ig‑iyi d‑ugllid f‑ayt‑israyil lli‑igan mddn n‑rbbi da‑illan. ha‑yyi rad‑sul‑frḥġ ġ‑umnid n‑sidi rbbi.

²² d‑rad‑sul‑ssdulluġ ih̬f‑inu s‑uggʷar, gġ wad imẓẓin ġ‑walln‑nm, walaynni mqqurġ ġ‑dar‑tmqasatin lli‑s‑tnnit.»

²³ han mikal illis n‑šawl, ur‑jji‑turu aylliġ tmmut.