2 ṣamwil 4 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

lmut n‑išbušat

⁵ inkr rakab d‑baɛna, tarwa n‑rimmun gu‑birut, qṣadn tigmmi n‑išbušat lli‑igan yus n‑šawl. lkmn‑tt‑in ġ‑tuẓẓunt n‑wass, iḥma lḥal d‑ntta ign.

⁶ skrn is‑a‑siggiln s‑irdn, kšmn s‑ugʷns n‑tgmmi, utn‑t ġ‑waḥlig immt. injm rakab d‑gʷmas baɛna ġakudan.

⁷ ašku lliġ‑n‑kšmn ntni s‑tgmmi, ufan‑t‑in ign f‑tisi‑ns ġ‑uḥanu n‑tguni, utn‑t nġn‑t bbin‑as ih̬f. asin‑d ih̬f‑ns, ftun iḍ‑an kullut ġ‑uzaġar n‑urdun.

⁸ awin‑d ih̬f n‑išbušat i‑ugllid dawd ġ‑ḥabrun, inin i‑ugllid: «ha ih̬f n‑išbušat yus n‑unuwwaš‑nk šawl lli‑isiggiln tudrt‑nk. ha sidi rbbi yumẓ lḥqq‑nk ġassad ġ‑šawl d‑wamud‑ns a‑sidi agllid.»

⁹ imma dawd irur i‑rakab d‑gʷmas baɛna tarwa n‑rimmun gu‑birut, yini‑asn: «f‑tudrt n‑sidi rbbi lli‑d‑ifukkan rruḥ‑inu zġ‑kraygatt tassast,

¹⁰ ġakud lliġ‑d‑yuška yan inna‑yyi‑d ‹han šawl immut›, iġal is‑rad‑frḥġ s‑lah̬bar‑an. nttan umẓġ‑t nġġ‑t ġ‑ṣiqlaġ, rarġ‑as ġmkan f‑lah̬bar‑ns.

¹¹ uggʷar n‑ġayan a‑s‑rad‑rarġ ġilad i‑ayt‑lɛar‑ad ikšmn s‑dar yan iṣlaḥn, nġn‑t‑in f‑tisi‑ns ġ‑tgmmi‑ns. is‑ur‑ra‑giwn‑amẓġ lḥqq n‑idammn‑ns, fnuġ‑kʷn zġ‑wakal?»

¹² yamr dawd iɛyyaln‑ns ġakudan, nġn‑tn bbin‑asn ifassn d‑iḍarn, agʷln‑tn ġ‑tama n‑ifrḍ n‑ḥabrun. imma ih̬f n‑išbušat, iwin‑t mḍln‑t‑in ġ‑umḍḍal n‑abnar ġ‑ḥabrun.