2 ṣamwil 2 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

iġli dawd s‑tgldit n‑ayt‑yahuda

¹ ġakudan a‑isqsa dawd sidi rbbi yini: «is‑ad‑awnġ s‑kra n‑tmdint ġ‑tmazirt n‑yahuda?» yini‑as‑d: «awn.» isqsa‑t dawd: «manta gisnt a‑s‑rad‑awnġ?» yini‑as: «ḥabrun.»

² yawn dawd s‑ḥabrun ntta d‑tmġarin‑ns s‑snat. gant aḥinuɛam ullt‑izraɛil d‑abigayil tahjjalt n‑nabal gu‑karmal.

³ yawi dids dawd irgazn n‑usmun‑ns, kud yan d‑ayt‑tgmmi‑ns. zdġn kullu ġ‑ḥabrun d‑iduran‑ns.

⁴ aškin‑d ilmma imġarn n‑yahuda, ẓẓġurn dawd a‑ig agllid f‑ayt‑yahuda. inin ilmma i‑dawd: «ayt‑yabiš ġ‑gilɛad, ntni a‑n‑imḍln šawl.»

⁵ yazn dawd irqqasn s‑dar ayt‑yabiš ġ‑gilɛad, yini‑asn: «a‑kʷn‑ibark sidi rbbi, ašku tayri izgan a‑tskrm ġ‑siditun šawl lliġ‑t‑in‑tmḍlm.

⁶ a‑didun‑iskr sidi rbbi ġilad s‑lḥnant izgan d‑tayri idumn. ula nkki ra‑giwn‑skarġ afulki f‑ssibt n‑maylli tskrm.

⁷ gat‑n tiqqi‑nun ġilad tzɛmm. wah̬h̬a immut siditun šawl, ẓẓġurn‑iyi ayt‑yahuda ad‑fllasn‑gġ agllid.»

išbušat iga agllid f‑ayt‑israyil

⁸ imma amzwar f‑lɛskr n‑šawl, ism‑ns abnar yus n‑nar, yiwi išbušat lli‑igan yus n‑šawl, izzri‑t s‑maḥanaym ġ‑tsga yaḍni n‑wasif n‑urdun,

⁹ ig‑t‑in d‑ugllid f‑tmizar n‑gilɛad d‑ašur d‑izraɛil d‑afraym d‑bnyamin ula f‑kullu ayt‑israyil.

¹⁰ išbušat yus n‑šawl, llan dars kkuẓ id‑mraw (40) n‑usggʷas lliġ‑t‑in‑gan d‑ugllid f‑israyil, iḥkam sin isggʷasn. imma ayt‑tqbilt n‑yahuda ḍfurn dawd.

¹¹ ig dawd agllid f‑ayt‑yahuda ssa n‑isggʷasn d‑sḍis‑iyrn ġ‑ḥabrun.