2 ṣamwil 12 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

awal n‑natan i‑dawd

¹ yazn‑d sidi rbbi natan i‑dawd. lliġ‑t‑in‑ilkm yini‑as: «kkan‑tt‑in ġ‑yat‑tmdint sin irgazn. yan iṭṭaf ma‑iggutn, yan ur‑dars yat.

² walli dar iggut, iṭṭaf tugtt n‑uwlli d‑tugtt n‑imugayn,

³ imma wayya igllin ur‑iṭṭaf abla yat‑tlqqaġt imẓẓin lli‑d‑isġa. issnkr‑tt‑id ġ‑dars, ar‑di‑ttimġur ġ‑gr tarwa‑ns, ar‑tštta ġ‑aylli ištta, ar‑tssa ġ‑uruku‑ns nttan, ar‑tgan f‑idmarn‑ns, tg dars zund illis.

⁴ yan‑wass yašk‑id yan‑unbgi dar‑urgaz lli‑iṭṭafn ma‑iggutn, ur‑iri a‑iġrṣ i‑yat zġ‑uwlli‑ns nġd imugayn‑ns a‑t‑id‑isrs i‑unbgi lli‑d‑dars‑yuškan. inkr ikks‑d i‑igllin‑an talqqaġt‑ns, iġrṣ‑as isrs‑tt‑in i‑unbgi‑ns.»

⁵ dawd, iznd gis lġaḍab f‑urgaz‑an, yini i‑natan: «f‑tudrt n‑sidi rbbi, iqqan‑d a‑immt‑urgaz lli‑iskrn ġayan.

⁶ ula talqqaġt‑an, ad‑as‑tt‑irar f‑kkuẓṭ‑twal lliġ‑as‑iskr ġmkan, ašku han ur‑gis‑iḥnna.»

⁷ yini natan ġakudan i‑dawd: «kiyin a‑igan argaz‑an. ha ma‑inna rbbi da‑bdda‑illan ig rbbi n‑ayt‑israyil: ‹ẓẓġurġ‑k a‑tgt agllid f‑israyil, fukkuġ‑k zġ‑ufus n‑šawl,

⁸ fkġ‑ak ula tigmmi n‑sidik d‑tmġarin‑ns ġ‑gr ifassn‑nk. fkġ‑ak ayt‑israyil d‑ayt‑yahuda. iġ‑ur‑k‑yuwdi mayan, zaydġ‑ak sul uggʷar.

⁹ mah̬ a‑tḥgrt awal n‑rbbi sidik, tskrt ma‑yʷh̬šnn ġ‑iẓri‑nu? ha kiyi tutt uriyah gu‑ḥit s‑uwzzal, tkkst‑as‑d tamġart‑ns a‑tg tink. tnġt‑t s‑uwzzal n‑ayt‑ɛammun,

¹⁰ ġilad ur‑sar‑ityattay‑uwzzal f‑ayt‑tgmmi‑nk. ašku tḥgrt‑iyi tawit tamġart n‑uriyah gu‑ḥit a‑tg tink.›

¹¹ ha ma‑inna sidi rbbi: ‹rad‑fllak‑ssnkrġ ššrr ġ‑ugʷns n‑tgmmi‑nk, kksġ‑ak ula timġarin‑nk ġ‑lgddam n‑walln‑nk, fkġ‑tnt i‑unggu‑nk, ar‑didsnt‑iggan iban ġ‑tuẓẓunt n‑wass.

¹² kiyi tskrt‑t ġ‑tntla, imma nkki rad‑ak‑skrġ ġayan iban ġ‑tuẓẓunt n‑wass a‑t‑ẓrn kullu ayt‑israyil.› »

¹³ yini dawd i‑natan: «ʷh̬šnġ nkki s‑sidi rbbi.» yini‑as natan: «sidi rbbi issmatti fllak lh̬ʷšant lli‑tskrt, ur‑ra‑tmmtt.

¹⁴ walaynni lliġ tḥgrt sidi rbbi bahra s‑uskkir‑an, ra‑immt‑warraw lli‑rad‑ak‑ilal.»

¹⁵ iddu natan ġakudan s‑tgmmi‑ns. yut sidi rbbi arraw lli‑turu‑tmġart n‑uriyah i‑dawd, iwrri yaḍn bahra.

immut‑warraw n‑dawd

¹⁶ dawd ar‑isiggil rbbi f‑ssibt n‑warraw, yaẓum izayd sul yaẓum, ikšm iġrḍ f‑wakal iḍ kullut.

¹⁷ biddn‑d fllas imġarn n‑tgmmi‑ns, irin a‑t‑ssnkrn zġ‑wakal, imma nttan yagʷi, d‑ur‑iqbil a‑didsn‑išš aġrum.

¹⁸ wis ssa n‑uwssan immt‑warraw. iksaḍn imqasan n‑dawd ad‑as‑inin immut, ašku nnan i‑ngratsn: «ẓrat, lliġ sul iddr‑warraw, ur‑a‑yaġ‑isflid lliġ a‑srs‑nsawal. mamnk a‑rad‑as‑nini: ‹han arraw immut›? iẓḍar a‑iskr kra yʷh̬šnn ġ‑ih̬f‑ns.»

¹⁹ walaynni lliġ iẓra dawd imqasan‑ns ar‑tmšmušn i‑ingratsn, yissan is‑immut‑warraw. isqsa‑tn: «izd immut‑warraw?» inin‑as‑d: «immut.»

²⁰ inkr dawd ġakudan zġ‑wakal, isird iẓẓġur ih̬f‑ns ibddl timlsa‑ns, ikšm s‑udġar n‑sidi rbbi iknu‑as. iwrri‑d ilmma s‑tgmmi‑ns, iḍalb ma‑ištta. srsn‑as‑t‑id, išš.

²¹ inin‑as ilmma imqasan‑ns: «mayd tskrt? lliġ sul iddr‑warraw, taẓumt ar‑fllas‑tallat. lliġ immut, tnkrt ar‑tšttat.»

²² yini‑asn: «lliġ‑sul‑iddr‑warraw, aẓumġ ar‑allaġ ašku nniġ: ‹ma‑issnn is‑ra‑yyi‑d‑irḥm sidi rbbi, yadj arraw iddr.›

²³ ġilad ġ‑immut, ma‑f‑rad‑sul‑aẓumġ? is‑ẓḍarġ a‑t‑id‑rarġ s‑tudrt? rad‑dduġ nkki s‑dars, walaynni ur‑ra‑d‑iwrri ntta s‑dari.»

²⁴ iddu dawd isshnnu tamġart‑ns batšibaɛ, ign dids ikšm fllas, taru‑as arraw yaḍni, ig‑as ism suliman. iɛzzu suliman bahra dar sidi rbbi.

²⁵ yazn‑d sidi rbbi awal f‑imi n‑nnabi natan, ig‑as ism ‹yadidayah› ašku ‹iɛzza dar sidi rbbi›.