2 ṣamwil 11 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

dawd d‑tmġart n‑uriyah

¹ lliġ‑d‑ikšm‑uzmz n‑tuga, ig azmz lli‑ġ‑a‑tffuġn igldan s‑imiġ, yazn dawd amzwar‑ns yuwab d‑iriyasn‑ns d‑iɛskriyn n‑ayt‑israyil, ddun ar‑kkatn ayt‑ɛammun, glin tamdint n‑rabba. imma dawd iqama ġ‑urušalim.

² yat‑tdggʷat inkr‑d dawd zġ‑tisi‑ns, ar‑itlulliy ġ‑ukʷfaf n‑tgmmi n‑tgldit‑ns, s‑a‑n‑itmnad yat‑tmġart ar‑tsirid i‑ih̬f‑ns, hatti tfulki bahra i‑iẓri.

³ yazn dawd isqsa ġ‑tmġart‑an. yini‑as‑d yan: «nttat, is‑ur‑tgi batšibaɛ illis n‑aliɛam, tg tamġart n‑uriyah gu‑ḥit?»

⁴ yazn srs dawd irqqasn a‑stt‑id‑awin. tašk‑id s‑dars, ign dids. d‑nttat ġassan a‑tsird zġ‑usggʷrd. twrri ilmma s‑tgmmi‑ns.

⁵ tffuġ‑tmġart tasi aḥlig, tazn s‑dawd tini‑as: «ha‑yyi ar‑rbbuġ.»

⁶ yazn dawd s‑yuwab yini‑as: «azn‑iyi‑d uriyah gu‑ḥit.» yazn‑as‑t‑id yuwab.

⁷ lliġ‑d‑ikšm uriyah s‑dar dawd, isqsa‑t dawd f‑yuwab d‑lɛskr mamnk ad‑gan, isqsa‑t f‑lah̬bar n‑imiġ.

⁸ yini ilmma i‑uriyah: «zayd s‑tgmmi‑nk tsunfut.» iffuġ‑d uriyah zġ‑tgmmi n‑ugllid, isstabɛa‑yas dawd yat‑tsmġurt.

⁹ walaynni ur‑ihuwwd uriyah s‑tgmmi‑ns. ign nttan ġ‑dar imi n‑tgmmi n‑ugllid ġ‑gr imqasan n‑sidis.

¹⁰ inin ġakudan i‑dawd: «uriyah ur‑ihuwwd s‑tgmmi‑ns.» yini dawd i‑uriyah: «is‑urd‑bḥra‑di‑tuškit zġ‑umuddu? mah̬ aylliġ ur‑thuwwdt s‑tgmmi‑nk?»

¹¹ yini‑d uriyah i‑dawd: «han ṣṣnduq n‑lɛhd, nttan d‑iɛskriyn n‑israyil d‑yahuda, llan kullu ġ‑iḥšaš, isrs sidi yuwab d‑imqasan‑nk a‑sidi ġ‑lh̬la. is‑rad‑dduġ nkki s‑tgmmi‑nu ar‑šttaġ ar‑ssaġ gnġ d‑tmġart‑inu? f‑tudrt‑nk ula tudrt n‑uwl‑nk, ur‑skarġ ġmkan.»

¹² yini dawd i‑uriyah: «qama sul ġid ġassad, azkka adjġ‑k a‑tddut.» iqama uriyah ġ‑urušalim ass‑an d‑ndid azkka‑ns.

¹³ iġr‑as dawd a‑dids‑išš isu dids, ifk‑as aman n‑waḍil iktin aylliġ imlilliy. walaynni lliġ yaġ‑uzal, iftu a‑ign ġ‑ufawwu‑ns ġ‑gr imqasan n‑sidis, ur‑iddi s‑tgmmi‑ns.

¹⁴ zikk ṣbaḥ yara dawd yat‑tbrat i‑yuwab, yazn‑tt ġ‑ufus n‑uriyah.

¹⁵ yura ġ‑tbrat‑an: «g‑n uriyah ġ‑ṣṣff n‑lgddam ġ‑illiġ išqa imiġ, twrrim‑d fllas a‑ittut immt.»

¹⁶ izayd yuwab igli tamdint, ig‑n uriyah ġ‑illi‑s‑issn is‑gis inuwwašn tjhhdnin.

¹⁷ ffuġn‑d inmmaġn n‑ayt‑tmdint ġakudan, mmaġn d‑yuwab. iḍr kra ġ‑irgazn n‑dawd, immt ula uriyah gu‑ḥit.

¹⁸ yazn yuwab lah̬bar n‑imiġ i‑dawd,

¹⁹ yuṣṣu arqqas yini‑as: «sslkm kullu lah̬bar n‑imiġ i‑ugllid,

²⁰ walaynni iġ‑ilmma‑iqlaql irar‑ak: ‹mah̬ aylliġ‑n‑bahra‑takmurm s‑tmdint a‑didsn‑tmmaġm? mah̬ ur‑tssinm is‑rad‑kkatn s‑iẓḍkan zġ‑iggi n‑igudar?

²¹ ma‑yadlli‑inġan abimalik yus n‑yarubbušat? is‑urd tamġart a‑d‑fllas‑iluḥn aẓru n‑uzrg zġ‑iggi n‑ugadir, immt ġ‑tmdint n‑tabaṣ? mah̬ a‑n‑takmurm kunni s‑ugadir?› tinit‑as ġakudan awal‑ad: ‹han amqasa‑nk uriyah gu‑ḥit ula nttan immut.› »

²² iddu‑urqqas‑lli s‑dar dawd, ifk‑as kullu lah̬bar ġmklli‑s‑as‑inna yuwab.

²³ yini‑as‑urqqas: «tjhhdn fllanġ inuwwašn, ffuġn‑d srnġ s‑brra n‑tmdint, walaynni nrur‑tn ar imi n‑tmdint.

²⁴ utn‑aġ‑d id‑bu‑lqus zġ‑iggi n‑ugadir, iḍr kra ġ‑imqasan n‑ugllid, immt‑ula‑umqasa‑nk uriyah gu‑ḥit.»

²⁵ yini dawd i‑urqqas: «sslkm awal‑ad i‑yuwab: ‹ad‑ur‑gik‑iqama ġayan. ašku uzzal, ur‑tssint manwa ra‑išš. zayd ar‑tkkat tamdint s‑jjhd tnrut‑stt.› zzɛam‑t ġilad s‑wawal‑an.»

²⁶ lliġ tsfld‑tmġart n‑uriyah is‑immut‑urgaz‑ns, ar‑talla f‑urgaz‑ns.

²⁷ lliġ zrin‑uwssan n‑lɛzzat‑ns, yazn srs dawd. yawi‑tt‑id s‑tgmmi‑ns itahl‑tt, taru‑as yan‑warraw. walaynni ġaylli iskr dawd, hati yʷh̬šn ġ‑iẓri n‑sidi rbbi.