2 igldan 6 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ališaɛ d‑uglzim

¹ yan‑wass sawln‑d lanbiya n‑tamunt lli‑illan d‑ališaɛ inin‑as: «hati tnukma‑srnġ‑tgmmi‑ad ġ‑dark‑nzdġ.

² ġir adj‑aġ a‑nddu s‑tama n‑urdun f‑a‑d‑zġ‑gis‑yasi kud yan ginġ yan‑usatur ma‑s‑a‑nbnnu maniġ a‑nzddġ.» yini‑asn: «zaydat.»

³ yini‑as ilmma yan gisn: «rwaḥ a‑sidi, mun didnġ.» yini‑d: «ra‑nmun.»

⁴ imun didsn. lliġ‑n‑lkmn asif n‑urdun, ar‑tbbin iṣġarn.

⁵ lliġ a‑itbbi yan gisn aṣġar, iḍr‑as‑n ih̬f n‑uglzim ġ‑waman dranin, ig taġuyit yini: «aḥḥ‑inu a‑sidi, ġir rḍlġ‑t‑id.»

⁶ yini‑as‑uh̬ddam n‑rbbi: «maniġ‑ak‑n‑iḍr?» iml‑as illiġ‑as‑n‑iḍr. ibbi‑d ališaɛ yan‑ukuray, iluḥ‑t‑in ġin, s‑d‑iġli‑uwzzal f‑waman, yini‑as: «asi‑t‑id.»

⁷ imdi‑n afus‑ns yasi‑t‑id.

isan d‑lkrarṣ n‑lɛafiyt

⁸ lliġ a‑itmmaġ‑ugllid n‑aram d‑ayt‑israyil, ar‑itmšawar d‑iriyasn‑ns yini‑asn: «rad‑asn‑nmdi ġ‑udġar n‑flan.»

⁹ yazn‑uh̬ddam n‑rbbi s‑ugllid n‑israyil ġakudan yini‑as: «ad‑ur‑tzrit ġ‑udġar n‑flan. han mdin‑ak gis ayt‑aram.»

¹⁰ irar‑ugllid n‑israyil lɛaql ġ‑illif‑t‑iɛlm‑uh̬ddam n‑rbbi. ġmkan a‑s‑imyur a‑t‑itɛlam, aylliġ injm mnnawt‑twal.

¹¹ ṭiyr bahra i‑ugllid n‑aram f‑mayan, issmun‑d iriyasn‑ns yini‑asn: «mlayt‑iyi manwa giwn a‑itkkan ljiht n‑ugllid n‑israyil?»

¹² isawl‑d yan ġ‑iriyasn‑ns yini‑as: «uhu a‑sidi agllid. han ališaɛ lli‑igan nnabi ġ‑israyil, ar‑ittini i‑ugllid n‑israyil iwaliwn lli‑ttinit kiyi ula ġ‑uḥanu lli‑ġ‑a‑tggant.»

¹³ yini‑asn: «zaydat tsigglm srs maniġ illa, f‑a‑srs‑aznġ ma‑t‑id‑itamẓn.» inin‑as ilmma: «hatin illa ġ‑tmdint n‑dutan.»

¹⁴ yazn iysan d‑lkrarṣ d‑iɛskriyn ggutnin, lkmn d‑iyḍ, glin tamdint‑an.

¹⁵ zikk ṣbaḥ inkr‑d‑uh̬ddam n‑umqasa n‑rbbi iffuġ, s‑n‑iẓra iɛskriyn ggutnin d‑iysan d‑lkrarṣ sutln i‑tmdint. iwrri yini i‑sidis: «aḥḥ a‑sidi, ma‑ra‑nskr?»

¹⁶ yini‑as ališaɛ: «ad‑ur‑tiksaḍt ašku willi didnġ illan utin willi didsn illan.»

¹⁷ iẓẓall ališaɛ yini: «wa sidi rbbi, ġir a‑trẓmt alln‑ns a‑yisfiw.» irẓm sidi rbbi alln n‑uɛyyal s‑iẓra ma‑illan. han adrar‑an iɛmmr s‑iysan d‑lkrarṣ n‑lɛafiyt sutln i‑ališaɛ.

¹⁸ lliġ‑d‑huwwdn ayt‑aram a‑t‑amẓn, iẓẓall ališaɛ i‑sidi rbbi yini‑as: «ġir a‑tutt mddn‑an s‑ubukḍ.» yut‑tn‑d ġakudan s‑ubukḍ ġmklli iḍalb ališaɛ.

¹⁹ isawl srsn ališaɛ yini‑asn: «hati ijla‑yawn‑uġaras, tjlu‑yawn‑tmdint. ḍfurat‑iyi ġilad, a‑kʷn‑awiġ s‑dar walli tsiggilm.» izwur‑asn s‑tmdint n‑samira.

²⁰ lliġ‑n‑kšmn s‑samira iẓẓall ališaɛ yini: «wa sidi rbbi, rẓm alln n‑mddn‑an ad‑mnadn.» irẓm sidi rbbi alln‑nsn, s‑ẓran ih̬fawn‑nsn ġ‑tuẓẓunt n‑samira.

²¹ ġir yukʷz‑tn‑d‑ugllid n‑israyil, yini i‑ališaɛ: «izd a‑tn‑utġ, a‑baba? izd a‑tn‑utġ?»

²² irar‑as: «uhu, a‑ur‑tn‑tutt. is‑izri a‑tnġt willi‑di‑tumẓt s‑tuzzalt d‑lqus? srs‑asn‑d aġrum d‑waman ad‑ššn sun, ddun ilmma s‑dar siditsn.»

²³ iskr‑asn‑ugllid imkli imqqurn. lliġ ššan sun, irẓm‑asn, ddun s‑dar siditsn. zġ‑tizi‑an ur‑sul‑a‑di‑tgguzn ayt‑aram a‑n‑akʷrn zġ‑wakal n‑israyil.