2 igldan 4 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ališaɛ d‑zzit n‑thjjalt

¹ tašk‑id‑tmġart n‑yan nnabi zġ‑tamunt n‑lanbiya s‑dar ališaɛ, tssmummʷi fllas tini: «wa sidi, argaz‑inu immut. kiyi tssnt is‑iga wad bahra ituqqarn sidi rbbi. ġilad yuška‑d sri walli‑as‑iḍfurn, yiri a‑yawi tarwa‑nu s‑sin ad‑as‑gn ismgan.»

² yini‑as ališaɛ: «ma‑trit ad‑am‑t‑skrġ? ini‑yyi‑d mad‑darm‑illan ġ‑tgmmi?» tini‑as: «a‑sidi, ur‑dari yat ġ‑tgmmi abla yat‑tbʷqqalt n‑zzit.»

³ yini‑as ališaɛ: «ffuġ ġilad trḍlt‑d irukutn h̬wanin zġ‑dar tadjarin‑nm kullutnt. a‑ur‑mẓẓin irukutn‑an ula drusn.

⁴ tkšmt ilmma s‑tgmmi, tqqnt‑d tiflut f‑ih̬f‑nm d‑tarwa‑nm, tzaydt ar‑ttffit zzit lli‑darm‑illan ġ‑irukutn‑an kullutn. wanna iɛmmrn, tssanft‑t f‑tsga.»

⁵ tddu‑tmġart s‑tgmmi‑ns, tqqn‑d tiflut f‑ih̬f‑ns nttat d‑tarwa‑ns. ar‑as‑di‑tawin tarwa irukutn‑an h̬wanin, ar‑gisn‑ttffi zzit.

⁶ lliġ ɛmmrn irukutn kullutn, tini daġ i‑yus: «awi‑d aruku yaḍni.» irar‑as‑d: «ur‑sul‑iqama kra n‑uruku.» s‑tbbi zzit ġakudan.

⁷ tašk‑id ilmma tini ma‑ijran i‑uh̬ddam n‑rbbi. yini‑as ġakudan: «ddu tzznzt zzit, tfrut d‑walli‑am‑iḍfurn. aynna‑d‑iqaman, tɛišt srs kmmi d‑tarwa‑nm.»

ališaɛ d‑yus n‑uwllt‑šunam

⁸ yan‑wass izri ališaɛ ġ‑tmdint n‑šunam. tzdġ gis yat‑tmġart iṭṭafn ayda, tssbrrk‑t ad‑darsn‑išš aġrum. zġ‑ġassan tasawnt, luqt nna‑izri zġ‑uġaras‑an, ar‑darsn‑ittidu a‑išš tirmt.

⁹ tini ilmma i‑urgaz‑ns: «hati ġilad ssnġ argaz lli‑darnġ‑itkkan, izd ah̬ddam n‑rbbi a‑iga.

¹⁰ nkr ad‑as‑nbnu yat tadwarit s‑iġurban ġ‑ukʷfaf f‑iggi n‑tgmmi, ng‑as gis tisi d‑lmida d‑lkursi d‑lqndil, a‑gis‑itgawar ġakud nna‑d‑darnġ‑yuška.»

¹¹ yan‑wass yašk‑id ališaɛ, ikšm s‑tadwarit isunfu gis.

¹² yini ilmma i‑uh̬ddam‑ns giḥzi: «ġr‑d i‑tmġart‑ad ullt‑šunam.» iġr‑as‑d, tašk‑id tbidd ġ‑umnid‑ns.

¹³ yuṣṣa‑t a‑yini i‑tmġart: «hati tssiḥlt ih̬f‑nm fllanġ. imma ġilad ma‑trit ad‑am‑t‑nskr? is‑a‑nini kra f‑ssibt‑nm i‑ugllid nġd anmġur n‑lɛskr?» trar‑as‑d: «ha‑yyi zdġġ ġ‑gr mddn‑inu.»

¹⁴ isqsa daġ ah̬ddam‑ns: «walaynni ma‑rad‑as‑nskr?» isawl‑d giḥzi yini‑as: «ur‑dars tarwa, d‑urgaz‑ns yuwssr.»

¹⁵ yini‑as ališaɛ: «ġr‑as‑d daġ.» iġr‑as‑d, tbidd ġ‑dar imi.

¹⁶ yini‑as ališaɛ: «zund tizi‑ad ġ‑usggʷas da‑d‑yuškan, ra‑tasit iwim ġ‑gr ifassn‑nm.» trar‑as‑d: «uhu a‑sidi, ay‑ah̬ddam n‑rbbi, ad‑ur‑ṭṭnaẓt ġ‑th̬ddamt‑nk.»

¹⁷ walaynni tffuġ ar‑trbbu, taru yan‑warraw ġ‑tizi lli‑s‑as‑inna ališaɛ ġ‑usggʷas‑an‑d‑yuškan.

¹⁸ yimġur‑uḥšmi, iffuġ yan‑wass s‑dar babas lli‑n‑illan ġ‑dar išuwwaln.

¹⁹ yini ġakudan i‑babas: «aḥḥ‑inu, inġa‑yyi ih̬f bahra. aḥḥ a‑ih̬f‑inu.» yini babas i‑yan ġ‑ih̬ddamn‑ns: «asi‑t s‑dar innas.»

²⁰ yasi‑t yawi‑t i‑innas. igawr‑uḥšmi ġ‑igiwal n‑innas ar tuẓẓunt n‑wass immt.

²¹ tġli‑tmġart s‑ukʷfaf, tsrs‑t‑in f‑tisi n‑uh̬ddam n‑rbbi, tqqn‑d fllas tiflut tffuġ.

²² tġr i‑urgaz‑ns tini: «azn‑iyi‑d yan zġ‑ih̬ddamn d‑tġyult, f‑ad‑ḥarruġ s‑dar‑uh̬ddam n‑rbbi wrriġ‑d ilmma.»

²³ yini‑as: «mah̬ aylliġ ra‑dars‑tddut ġassad? ur‑igi lɛid n‑wayyur nġd ass n‑usunfu.» tini‑as: «ihnna lḥal.»

²⁴ tḥlls taġyult tini i‑uh̬ddam: «ṣug‑tt s‑zzrb. a‑ur‑fllas‑talwat ard‑ak‑t‑iniġ.»

²⁵ tssudu aylliġ tlkm dar‑uh̬ddam n‑rbbi ġ‑udrar n‑karmal. lliġ‑tt‑in‑iẓra‑uh̬ddam n‑rbbi ġ‑tuggugt, yini i‑uh̬ddam‑ns giḥzi: «han ullt‑šunam ayan.

²⁶ azzl ġil ġil tmnaggart‑stt‑in tsqsat‑stt: ‹is‑darm‑ihnna lḥal? is‑ihnna lḥal dar‑urgaz‑nm? is‑ihnna lḥal dar‑uḥšmi?› » trar‑as‑d ġakudan: «ihnna lḥal.»

²⁷ lliġ‑n‑tlkm s‑dar‑uh̬ddam n‑rbbi ġ‑udrar, tḍr‑n f‑iḍarn‑ns tamẓ gisn. yiri giḥzi a‑stt‑issitti, walaynni ah̬ddam n‑rbbi inna: «adj‑tt, ašku tḥawl‑as‑tguḍi, d‑nkki issntl‑t flla sidi rbbi, ur‑iyi‑stt‑imli.»

²⁸ tini‑as: «izd nkkin ad‑zġ‑gik‑iḍalbn arraw a‑sidi? is‑ur‑ak‑nniġ: ‹ad‑ur‑gigi‑ṭṭnaẓt›?»

²⁹ yamr ališaɛ i‑giḥzi yini‑as: «ass taggʷst‑nk, tasit aɛmud‑inu tddut. iġ‑tmnaggart kra n‑yan, ad‑ur‑fllas‑tsllmt. iġ‑ak‑d‑inna kra n‑yan sslam, ad‑as‑ur‑trart awal. zayd tsrst aɛmud‑inu f‑uwdm n‑uḥšmi.»

³⁰ tsawl‑d ilmma innas n‑uḥšmi tini‑as: «f‑tudrt n‑sidi rbbi d‑tudrt‑nk, ur‑k‑ffalġ.» inkr ġakudan iḍfur‑tt.

³¹ giḥzi ntta izwur‑tn ilkm‑n, isrs aɛmud f‑uwdm n‑uḥšmi, walaynni ur‑isawl‑uḥšmi ula immuss. iwrri‑d a‑n‑imnaggur d‑ališaɛ yini‑as: «ur‑ifaq‑uḥšmi.»

³² ilkm ališaɛ tigmmi, iẓr aḥšmi immut ittrs f‑tisi‑ns.

³³ ikšm s‑tadwarit, iqqn‑d tiflut fllasn s‑sin, iẓẓall ar‑itḍalab sidi rbbi.

³⁴ inkr ilmma iẓl f‑uḥšmi, issmnaggar imi‑ns d‑win‑uḥšmi, d‑walln‑ns d‑tins, d‑ifassn‑ns d‑wins. imikk, sul fllas iẓl, ar‑di‑ttḥmu ddat n‑uḥšmi.

³⁵ inkr ališaɛ ar‑ifttu ġ‑tadwarit. iddu iwrri‑d iẓl daġ fllas. aḥšmi ġakudan, tut‑t tinzi ssa n‑twal, s‑d‑irẓm alln‑ns.

³⁶ iġr ališaɛ i‑giḥzi yini‑as: «ġr‑d i‑ullt‑šunam.» iġr‑as‑d. lliġ‑d‑dars‑tuška, yini‑as: «asi yum.»

³⁷ tašk‑id tknu ar akal ġ‑dar iḍarn‑ns, tasi ilmma yus tffuġ.