2 igldan 23 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

yušiyah issġus tamazirt‑ns

¹ yazn‑ugllid yušiyah ġakudan ad‑d‑dars‑munn kullu imġarn n‑yahuda d‑urušalim.

² yawn‑ugllid s‑tgmmi n‑sidi rbbi, munn dids ayt‑yahuda d‑imzdġn n‑urušalim d‑imsakmurn d‑lanbiya, d‑mddn kullutn zġ‑wid mẓẓinin ar wid mqqurnin. ar‑fllasn‑yaqra kullu iwaliwn lli‑illan ġ‑warra n‑lɛhd lli‑ityafan ġ‑tgmmi n‑sidi rbbi.

³ ibidd‑ugllid ġ‑tama n‑tannalt, iskr lɛhd ġ‑gras d‑sidi rbbi baš a‑ifttu ġ‑uġaras n‑sidi rbbi, ar‑tt‑itawi ġ‑luṣiyat‑ns d‑tuggʷa‑ns d‑tnbaḍin‑ns zġ‑ttmi n‑uwl‑ns d‑ttmi n‑ih̬f‑ns, ar‑bdda‑iskar s‑iwaliwn n‑lɛhd lli‑tyaranin ġ‑warra‑yan. kšmn ula mddn‑an kullutn ġ‑lɛhd‑an.

⁴ izayd‑ugllid yamr amsakmur ihiyyan ḥilqiyah, d‑imsakmurn yaḍni, d‑waḍafn n‑imi, ad‑ssufġn zġ‑tgmmi n‑sidi rbbi kullu irukutn lli‑ityawskarn i‑‹baɛl› d‑‹ašrah› d‑itran n‑ignwan. ijdr‑tn ġ‑brra n‑urušalim ġ‑igran ġ‑talat n‑qidrun, yawi iġd‑nsn s‑bayt‑il.

⁵ issmsr igurramn lli‑sttin‑kkan ẓlin‑tn igldan n‑yahuda a‑tbh̬h̬arn f‑ikʷrkar ġ‑tmdinin n‑yahuda d‑iduran n‑urušalim. issmsr ula willi itbh̬h̬arn i‑‹baɛl› ula tafukt ula ayyur ula imanarn ula kullu itran n‑ignwan.

⁶ issufġ taggjdit n‑‹ašrah› zġ‑tgmmi n‑sidi rbbi, yawi‑tt s‑talat n‑qidrun ġ‑brra n‑urušalim, ijdr‑tt ġ‑talat n‑qidrun, ikkʷm‑tt aylliġ tga iġd, izuzzr‑t f‑ismḍal n‑ayt‑tmdint.

⁷ ih̬lu tiḥuna n‑imggann imkiriyn lli‑illan ġ‑tgmmi n‑sidi rbbi, ula tin‑tmġarin lli‑izṭṭan ijwayn i‑‹ašrah›.

⁸ issufġ yušiyah kullu imsakmurn lli‑illan ġ‑tmdinin n‑yahuda. inds‑asn ikʷrkar lli‑f‑a‑tbh̬h̬arn, zġ‑ttmi n‑gibɛa ar ttmi n‑bir‑šibaɛ. ih̬lu ikʷrkar ġ‑imawn n‑tmdinin, ih̬lu ula akrkur lli‑illan ġ‑tsga taẓlmaṭṭ n‑imi n‑yahušuɛ lli‑igan lḥakm n‑tmdint.

⁹ ur‑yudji imsakmurn‑an n‑ikʷrkar ad‑d‑awnn s‑dar tisi n‑tġrṣi n‑sidi rbbi ġ‑urušalim, walaynni ar‑šttan arh̬ṣiṣ d‑imsakmurn yaḍni.

¹⁰ inds‑n‑ugllid ula afarnu n‑‹tufat› lli‑illan ġ‑talat n‑yus n‑hinnum, a‑ur‑n‑sul‑idḥi yan yus nġd illis i‑lɛafiyt f‑rbbi‑ns ‹mulah̬›.

¹¹ issitti iysan lli‑stt‑in‑kkan ẓlin‑tn igldan n‑yahuda i‑‹tafukt› ġ‑dar imi n‑tgmmi n‑sidi rbbi, ġ‑tama n‑uḥanu n‑natan‑malah̬ lli‑igan amqasa n‑ugllid, ijdr lkrarṣ n‑‹tafukt› s‑lɛafiyt.

¹² ih̬lu‑ugllid tisiwin n‑tġrṣi lli‑stt‑in‑kkan skrn‑tnt igldan n‑ayt‑yahuda f‑ukʷfaf ġ‑iggi n‑uḥanu n‑aḥaz, ula tisiwin lli‑iskr manaššah ġ‑sin isaragn n‑tgmmi n‑sidi rbbi, irẓ‑tnt kullu ar‑n‑itffi igzman‑nsnt ġ‑talat n‑qidrun.

¹³ inds‑ugllid ikʷrkar lli‑illan ġ‑brra n‑urušalim ġ‑tsga n‑usġlay n‑tafukt ġ‑tama n‑uwrir n‑h̬ziyt [lli‑igan awrir n‑zzitun]. ikʷrkar‑an, ibna‑tn suliman agllid n‑israyil i‑‹ɛašturat› lli‑igan jjlih̬t n‑ayt‑ṣidun, d‑‹kamuš› lli‑igan jjlih̬t n‑ayt‑muwab, d‑‹milkum› lli‑igan jjlih̬t n‑ayt‑ɛammun.

¹⁴ irẓ yušiyah ifariwn‑an, ibbi tiggjda n‑‹ašrah›, iɛmmr idġarn‑nsn s‑ih̬ṣan n‑willi mmutnin.

¹⁵ iddu yušiyah ih̬lu akrkur n‑tġrṣi ġ‑uwrir n‑bayt‑il. akrkur‑an, ibna‑t yarabɛam yus n‑nabaṭ lli‑ilddin ayt‑israyil ijlu‑tn bahra. ih̬lu‑t ijdr‑t, ig‑t d‑iġd. ijdr ula taggjdit n‑‹ašrah›.

¹⁶ igrawl‑n yušiyah ġakudan, s‑iẓra tugtt n‑ismḍal ġ‑uwrir‑an. isafḍ ma‑d‑issmunun ih̬ṣan zġ‑ismḍal, ijdr‑tn f‑ukrkur n‑tġrṣi inds‑t, ġmklli‑s‑inna sidi rbbi f‑imi n‑uh̬ddam n‑rbbi lli‑yad‑ikašfn f‑kullu mayan.

¹⁷ yini‑asn‑ilmma‑ugllid: «ma‑iga ifir‑an‑n‑tmnadġ?» inin‑as‑d ayt‑tmdint: «iga amḍḍal n‑uh̬ddam n‑rbbi lli‑d‑yuškan zġ‑wakal n‑yahuda, ikašf f‑kullu mayd tskrt kiyi ġ‑ukrkur n‑bayt‑il.»

¹⁸ yini‑asn: «adjat‑t. ad‑ur‑tssmassm ih̬ṣan‑ns.» fln ih̬ṣan‑ns d‑win nnabi yaḍni lli‑d‑yuškan zġ‑wakal n‑samira s‑ġin.

¹⁹ izayd yušiyah ikks kullu lqubbat n‑tġrṣiw ġ‑tmdinin n‑samira. lqubbat‑an, bnan‑tnt igldan n‑ayt‑israyil, ssṭiyrn‑tt srsnt i‑sidi rbbi. iskr‑asnt yušiyah ġmklli kullu iskr ġ‑bayt‑il.

²⁰ iġrṣ i‑kullu imsakmurn n‑id‑rbbi‑nsn f‑ikʷrkar‑nsn, ijdr fllasn ih̬ṣan n‑willi mmutnin. iwrri‑d ilmma s‑urušalim.

iskr yušiyah lɛid n‑usurf

²¹ yamr‑ugllid mddn kullutn yini‑asn: «skrat f‑lɛid n‑usurf n‑rbbi siditun ġmklli ityaran ġ‑warra‑yad n‑lɛhd.»

²² ašku lɛid n‑usurf, ur‑sul‑a‑t‑skarn tigira n‑uwssan n‑iriyasn lli‑itḥkamn f‑ayt‑israyil. laḥ‑t ula ġ‑uwssan n‑kullu igldan n‑israyil d‑yahuda.

²³ walaynni asggʷas wis tam d‑mraw (18) ġ‑tgldit n‑yušiyah, skrn lɛid n‑usurf i‑sidi rbbi ġ‑urušalim.

²⁴ izayd yušiyah ikks isḥḥarn d‑igzzann, issitti laṣnam d‑ifariwn d‑ikʷlan jlh̬nin lli‑tɛbadn mddn ġ‑tmazirt n‑yahuda d‑urušalim. iskr f‑a‑izzga iwaliwn n‑ulmmud lli‑tyaranin ġ‑warra lli‑yufa‑umsakmur ḥilqiyah ġ‑tgmmi n‑sidi rbbi.

²⁵ ur‑illi yan zund ntta ġ‑igldan lli‑t‑izwurn, ašku yumẓ ġ‑sidi rbbi zġ‑ttmi n‑uwl‑ns d‑ttmi n‑ih̬f‑ns d‑ttmi n‑jjhd‑ns. wala illa yan zund nttan ġ‑ġwilli‑as‑d‑iggʷran. ar‑tt‑itawi bdda ġ‑kullu ma‑illan ġ‑ulmmud n‑musa.