2 igldan 22 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

yušiyah agllid n‑yahuda

¹ lliġ iġli yušiyah s‑tgldit n‑yahuda, ilin dars tam isggʷasn. iḥkam kraḍ id‑mraw d‑yan (31) n‑usggʷas ġ‑urušalim. ism n‑innas iga yadida illis n‑ɛdayah gu‑baṣqat.

² ar‑iskar ma‑iṣlaḥn ġ‑iẓri n‑sidi rbbi, iḍfur aġaras n‑jddis dawd, ur‑as‑yunf la s‑ufasi ula s‑uẓlmaḍ.

³ asggʷas wis tam d‑mraw (18) ġ‑tgldit‑ns, inkr‑ugllid yušiyah yazn aktatbi šafan lli‑igan yus n‑aṣalyah lli‑igan yus n‑mašullam s‑tgmmi n‑sidi rbbi. yuṣṣa‑t yini:

⁴ «awn s‑dar‑umsakmur ihiyyan ḥilqiyah f‑ad‑ak‑iml kullu nnʷqrt lli‑d‑ikšmn s‑tgmmi n‑sidi rbbi. tga nnʷqrt‑an talli ssmunun‑waḍafn n‑imi zġ‑dar mddn.

⁵ fkat nnʷqrt‑an ġ‑ufus n‑ingabaln n‑twuri n‑tgmmi n‑sidi rbbi, a‑stt‑aṭṭun f‑ih̬ddamn lli‑ra‑itɛdal aynna ih̬ʷlan ġ‑tgmmi n‑sidi rbbi.

⁶ ġmkan a‑s‑ra‑yili ġ‑dar ibnnayn d‑injjarn d‑iḥjjarn ma‑s‑a‑saġn akššuḍ d‑iẓran ngaddanin, ad‑srsn‑ɛdln tigmmi‑an tamẓlayt.

⁷ walaynni a‑ur‑zġ‑gisn‑tḍalbm lḥsab f‑nnʷqrt lli‑ityawfkan ġ‑ufus‑nsn, ašku ayt‑lḥqq ad‑gan.»

amsakmur yufa arra n‑lɛhd

⁸ yan imikk s‑d‑isawl‑umsakmur ihiyyan ḥilqiyah s‑uktatbi šafan yini‑as: «hati ufiġ arra n‑ulmmud ġ‑tgmmi n‑sidi rbbi.» ifk ḥilqiyah arra‑yan i‑šafan iġr gis.

⁹ yašk‑id‑uktatbi šafan s‑dar‑ugllid iɛawd‑as f‑ma‑ijran yini: «han ih̬ddamn‑nk ssmunn‑d nnʷqrt lli‑illan ġ‑tgmmi tamẓlayt, fkn‑tt ġ‑ufus n‑ingabaln n‑twuri n‑tgmmi n‑sidi rbbi.»

¹⁰ izayd‑uktatbi šafan yini i‑ugllid: «ha yan‑warra, ifka‑yyi‑t‑id‑umsakmur ḥilqiyah.» ar‑gis‑yaqra šafan ġakudan f‑ugllid.

¹¹ lliġ isfld‑ugllid i‑iwaliwn n‑warra‑yan n‑ulmmud, ibbi timlsit‑ns.

¹² yamr‑ugllid amsakmur ḥilqiyah, d‑aḥiqam yus n‑šafan, d‑ɛah̬bur yus n‑mih̬ayah, d‑uktatbi šafan, d‑ɛasayah lli‑igan ash̬h̬ar n‑ugllid, yini‑asn:

¹³ «ddwat tsqsam sidi rbbi, ma‑flla‑illan nkki d‑mddn‑inu ula taqbilt n‑yahuda kullutt f‑ssibt n‑iwaliwn lli‑illan ġ‑warra‑yad ityafan. is‑ur‑fllanġ‑ttyawznad lɛafiyt n‑lġaḍab n‑sidi rbbi, ašku ur‑a‑sflidn id‑babatnġ s‑iwaliwn n‑warra‑yad ula da‑skarn s‑kullu ma‑d‑fllanġ‑ityaran?»

¹⁴ inkr‑umsakmur ḥilqiyah d‑aḥiqam d‑ɛah̬bur d‑šafan d‑ɛasayah, ddun ad‑sqsan tannabit ḥuldah tamġart n‑šallum lli‑igan yus n‑tiqwah lli‑igan yus n‑ḥarḥas lli‑igan angabal n‑tmlsa hiyyanin. tzdġ nttat ġ‑tsga n‑ljdid n‑urušalim.

¹⁵ trar‑asn‑d awal tini: «ha ma‑inna rbbi da‑illan ig rbbi n‑israyil: ‹inyat i‑urgaz lli‑kʷn‑d‑dari‑yuznn:

¹⁶ ha ma‑inna rbbi da‑illan: ra‑n‑zzugzġ lhalak f‑tmazirt‑ad d‑imzdġn‑ns, ġmklli kullu ityaran ġ‑warra lli‑iġra‑ugllid n‑yahuda.

¹⁷ ašku fln‑iyi ddun ar‑tbh̬h̬arn i‑id‑rbbi yaḍni, ssṭiyrn‑iyi‑tt s‑iskkirn n‑ifassn‑nsn, aylliġ gigi iznd lġaḍab f‑tmazirt‑ad d‑ur‑sar‑ih̬si.›

¹⁸ inyat daġ i‑ugllid n‑yahuda lli‑kʷn‑d‑yuznn a‑tsqsam sidi rbbi: ‹ha ma‑inna rbbi da‑illan ig rbbi n‑israyil f‑iwaliwn‑an mi‑tsfldt.

¹⁹ lliġ trẓmt ul‑nk, tadrt‑d i‑ih̬f‑nk ġ‑umnid n‑rbbi da‑illan, tsfldt i‑maylli nniġ f‑tmdint‑ad d‑imzdġn‑ns, mamnk a‑ra‑n‑ḍrn s‑lhalak d‑h̬ziyt, hati tbbit malssa‑nk ar‑tallat ġ‑umnid‑inu. ha‑yyi sfldġ‑ak ġakudan. inna‑t rbbi sidik.

²⁰ f‑ssibt n‑mayan, ra‑k‑ssmunġ d‑id‑babak, tʷggzt s‑usmḍal‑nk s‑sslamt. ur‑rad‑ẓrnt‑walln‑nk kullu lhalak lli‑rad‑zzugzġ f‑tmdint‑ad.› » wrrin ġakudan awin awal‑an i‑ugllid.