2 igldan 21 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

manaššah agllid n‑yahuda

¹ lliġ iġli manaššah s‑tgldit n‑yahuda, ilin dars sin d‑mraw (12) n‑usggʷas, iḥkam smmus id‑mraw d‑smmus (55) n‑usggʷas ġ‑urušalim. ism n‑innas iga ḥafṣiba.

² iskr ma‑yʷh̬šnn ġ‑iẓri n‑sidi rbbi, ġmklli myurn iqbiln lli‑iṭṭay sidi rbbi ġ‑lgddam n‑ayt‑israyil s‑iskkirn‑nsn jlh̬nin.

³ ibnu daġ ikʷrkar lli‑ih̬ʷla babas ḥizqiyah. iskr iẓran ma‑f‑a‑qqrṣn f‑‹baɛl›. issbidd yat‑tggjdit n‑‹ašrah› ġmklli iskr aḥab agllid n‑israyil. ar‑itsjad i‑kullu itran n‑ignwan ar‑tn‑itɛbad.

⁴ ibnu tisiwin n‑tġrṣi yaḍni ġ‑tgmmi n‑sidi rbbi lli‑f‑inna sidi rbbi: «urušalim a‑f‑rad‑gġ ism‑inu.»

⁵ ibnu ikʷrkar i‑kullu itran n‑ignwan ġ‑sin isaragn n‑tgmmi n‑sidi rbbi,

⁶ idḥi‑n yus i‑lɛafiyt. ar‑issfal ar‑itqddaš, ar‑isqsa isḥḥarn d‑igzzann, ar‑bahra‑itsala ma‑yʷh̬šnn ġ‑iẓri n‑sidi rbbi, issṭiyr‑as‑tt bahra.

⁷ iskr taggjdit inqšn n‑‹ašrah›, issbidd‑stt ġ‑tgmmi tamẓlayt lli‑f‑isawl sidi rbbi i‑dawd d‑yus suliman yini‑asn: «ha tigmmi‑ad d‑tmdint‑ad n‑urušalim lli‑stiġ ġ‑gr kullu tiqbilin n‑israyil, rad‑fllas‑gġ ism‑inu kullu mayd iftan.

⁸ ur‑rad‑adjġ iḍarn n‑ayt‑israyil ad‑jlun zġ‑wakal lli‑fkiġ i‑id‑babatsn, iġ‑a‑bdda‑traran lɛaql ad‑skarn ntni s‑kullu ma‑f‑tn‑uṣṣaġ, ar‑tti‑tawin ġ‑ulmmud kullut lli‑s‑tn‑yuṣṣa‑uh̬ddam‑inu musa.»

⁹ walaynni ur‑sfldn s‑sidi rbbi. izayd manaššah ar‑tn‑ijllu aylliġ a‑tsalan ma‑yʷh̬šnn uggʷar n‑iqbiln lli‑ifna sidi rbbi ġ‑lgddam n‑ayt‑israyil.

¹⁰ isawl‑d sidi rbbi f‑ufus n‑ih̬ddamn‑ns lanbiya yini:

¹¹ «lliġ iskr manaššah agllid n‑yahuda kullu tajlh̬it‑an, iskr lh̬ʷšant uggʷar n‑ayt‑amur lli‑t‑izwurn, ildi‑n ayt‑yahuda ijlu‑tn s‑laṣnam‑ns,

¹² ha ma‑inna rbbi da‑illan ig rbbi n‑israyil: ‹ra‑n‑zzugzġ tammara išqan bahra f‑urušalim d‑tmazirt n‑yahuda ard a‑jjhijjiyn imzgan i‑kullu wanna fllas isfldn.

¹³ ra‑n‑mdiġ f‑urušalim izikr lli‑s‑ssġlġ samira, ula lmizan n‑ifili lli‑s‑ḥkamġ f‑ayt‑tgldit n‑aḥab. rad‑sfiḍġ urušalim ġmklli sfaḍn mddn aruku. ra‑t‑sfiḍġ, gllbġ‑t ilmma f‑uwdm‑ns.

¹⁴ ġwilli iqaman ġ‑mddn‑inu, ra‑tn‑flġ, sllmġ‑tn ġ‑ufus n‑inuwwašn‑nsn, ad‑zġ‑gisn‑skrn tagʷmrt kksn‑asn kullu ma‑darsn‑illan.

¹⁵ ašku ar‑tsalan ma‑yʷh̬šnn ġ‑iẓri‑nu, ar‑iyi‑tt‑ssṭiyarn zġ‑wass lli‑ġ‑d‑ffuġn id‑babatsn zġ‑miṣr sul s‑ġassad.› »