2 igldan 20 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

yuḍn‑ugllid ḥizqiyah

¹ ġ‑uwssan‑an a‑yuḍn ḥizqiyah aylliġ iqrrb a‑immt. yašk‑id dars nnabi išaɛyah yus n‑amuṣ yini‑as: «ha mad‑ak‑inna sidi rbbi: ‹uṣṣa ayt‑tgmmi‑nk, ašku ra‑tmmtt, ur‑ra‑tjjit.› »

² irar ḥizqiyah udm‑ns s‑uġʷrab, iẓẓall i‑rbbi da‑illan yini:

³ «wa sidi rbbi, ġir swangm mamnk a‑bdda‑fttuġ ġ‑umnid‑nk s‑nniyt iṣfan d‑uwl izgan, ar‑skarġ ma‑iṣlaḥn ġ‑iẓri‑nk.» ar‑yalla ḥizqiyah imṭṭawn ḥrranin.

⁴ ġakudan ur‑ta‑d‑iffuġ išaɛyah zġ‑tuẓẓunt n‑tgmmi‑an, yašk‑as‑d‑wawal n‑sidi rbbi yini‑as‑d:

⁵ «wrri s‑dar ḥizqiyah lli‑izggurun i‑mddn‑inu, tinit‑as: ‹ha mad‑ak‑inna sidi rbbi n‑jddik dawd: hati sfldġ i‑tẓallit‑nk, ẓrġ imṭṭawn‑nk. hati ra‑k‑jjujiġ. wis kraḍ‑uwssan ra‑tawnt s‑tgmmi n‑rbbi sidik,

⁶ s‑rad‑ak‑zaydġ i‑tudrt‑nk smmus d‑mraw (15) n‑usggʷas. ra‑k‑fukkuġ kiyi d‑tmdint‑ad zġ‑ufus n‑ugllid n‑aššur. rad‑ḥṣarġ f‑tmdint‑ad f‑uwdm‑inu d‑uwdm n‑uh̬ddam‑inu dawd.› »

⁷ yini ilmma išaɛyah: «awyat‑d yan‑uṭṭib n‑tazart.» awin‑t‑id, srsn‑t f‑uh̬bit n‑ugllid baš a‑ijji.

⁸ yini ḥizqiyah i‑išaɛyah: «ma‑tga tamatart lli‑s‑rad‑issanġ is‑ra‑yyi‑ijjuji sidi rbbi, awnġ s‑tgmmi n‑sidi rbbi ġ‑wis kraḍ‑uwssan?»

⁹ yini‑as išaɛyah: «ġmkad a‑igan tamatart zġ‑dar sidi rbbi, baš a‑tissant is‑ra‑iskr maylli‑s‑ak‑iqawl. manwa gisn trit, izd a‑izayd‑umalu s‑mrawt‑tskʷfal nġd a‑inaqṣ s‑mrawt?»

¹⁰ yini‑as‑d ḥizqiyah: «irh̬a a‑izayd‑umalu s‑mrawt‑tskʷfal. adj amalu a‑inaqṣ s‑mrawt‑tskʷfal.»

¹¹ yall nnabi išaɛyah awal‑ns iġr s‑sidi rbbi, s‑d‑irur amalu ġ‑iggi n‑uskʷfl n‑aḥaz s‑mrawt‑tskʷfal lli‑izri.

irqqasn zġ‑tmazirt n‑babil

¹² ġ‑uwssan‑an a‑d‑yuzn‑ugllid n‑babil irqqasn s‑dar ḥizqiyah, ašku isfld f‑ḥizqiyah is‑yuḍn. awin‑as‑d tibratin d‑yat‑tsmġurt. ism n‑ugllid n‑babil iga marudah̬‑baladan yus n‑baladan.

¹³ issmrḥba srsn ḥizqiyah, iml‑asn kullu ma‑illan ġ‑lh̬zin‑ns ġ‑nnʷqrt d‑uwrġ d‑isafarn hiyyanin d‑zzit išwan d‑imqlad n‑imiġ ula kullu ma‑illan ġ‑iḥuna n‑tgldit‑ns. ur‑ifil ḥizqiyah ḥtta yat taġawsa ur‑asn‑tt‑imli ġ‑tgmmi‑ns ula ġ‑tgldit‑ns kullutt.

¹⁴ yašk‑id ilmma nnabi išaɛyah s‑dar‑ugllid ḥizqiyah isqsa‑t: «ma‑s‑ak‑nnan irgazn‑an? manizġ‑d‑dark‑uškan?» yini‑as ḥizqiyah: «uškan‑d zġ‑yat‑tmazirt yaggugn, zġ‑babil.»

¹⁵ yini‑as: «mad‑ẓran ġ‑tgmmi‑nk?» yini‑as ḥizqiyah: «ẓran kullu ma‑illan ġ‑tgmmi‑inu. ur‑illi kra ġ‑iḥuna‑nu ur‑asn‑t‑mliġ.»

¹⁶ yini išaɛyah ġakudan i‑ḥizqiyah: «sfld i‑wawal n‑sidi rbbi:

¹⁷ ‹han rad‑d‑aškin‑uwssan ġ‑ra‑ityattay kullu ma‑illan ġ‑tgmmi‑nk s‑babil, ityattay kullu ma‑d‑ḥḍan id‑babak ar ġilad. han ur‑ra‑d‑sul‑iqama yat. inna‑t rbbi da‑illan.

¹⁸ ra‑ityattay kra ġ‑tarwa n‑tarwa‑nk f‑ad‑wrrin gn ingabaln zuzlnin ġ‑tgmmi n‑ugllid n‑babil.› »

¹⁹ yini ḥizqiyah ġakudan i‑išaɛyah: «ifulki‑wawal n‑sidi rbbi lli‑s‑tnnit.» ašku inna d‑ih̬f‑ns: «iġ‑illa lhna d‑laman ġ‑uwssan‑inu, yili‑iyt ma‑ra‑yili.»

²⁰ iskkirn yaḍni n‑ḥizqiyah ula zzɛmt‑ns itjhhdn, ula mamnk a‑iskr ššarij d‑trga lli‑d‑yiwin aman s‑ugʷns n‑tmdint‑ns, is‑ur‑kullu‑tyaran ġ‑warra n‑iskkirn n‑igldan n‑yahuda?

²¹ ign ilmma ḥizqiyah ġ‑gr id‑babas, iwrri ig yus manaššah agllid ġ‑udġar‑ns.