2 igldan 2 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ityalal iliyah s‑ignna

¹ lliġ ifta iliyah d‑ališaɛ ġ‑uġaras zġ‑gilgal, tlkm tizi lli‑ġ‑ra‑yall sidi rbbi iliyah ġ‑yat‑tmziwit s‑ignna.

² yini iliyah i‑ališaɛ: «ġir qama ġid, ašku sidi rbbi yuzn‑iyi ġilad s‑bayt‑il.» irar‑as ališaɛ: «f‑tudrt n‑sidi rbbi d‑tudrt‑nk, ur‑k‑ffalġ.» zaydn ġakudan huwwdn s‑bayt‑il.

³ tffuġ‑d tamunt n‑lanbiya lli‑illan ġ‑bayt‑il a‑n‑mnaggarn d‑ališaɛ, inin‑as: «is‑tssnt sidi rbbi is‑ra‑n‑fllak‑yasi sidik ġassad?» yini‑asn: «ssnġ. ad‑ur‑sul‑tinim yat.»

⁴ yini‑as iliyah: «wa ališaɛ, ġir qama ġid, ašku sidi rbbi yuzn‑iyi s‑tmdint n‑ariḥa.» irar‑as: «f‑tudrt n‑sidi rbbi d‑tudrt‑nk, ur‑k‑ffalġ.» munn ilmma s‑ariḥa.

⁵ taški‑d tamunt n‑lanbiya lli‑illan ġ‑ariḥa s‑dar ališaɛ, inin‑as: «is‑tssnt sidi rbbi ra‑n‑fllak‑yasi sidik ġassad?» yini‑asn: «ssnġ. ad‑ur‑sul‑tinim yat.»

⁶ yini‑as ilmma iliyah: «ġir qama ġid, ašku sidi rbbi yuzn‑iyi s‑wasif n‑urdun.» irar‑as: «f‑tudrt n‑sidi rbbi d‑tudrt‑nk, ur‑k‑ffalġ.» zaydn ilmma s‑sin.

⁷ aškin‑d smmus id‑mraw (50) zġ‑tamunt n‑lanbiya, biddn‑in ġ‑tuggugt. ibidd iliyah d‑ališaɛ ġ‑tama n‑urdun.

⁸ ikks iliyah aslham‑ns issnuḍu‑t, yut srs aman n‑wasif, s‑bḍan‑waman f‑sin, kra s‑tsga‑ya d‑kra s‑ṭayya, zrin sinitsn zġ‑taġart.

⁹ lliġ zgrn, yini iliyah i‑ališaɛ: «ḍalb‑iyi kra ad‑ak‑t‑skrġ ur‑ta‑n‑fllak‑ttyattayġ?» yini‑as ališaɛ: «ġir a‑flla‑yili rruḥ‑an gik illan f‑snat‑twal.»

¹⁰ yini‑as iliyah: «išqa mayd tḍalbt, walaynni iġ‑iyi‑tẓrit ġakud lliġ a‑n‑fllak‑ttyattayġ, rad‑ak‑yili ma‑tḍalbt. iġ‑ur‑iyi‑tẓrit, han ur‑rad‑ak‑yili.»

¹¹ zaydn ftun jmɛan i‑ngratsn, s‑had lkrarṣ n‑lɛafiyt d‑iysan n‑lɛafiyt, zrin zġ‑gratsn, ityalal iliyah ġakudan ġ‑tmziwit s‑ignna.

¹² iẓr‑t‑in ališaɛ, yall awal‑ns yini: «wa baba, wa baba, lkrarṣ d‑imnayn n‑israyil.» laḥ‑t ilmma i‑iẓri‑ns. yamẓ ališaɛ ġ‑ma‑ilsa ibbi‑t f‑sin.

¹³ yasi‑d aslham n‑iliyah lli‑as‑d‑iḍrn, iddu daġ ibidd ġ‑tama n‑wasif n‑urdun.

¹⁴ yamẓ ġ‑uslham lli‑d‑iḍrn, yut srs aman yini: «is‑sul‑illa sidi rbbi n‑iliyah?» ġir yut aman, s‑bḍan‑waman s‑tsga‑ya ula h̬ta, izgr ališaɛ ġakudan.

rruḥ n‑iliyah ittrs f‑ališaɛ

¹⁵ imma tamunt‑an n‑lanbiya zġ‑tmdint n‑ariḥa, lliġ‑t‑in‑ẓran ġ‑tuggugt, inin: «rruḥ n‑iliyah ayd ittrsn f‑ališaɛ.» aškin‑d a‑d‑dids‑mnaggarn. knun ar akal ġ‑umnid‑ns,

¹⁶ inin‑as: «ha‑yaġ ġilad a‑sidi, smmus id‑mraw (50) n‑umdwas ad‑darnġ‑illan. ġir adj‑tn ad‑ddun ar‑siggiln s‑sidik, a‑ur‑imil yusi‑t rruḥ n‑sidi rbbi s‑kra n‑udrar nġd kra n‑talat.» irar‑asn: «uhu, a‑ur‑tn‑taznm.»

¹⁷ walaynni ssġwin‑as aylliġ iḥššm yini‑asn: «aznat‑tn.» aznn smmus id‑mraw (50) n‑urgaz ġakudan, ar‑srs‑siggiln kraḍ‑uwssan ur‑t‑ufin.

¹⁸ wrrin‑d ilmma s‑dars, d‑ntta ar‑srsn‑itql ġ‑ariḥa, irar‑asn‑d: «is‑ur‑awn‑nniġ ad‑ur‑tddum?»

¹⁹ sawln imzdġn n‑ariḥa inin i‑ališaɛ: «hati ifulki lḥal ġ‑tmdint‑ad, ġmklli‑stti‑tmnadt a‑sidi, walaynni aman‑ns ʷh̬šnn, d‑wakal‑ns ur‑a‑issmġay.»

²⁰ yini‑asn: «awyat‑d yan‑uruku n‑ljdid, tgm‑d gis tisnt.» awin‑as‑t‑id.

²¹ iddu s‑talɛint n‑waman, iluḥ‑n gis tisnt yini: «ha ma‑inna sidi rbbi: ‹hati ssġusġ aman‑ad. ġilad s‑uflla ur‑ra‑gisn‑yili ma‑inqqan ula ma‑isragn.› »

²² ġmkan a‑s‑ġusn‑waman‑an sul s‑ġassad, ġmklli‑s‑inna ališaɛ ġ‑wawal‑an.

²³ yawn zġ‑ġin s‑tsgiw n‑bayt‑il. lliġ illa ġ‑uġaras, ha yan mnnaw iḥšmiyn ffuġn‑d zġ‑tmdint ar‑gis‑ḍṣṣan ar‑as‑ttinin: «way‑amȷ̈̇ȷ̈̇uḍ, itti‑n. way‑amȷ̈̇ȷ̈̇uḍ, itti‑n.»

²⁴ igrawl gisn ar‑gisn‑itmnad, iẓi‑tn s‑ism n‑rbbi da‑illan. ffuġnt‑d ġakudan snat ddubbat zġ‑tagant, ssyagasnt kkuẓ id‑mraw d‑sin (42) ġ‑iḥšmiyn‑an.

²⁵ iftu ališaɛ zġ‑ġin s‑udrar n‑karmal, iwrri ilmma s‑samira.