2 igldan 19 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

awal n‑išaɛyah i‑ugllid ḥizqiyah

¹ lliġ isfld‑ugllid ḥizqiyah i‑ġayan, ibbi timlsit‑ns. ils lh̬iš i‑ddat‑ns, iddu s‑tgmmi n‑sidi rbbi.

² inkr ilmma yazn alyaqim lli‑illan f‑tgmmi, d‑šibna lli‑igan aktatbi, d‑inmġurn n‑imsakmurn, lsn kullu lh̬iš, ddun s‑dar nnabi išaɛyah yus n‑amuṣ.

³ inin‑as: «ha ma‑inna ḥizqiyah: ‹ġassad iga ass n‑tguḍi d‑lɛqubit d‑tdallit. han tarwa ruḥn tizi n‑tlalit walaynni laḥ jjhd ma‑s‑a‑di‑tlalan.

⁴ amar yufan a‑isfld rbbi sidik i‑kullu ġaylli inna‑umšawar lli‑d‑yuzn‑ugllid n‑aššur a‑irggm ġ‑rbbi iddrn. a‑t‑iɛaqb rbbi sidik f‑iwaliwn lli‑mi‑isfld zġ‑dars. ġilad ssattuy ddɛut‑nk ġ‑ljiht n‑ġwid sul iqaman ġ‑mddn‑nġ.› »

⁵ lliġ‑d‑uškan ih̬ddamn‑an n‑ugllid ḥizqiyah s‑dar nnabi išaɛyah,

⁶ yini‑asn išaɛyah: «inyat i‑siditun: ‹ha ma‑inna sidi rbbi: ad‑ur‑tiksaḍt f‑ssibt n‑iwaliwn lli‑mi‑tsfldt ar‑iyi‑srsn‑rggmn ih̬ddamn n‑ugllid n‑aššur.

⁷ han ra‑gis‑gġ yan rruḥ ma‑s‑a‑isflid i‑kra n‑lah̬bar, ard iwrri s‑tmazirt‑ns. rarġ‑t ilmma a‑iḍr s‑uwzzal ġ‑wakal‑ns.› »

tabrat n‑ayt‑aššur i‑ḥizqiyah

⁸ iddu‑umšawar ġakudan iwrri s‑dar‑ugllid n‑aššur, ašku isfld is‑ifl tamdint n‑lah̬iš. yaf‑t‑in immaġ d‑ayt‑tmdint n‑libna.

⁹ tizi‑an a‑isfld‑ugllid n‑aššur i‑lah̬bar n‑is‑d‑iffuġ tirhaqah agllid n‑ḥabaš a‑dids‑immaġ. yazn daġ irqqasn s‑ḥizqiyah yuṣṣa‑tn:

¹⁰ «inyat awal‑ad i‑ḥizqiyah agllid n‑yahuda: ‹ad‑ur‑tadjt rbbi‑nk lli‑f‑ttklt a‑k‑ijlu yini‑ak: ur‑ra‑ttyawfka urušalim ġ‑ufus n‑ugllid n‑aššur.

¹¹ ašku tsfldt f‑mad‑skrn igldan n‑aššur i‑kullu timizar, mamnk a‑s‑tnt‑fnan. is‑ra‑tnjmt kiyi?

¹² han iqbiln lli‑h̬ʷlan id‑baba, is‑tn‑fukkan id‑rbbi‑nsn, iqbiln n‑guzan d‑ḥaran d‑raṣaf d‑ayt‑ɛadan lli‑illan ġ‑talassar?

¹³ is‑ur‑tssint ma‑ijran i‑ugllid n‑ḥamat d‑win arfad d‑win safarwayim d‑win hinaɛ d‑win ɛiwa?› »

¹⁴ yamẓ ḥizqiyah tabrat zġ‑ufus n‑irqqasn, iġr‑tt. yawn ḥizqiyah ġakudan s‑tgmmi n‑sidi rbbi, ifsr tabrat ġ‑umnid n‑sidi rbbi.

¹⁵ iẓẓall ḥizqiyah ġ‑umnid n‑sidi rbbi yini: «wa sidi rbbi n‑israyil da‑iskrn lɛrš‑nk ġ‑gr lmh̬luqat tjhhdnin, kiyi a‑igan rbbi. ur‑illi abla kiyi ġ‑kullu timizar n‑ddunit. kiyi a‑iskrn ignwan d‑wakal.

¹⁶ ġilad a‑sidi rbbi, rar‑d imẓgan‑nk tsfldt, trẓmt‑d alln‑nk a‑sidi rbbi, tmnadt. tsfldt i‑iwaliwn n‑sanḥarib lli‑d‑yuzn a‑irggm ġ‑rbbi da‑iddrn.

¹⁷ iṣḥa a‑sidi rbbi, igldan n‑aššur h̬ʷlan kullu iqbiln d‑ikalln‑nsn,

¹⁸ luḥn‑in id‑rbbi‑nsn ġ‑lɛafiyt. ašku ur‑gin id‑rbbi. ur‑gin abla ikššuḍn d‑iẓran tyawskarnin s‑ifassn n‑bnadm. ġayan a‑f‑tthlkn.

¹⁹ ġilad a‑rbbi siditnġ, jjnjm‑aġ zġ‑ufus‑ns, f‑ad‑kullu‑issann ayt‑tmizar n‑ddunit izd kiyi waḥduk a‑igan rbbi da‑bdda‑illan.»

awal n‑išaɛyah f‑ugllid n‑aššur

²⁰ isafḍ išaɛyah yus n‑amuṣ ġakudan s‑ugllid ḥizqiyah yini‑as: «ha ma‑inna rbbi da‑illan ig rbbi n‑israyil: ‹sfldġ i‑ġaylli‑s‑tdɛit i‑sanḥarib agllid n‑aššur.›

²¹ awal‑ad a‑s‑fllas‑inna rbbi da‑illan: « ‹ar‑gik‑tḍṣṣa‑tɛyyalt, tḥgr‑k illis n‑ṣiyun. ha illis n‑urušalim ar‑tssmussu ih̬f‑ns ġ‑trula‑nk.

²² manwa‑ġ‑a‑ṭṭnaẓt? d‑manwa trggmt? manwa‑f‑tullt awal? d‑manwa‑f‑tssattuyt ih̬f‑nk? is‑urd nkki da‑igan rbbi amẓlay n‑ayt‑israyil?

²³ ṭṭnẓt gigi s‑irqqasn‑nk tinit: lkrarṣ ad‑dari‑iggutn, kkiġ srsnt iggi n‑idrarn, lkmġ tuggugt n‑lubnan, bbiġ‑n aṣġar n‑idgl iġzzifn, bbiġ ula lbnz‑nsn ifulkin, ɛmmrġ‑n idġarn‑nsn aggugnin, sslakaġ‑d ula taganin‑nsn buġlanin.

²⁴ hati ġzaġ una ġ‑ikalln iġribn, ar‑zġ‑gisn‑ssaġ aman. s‑tmsilt n‑iḍarn a‑s‑kullu‑zzwiġ tirgiw n‑miṣr.

²⁵ walaynni is‑ur‑tsfldt i‑mayad? nuwwaġ‑t nkki zġ‑zikk zman. mnšk ayd qṣadġ a‑d‑darun‑yili ġayd darun illan ġilad, f‑a‑trart timdinin dusnin ad‑gnt igudiyn n‑iẓran.

²⁶ ha imzdġn‑nsnt kullu ttrẓan, bjrn ilin agʷri, zund tuga n‑lh̬la d‑ugʷlas imġin ġ‑lbur, d‑zund tazgzut n‑iggi n‑tgʷmma, tqqur ur‑ta‑di‑tġli.

²⁷ hati ssnġ iġ‑tgawrt ula iġ‑tffuġt ula iġ‑tkšmt, issanġ ula mnšk ad‑bahra‑flla‑thajt.

²⁸ lliġ flla thajt, lkmn‑d isfurrugn‑nk imẓgan‑inu, rad‑gġ tuwkṭṭ ġ‑inh̬ar‑nk, d‑ulgamu ġ‑imi‑nk, a‑twrrit d‑uġaras lli‑di‑tkkit.

²⁹ « ‹h̬tad a‑rad‑awn‑ig tamatart. ġasggʷas‑ad ra‑tšttam ġ‑aylli‑d‑issmġi‑wakal bla tayrza. wis sin isggʷasn ra‑tšttam ġ‑aylli‑daġ‑issmġi‑wakal. imma wis kraḍ isggʷasn ra‑gis‑tkkrzm ar‑tmggrm, ar‑ttẓẓum igran n‑waḍil ar‑tšttam lġllt‑nsn.

³⁰ ha willi sul iqaman ġ‑ayt‑yahuda, rad‑daġ‑utn s‑iẓuran tagsart, ar‑akkan lġllt tasawnt.

³¹ ašku hati urušalim a‑zġ‑rad‑ffuġn ġwilli iqaman. awrir n‑ṣiyun a‑ra‑ik‑ukabar n‑willi injmn. rbbi n‑lmlayka, s‑tayri‑ns itjhhdn a‑s‑ra‑t‑iskr.›

³² «ha ma‑inna sidi rbbi ġilad f‑ugllid n‑aššur: ‹ur‑ra‑d‑ikšm s‑tmdint‑ad, ula yut‑stt‑id s‑kra n‑iẓḍi, ula yusi‑d srs kra n‑umsntl, ula issgudi‑d fllas akal ma‑s‑ad‑srs‑yaqlay.

³³ aġaras lli‑d‑ikka a‑ġ‑ra‑iwrri. ur‑ra‑d‑ikšm s‑tmdint‑ad. inna‑t rbbi da‑bdda‑illan.

³⁴ ašku rad‑ḥṣarġ f‑tmdint‑ad, jjnjmġ‑tt f‑uwdm‑inu ula f‑uwdm n‑uh̬ddam‑inu dawd.› »

mmutn inmmaġn n‑ayt‑aššur

³⁵ ġ‑iḍ‑an iffuġ‑d lmalak n‑sidi rbbi, yut miyya d‑tam id‑mraw d‑smmus n‑walf (185 000) ġ‑udġar n‑lɛskr n‑ayt‑aššur. lliġ‑d‑nkrn mddn zikk ṣbaḥ, afn‑tn‑d kullu mmutn.

³⁶ inkr sanḥarib agllid n‑aššur ġakudan ifl ġin, iwrri s‑dars. izdġ ġ‑tmdint n‑ninwah.

³⁷ yan‑wass ar‑itɛbad ġ‑tgmmi n‑rbbi‑ns ‹nisruh̬›, nkrn tarwa‑ns adrammalak d‑šaraṣar, utn‑t s‑uwzzal nġn‑t, rwln s‑tmazirt n‑araraṭ. iwrri ig yus asarḥaddun agllid ġ‑udġar‑ns.