2 igldan 18 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

ḥizqiyah agllid n‑yahuda

¹ asggʷas wis kraḍ ġ‑tgldit n‑hušaɛ yus n‑aylah agllid n‑israyil, iwrri ig ḥizqiyah yus n‑aḥaz agllid f‑ayt‑yahuda.

² ilin dars sin id‑mraw d‑smmus (25) n‑usggʷas lliġ iġli s‑tgldit, iḥkam sin id‑mraw d‑ṭẓa (29) n‑usggʷas ġ‑urušalim. ism n‑innas iga abiy illis n‑zakaryah.

³ iskr nttan ma‑iṣlaḥn ġ‑iẓri n‑sidi rbbi, zund kullu ġmklli iskar jddis dawd.

⁴ issitti ikʷrkar lli‑llanin ġ‑iggi n‑iwrar, irẓ ifariwn, ibbi tiggjda n‑‹ašrah›, irẓ ula algʷmaḍ n‑wanas lli‑iskr musa ig‑t d‑igzman, ašku wrrin ayt‑israyil ar‑as‑tbh̬h̬arn ġ‑uwssan‑an, ar‑as‑ttinin ‹naḥuštan› [tga lmɛna‑ns ‹algʷmaḍ n‑wanas›].

⁵ ḥizqiyah yumn bahra ġ‑rbbi da‑illan ig rbbi n‑israyil. ur‑illi yan ġ‑igldan n‑yahuda zund nttan, la ġ‑willi‑t‑zwurnin ula ġ‑ġwilli‑as‑d‑ggʷranin.

⁶ ašku yumẓ bahra ġ‑sidi rbbi. iḍfur‑t bdda, ur‑t‑ifil. ar‑bdda‑iskar s‑luṣiyat n‑sidi rbbi lli‑f‑yuṣṣa musa.

⁷ innas iffuġ, injḥ gis. yili dids sidi rbbi. ur‑iri a‑iskar s‑wawal n‑ugllid n‑aššur, hati iɛṣa‑t.

⁸ yut ayt‑filisṭin ar tamdint n‑ġazza d‑iwtta‑ns, inru iġʷrman mẓẓinin ula timdinin mqqurnin dusnin.

umẓn ayt‑aššur timdinin n‑yahuda

¹³ walaynni ġ‑usggʷas wis kkuẓ d‑mraw (14) ġ‑tgldit n‑ḥizqiyah, a‑d‑yiwn sanḥarib agllid n‑aššur. yakʷi‑d f‑kullu timdinin n‑yahuda lli‑mi‑isutl‑ugadir idusn, yamẓ‑tnt.

¹⁴ isafḍ ḥizqiyah s‑ugllid n‑aššur ġ‑tmdint n‑lah̬iš yini‑as: «ha‑yyi jliġ. ġir itti‑n zġ‑gigi, d‑aynna‑zġ‑gigi‑tḍalbt, fkġ‑ak‑t.» ifrḍ‑fllas‑ugllid n‑aššur ṭẓa n‑id‑walf (9000) n‑kilu n‑nnʷqrt, d‑ṭẓa n‑id‑miyya (900) n‑kilu n‑uwrġ.

¹⁵ issmun ḥizqiyah kullu nnʷqrt lli‑illan ġ‑tgmmi n‑sidi rbbi ula ġ‑iḥuna n‑lh̬zin ġ‑tgmmi n‑ugllid, yazn‑as‑tt.

¹⁶ izayd ḥizqiyah ikrḍ ula urġ lli‑s‑dln iflwan n‑tgmmi n‑sidi rbbi ula tannalin lli‑illan ġ‑tsgiw n‑imi, yazn‑t i‑ugllid n‑aššur.

¹⁷ walaynni izuyd‑ugllid n‑aššur, yazn‑d anmġur n‑lɛskr d‑unmġur n‑lh̬zin‑ns d‑umšawar n‑ugllid s‑dar ḥizqiyah, yazn‑d didsn yan‑ukabar n‑iɛskriyn ggutnin zġ‑tmdint n‑lah̬iš, awnn‑d s‑urušalim. lliġ‑d‑lkmn, biddn ġ‑tama n‑trga n‑ifrḍ n‑uflla, ġ‑uġaras lli‑itawin s‑igr n‑umssird,

¹⁸ ar‑d‑aqran i‑ugllid. iffuġ darsn alyaqim yus n‑ḥilqiyah lli‑illan f‑tgmmi n‑ugllid, d‑šibna lli‑igan aktatbi, d‑yuwaḥ yus n‑asaf lli‑igan abrraḥ n‑ugllid.

awal n‑ayt‑aššur i‑ḥizqiyah

¹⁹ yini‑asn‑d‑umšawar n‑ugllid n‑aššur: «inyat i‑ḥizqiyah: ‹ha ma‑inna‑ugllid imqqurn igan agllid n‑aššur: ma‑s‑ttɛnnat?

²⁰ is‑tġalt izd iwaliwn a‑s‑ra‑tdust tnrut ġ‑imiġ? manwa‑f‑ttklt ġilad aylliġ‑iyi‑tɛṣit?

²¹ han a‑ur‑ttkklt f‑miṣr. ašku aɛkkaz‑an, han iga zund aġanim irẓan lli‑ra‑ibbi afus n‑wanna fllas iswrn. ġmkan a‑iga‑ugllid n‑miṣr i‑wanna fllas iɛwwln.

²² walaynni iġ‑iyi‑tnnam: rbbi siditnġ a‑f‑nttkl, is‑urd rbbi‑an a‑mi‑issitti ḥizqiyah ikʷrkar‑ns n‑lbh̬ur d‑win‑tġrṣi, iɛlm ayt‑yahuda d‑ayt‑urušalim yini: a‑ur‑ttɛbadm abla ġ‑umnid n‑tisi‑ad n‑tġrṣi ġ‑urušalim?

²³ rwaḥ ġilad a‑di‑tmšaškat d‑sidi agllid n‑aššur. ha sin id‑walf (2000) n‑wayyis a‑rad‑ak‑fkġ, iġ‑tẓḍart ad‑asn‑taft imnayn.

²⁴ walaynni iġ‑tɛwwlt f‑ayt‑miṣr ad‑ak‑d‑fkn lkrarṣ d‑imnayn, mamnk a‑s‑ra‑n‑tḥṣart yan lqbṭan imẓẓin ġ‑lɛskr n‑sidi?

²⁵ d‑kra yaḍni, is‑tġalt bla sidi rbbi a‑s‑d‑iwnġ ad‑h̬luġ tamdint‑ad? han sidi rbbi ad‑iyi‑innan: awn s‑tmazirt‑an th̬lut‑stt.› »

²⁶ isawl‑d alyaqim yus n‑ḥilqiyah d‑šibna d‑yuwaḥ inin i‑umšawar n‑ugllid n‑aššur: «ġir sawal a‑sidi s‑iwaliwn n‑ayt‑aram, ašku ar‑tn‑ntfham. a‑ur‑d‑srnġ‑tsawalt s‑wawal n‑ayt‑yahuda, a‑ur‑imil sfldn‑as mddn‑ad illan f‑igudar.»

²⁷ irar‑asn‑d‑umšawar n‑ugllid yini: «is‑tġalm izd ġir siditun ula kunni waḥdukʷn a‑mi‑yyi‑d‑yuzn sidi ad‑awn‑d‑sslkmġ iwaliwn‑ad? is‑ur‑iyi‑d‑yuzn ula s‑irgazn‑ad iskiwsn f‑igudar, lli‑ra‑ištta amazir‑nsn sun aman‑nsn zund kunni?»

isawl‑umšawar s‑ayt‑urušalim

²⁸ ibidd‑umšawar n‑ugllid n‑aššur, yall awal‑ns yini s‑iwaliwn n‑ayt‑yahuda: «sfldat i‑wawal n‑ugllid imqqurn igan agllid n‑aššur.

²⁹ ha ma‑inna‑ugllid: ‹a‑ur‑tadjm ḥizqiyah a‑kʷn‑ijlu, ašku ur‑iẓḍar a‑kʷn‑ijjnjm zġ‑ufus‑inu.›

³⁰ a‑ur‑tadjm ḥizqiyah a‑kʷn‑irar a‑tɛwwlm f‑sidi rbbi iġ‑awn‑inna: ‹sidi rbbi rad‑aġ‑ifukku s‑ṣṣaḥt, ur‑ra‑tḍr‑tmdint‑ad ġ‑ufus n‑ugllid n‑aššur.›

³¹ ad‑ur‑tsfldm s‑ḥizqiyah, ašku ha ma‑inna‑ugllid n‑aššur: ‹skrat didi sslamt, tffuġm‑d s‑dari, s‑ra‑ištta kraygatt yan giwn zġ‑ddilit‑ns d‑tazart‑ns, ar‑issa kraygatt yan aman zġ‑ifrḍ‑ns,

³² ard‑n‑aškiġ a‑kʷn‑awiġ s‑yan‑wakal zund akal‑nun, s‑yan‑wakal n‑imndi d‑uṣġar n‑waḍil, s‑yan‑wakal n‑uġrum d‑waman n‑waḍil, d‑win zzit d‑tammnt, f‑a‑gis‑tddrm wala tmmutm. ad‑ur‑tsfldm s‑ḥizqiyah iġ‑ira a‑kʷn‑ijlu, yini‑awn sidi rbbi ra‑kʷn‑ifukku.

³³ is‑jji‑illa yan ġ‑id‑rbbi n‑iqbiln, ifukka tamazirt‑ns zġ‑ufus n‑ugllid n‑aššur?

³⁴ ma‑ijran i‑id‑rbbi n‑ḥamat d‑arfad? ma‑ijran i‑id‑rbbi n‑safarwayim d‑haynaɛ d‑ɛiwa? is‑fukkan samira zġ‑ufus‑inu?

³⁵ is‑illa yan ġ‑id‑rbbi n‑tmizar‑an ifukka tamazirt‑ns zġ‑ufus‑inu, baš a‑tġalm is‑ra‑yiẓḍar rbbi siditun a‑ifukku urušalim zġ‑ufus‑inu?› »

³⁶ fssan kullu mddn‑an, ur‑as‑jawbn s‑yat, ašku yumr‑tn‑ugllid: «a‑ur‑as‑trarm awal.»

³⁷ iddu alyaqim yus n‑ḥilqiyah lli‑illan f‑tgmmi n‑ugllid, d‑šibna lli‑igan aktatbi, d‑yuwaḥ yus n‑asaf lli‑igan abrraḥ n‑ugllid, kšmn s‑dar ḥizqiyah, bbin timlsa‑nsn, ɛawdn‑as iwaliwn n‑umšawar n‑ugllid n‑aššur.