2 igldan 17 - ssfjjijat f-mddn-inu - arratn imñlayn zå-løhd aqdim lli-iskr rbbi å-gras d-mddn-ns

hušaɛ agllid n‑israyil

¹ asggʷas wis sin d‑mraw (12) ġ‑tgldit n‑aḥaz agllid n‑yahuda, iwrri ig hušaɛ yus n‑aylah agllid f‑ayt‑israyil ġ‑tmdint n‑samira, iḥkam ṭẓa n‑isggʷasn.

² iskr ma‑yʷh̬šnn ġ‑iẓri n‑sidi rbbi, wah̬h̬a ur‑iskir ġunšk lli‑skarn igldan n‑israyil lli‑t‑izwurn.

³ yawn‑d srs šalmanasar agllid n‑ayt‑aššur. iwrri ig hušaɛ ġ‑ddu‑ufus‑ns aylliġ‑a‑ys‑ith̬llaṣ ḍḍabiyt.

⁴ imikk s‑n‑yufa‑ugllid n‑aššur is‑t‑iġḍr hušaɛ. ašku yuzn irqqasn s‑dar‑ugllid n‑miṣr lli‑mi‑ism‑ns su, ibbi fllas ula ḍḍabiyt lli‑yadlli‑yakka kraygatt asggʷas. yamẓ‑t‑ugllid n‑aššur ġakudan, iqqn‑as‑n ġ‑lḥbs.

⁵ yawn‑d‑ilmma‑ugllid n‑aššur, yamẓ akal n‑israyil, yašk‑id s‑tmdint n‑samira igli‑tt kraḍ isggʷasn.

ukuf n‑ayt‑israyil s‑wakal n‑aššur

⁶ asggʷas wis ṭẓa ġ‑tgldit n‑hušaɛ a‑yumẓ‑ugllid n‑aššur tamdint n‑samira, yawi mddn n‑ayt‑israyil s‑tmazirt n‑aššur. issgawr‑tn ġ‑tmdint n‑ḥalaḥ, ula ġ‑tama n‑wasif n‑h̬abur ġ‑tsga n‑guzan, ula ġ‑tmdinin n‑ayt‑maday.

⁷ ijra ġayan ašku ʷh̬šnn ayt‑israyil ġ‑gratsn d‑rbbi siditsn lli‑tn‑d‑issiwnn zġ‑wakal n‑miṣr, zġ‑ddu‑ufus n‑firɛawn agllid n‑miṣr. ddun ar‑tɛbadn id‑rbbi yaḍni,

⁸ ar‑skarn s‑tnbaḍin n‑iqbiln lli‑iṭṭay sidi rbbi ġ‑lgddam n‑ayt‑israyil, ula tinbaḍin lli‑zuydn igldan n‑israyil.

⁹ ar‑tsalan ayt‑israyil iskkirn ur‑ṣlaḥnin, ġḍrn rbbi siditsn ġ‑tntla. bnun ikʷrkar i‑ih̬f‑nsn ġ‑kullu timdinin‑nsn zġ‑iġrm imẓẓin ar tamdint imqqurn idusn.

¹⁰ ssbiddn i‑ih̬f‑nsn ifariwn d‑tggjda n‑‹ašrah› f‑kraygatt awrir yattuyn ula ġ‑ddu kraygatt aṣġar izgzawn.

¹¹ ar‑n‑tbh̬h̬arn f‑kullu ikʷrkar zund iqbiln lli‑iṭṭay sidi rbbi ġ‑lgddam‑nsn, ar‑tsalan iskkirn ʷh̬šnnin, ssṭiyrn‑tt bahra i‑sidi rbbi.

¹² ar‑tqasan laṣnam lli‑f‑tn‑yumr sidi rbbi: «ad‑ur‑tskarm ġayan.»

¹³ hati ihddid sidi rbbi ayt‑israyil d‑ayt‑yahuda s‑kraygatt nnabi d‑kraygatt yan iẓran ma‑ys‑imala rbbi ar‑ittini: «wrryat‑d zġ‑iġarasn‑nun ʷh̬šnnin, ar‑tti‑ttawim ġ‑luṣiyat‑inu d‑tnbaḍin‑inu, ġmklli kullu illan ġ‑ulmmud lli‑f‑uṣṣaġ id‑babatun, mlġ‑awn‑t f‑ufus n‑ih̬ddamn‑inu lanbiya.»

¹⁴ walaynni agʷin ad‑sflidn, ssiqarn iguya‑nsn zund id‑babatsn lli‑ur‑yuminn rbbi siditsn.

¹⁵ ḥgrn tinbaḍin‑ns d‑lɛhd lli‑iskr d‑id‑babatsn d‑tuggʷa‑ns lli‑s‑a‑tn‑ithddid. ddun ḍfurn ma‑ih̬wan, wrrin h̬wun ula ntni, zund iqbiln lli‑asn‑isutln lli‑f‑tn‑yumr sidi rbbi a‑ur‑skarn zund ntni.

¹⁶ fln kullu luṣiyat n‑rbbi siditsn, skrn i‑ih̬f‑nsn sin igayzn zġ‑maylli ifsin, ar‑skarn tiggjda n‑‹ašrah›, ar‑tsjadn i‑ikabarn n‑ignwan, ar‑tqasan ‹baɛl›,

¹⁷ ar‑n‑dḥḥin tarwa‑nsn d‑istitsn i‑lɛafiyt, ar‑tsḥḥarn ar‑tqddašn, ar‑zznzan ih̬fawn‑nsn f‑ad‑skarn ma‑yʷh̬šnn ġ‑iẓri n‑sidi rbbi. ar‑as‑tt‑ssṭiyarn s‑uggʷar

¹⁸ aylliġ iġḍb sidi rbbi bahra f‑ayt‑israyil. issufġ‑tn ġakudan zġ‑iẓri‑ns. ur‑sul‑tqama abla taqbilt n‑yahuda waḥdutt.

¹⁹ imma ayt‑yahuda ula ntni ur‑a‑skarn s‑luṣiyat n‑rbbi siditsn. ar‑fttun ġ‑iġarasn lli‑skrn ayt‑israyil i‑ih̬f‑nsn.

²⁰ ifl sidi rbbi kullu tiqbilin n‑israyil, issdullu‑tn isllm‑tn ġ‑ifassn n‑willi‑d‑itgguzn a‑tn‑in‑akʷrn, aylliġ‑tn‑issufġ kullu zġ‑iẓri‑ns.

²¹ zġ‑ġakud lliġ akufn ayt‑israyil zġ‑ayt‑tgldit n‑dawd, gn yarabɛam yus n‑nabaṭ d‑ugllid‑nsn, hatin issaggug‑tn yarabɛam zġ‑uġaras n‑sidi rbbi, ildi‑tn ad‑skarn mad‑bahra‑yʷh̬šnn.

²² zaydn ilmma ayt‑israyil, ur‑filn kullu iskkirn ʷh̬šnnin n‑yarabɛam, ar‑tn‑sul‑tsalan

²³ aylliġ issufġ sidi rbbi ayt‑israyil zġ‑iẓri‑ns, ġmklli‑s‑tn‑ihddid f‑ufus n‑kullu ih̬ddamn‑ns lanbiya. ittin ayt‑israyil zġ‑wakal‑nsn s‑tmazirt n‑aššur sul s‑ġassad.

²⁴ yawi‑d‑ilmma‑ugllid n‑aššur kra n‑mddn zġ‑tmazirt n‑babil ula zġ‑tmdinin n‑kut d‑ɛawa d‑ḥamat d‑safarwayim, izzdġ‑tn ġ‑tmdinin n‑samira ġ‑udġar n‑ayt‑israyil. ɛmmrn samira, zdġn ġ‑tmdinin‑ns.